Welcome To Knot ~ Season1: #24

忙足一朝。
而Knot根本就連一個似樣啲嘅結都冇得俾人玩。
我襯有少少空檔，send咗個group message去friends group到，警告佢哋唔好搞我啲結，同埋約咗佢哋聽晚
打佯後嚟Knot。
 
一直做做做，直到差唔多打佯。
啞黑色BMW M3又再一次死纏出現於Knot門口。
 
「嘩！ 傳說中嘅M3呀。」路比入咗嚟，好明顯唔係嚟搵我，而係搵樂少。
「路比，上一上樓，我有嘢想同你傾。」我阻止路比有行前去摸架車嘅衝動。


「上樓？！ 我同你？？ 唔好掛，我唔想俾啫喱打完再俾出面個H車死喎。」路比嘗試作出反抗。
 
我並無理會路比嘅反駁，自己先上咗樓。
路比過咗冇耐，都上咗嚟。
我深呼吸咗一啖，先再講落去。「路比，我打算同多一個人講。」
「邊個？你肯定？」路比回復佢嘅冷靜。
「嗯！我唔想講係邊個人，但我講完我會話你知。學你咁講，可能講咗出嚟，個結真係會解到呢。」我嘗試說服路比，或者應該話，我係想說服自己。
「……如果你覺得OK，咁你去做啦。我只係擔心你啫。」路比關心咁拍一拍我手背。
「我知。」我亦拍一拍佢「所以我想同你講先。我…其實我好驚。」
「唔駛驚，路比係大廳！」


「嘻嘻~你啲GAG好難。不過多謝你。落去啦，我想換衫。」
 
到我換好衫，落返樓下時，就已經見到Kwan仔、楊言、路比坐埋咗一齊，再加埋我相信係因為見到M3而過咗嚟嘅啫喱、樂少同Taz。
 
望望鐘6：30pm。
佢哋6個人一聽到樓梯有聲，就立即將本來評論緊出面嘅注意力，轉而到我身上。
 
樂少係第一個O咀同企咗起身嘅人。
反而Taz係第一個衝埋嚟嘅人。
「嘩~Sky！！ 搞咩呀你，戰衣都出埋，著到咁行，你唔係諗住今晚生擒嗰隻H呀？！」


Taz所講嘅戰衣，就係呢件黑色無袖one piece短裙。
「咩生擒講得咁難聽啫！」我瞪一瞪Taz。
「嘩~露背架！」樂少唔知幾時走咗去我身後，係到怪叫。「啫喱！講句嘢啦！」
 
我望向啫喱，佢繼續係坐咗係到。
「你…打算同H出去？」佢試探式咁問。
「嗯！同佢去食餐飯。」我慢慢咁答，我好想知佢有咩反應。
「一定要著成咁？」啫喱再問，我留意到佢聲線提高咗。
「我…覺得幾好睇呀！」我輕輕帶過。
啫喱咩都冇講，只係一直咁望實我。
 
「啫喱…」「Oppa…」「去啦！」身後嘅樂少、Taz，同埋坐係啫喱身邊嘅路比、Kwan仔同楊言，不斷係到催促啫喱。