Welcome To Knot ~ Season1: #31

唔好問我喊咩。
係個一刻，我只係好想喊。
 
可能係啫喱嘅眼神，令我覺得內疚…
可能係頭先嘅事，令我覺得我背叛咗人…
可能係啫喱嘅溫柔撫摸，令我覺得被感動…
可能係我嘅心結，纏得我太辛苦…
 
亦可能係……
我知道心結將解，我唔捨得…


 
啫喱對我作出咗一啲承諾，俾咗一啲我失去咗好耐嘅安全感俾我。
我清楚知道，以後要喊，我都會有一個懷抱等緊我。
 
呢晚，我哋雙雙都攬住對方瞓。
純瞓覺，係反而令我覺得更安心。
大家都係被窩中努力咁吸取對方嘅體溫同氣味。
 
啫喱嘅氣味係，舒服、安穩、微微帶麥香嘅味道。可能係近得麵粉多啩。
因為呢種氣味同感覺，呢一晚，我瞓得好好。


我無再夢見佢。



啫喱係朝早五、六點就起身 ，要返過去餅舖，準備整每日新鮮出爐嘅面包。
佢臨走前係我額上再鍚咗下。
我微微一笑：「對住個爐，小心啲。太多疤我唔要架！」
 
啫喱摸一摸我頭：「乖，瞓多陣。一陣沖杯靚咖啡，等我送貨過嚟時飲。」
又係輕輕一吻係額頭，啫喱就出咗門口了。


 
幸福……好耐都冇試過嘅味道