我個初戀話鍾意人打籃球，於是我放棄左踢波: 2
一開波個陣，兩班人各自圍圓傾戰術，佢地都係我好兄弟，答應左比哂啲波我射，我入一球就夠，點知杜如峰係我地仲傾緊個時已經走到我地附近。
咸濕強望一望佢，話︰「行開啲啦，想偷聽我地戰術？」當然佢驚到一講完即刻龜縮番係人堆入面。但我地實在太天真，佢要贏波，根本唔需要偷聽乜野戰術。
因為佢嘅打法好變態，而我就成為左佢變態之下嘅犧牲品。當我冇拎波個陣，佢貼到我實一實，就算我係自己個埸到，佢竟然都全程貼緊我，搞到我以為自己無啦啦多左個保鑣。
我試過出口術鬧佢，咩跟尾狗、變態跟蹤狂魔、吊靴鬼……我up得出嘅都up哂，仲唔小心比球證聽到，吹左我個技術犯規。
不過杜如峰都唔肯放過我，如果第日我條女好似佢咁痴身，我一定飛撚左佢，但杜如峰唔係女，冇得話飛就飛。佢咁樣全場盯實我原來就係想我連掂波嘅機會都冇。
但每當佢地班拎到波個陣，杜如峰都係單人匹馬剷入籃底，佢成架坦克車咁車埋黎，我幾乎想大叫學生無罪，但點樣都冇人擋得住佢。佢每次一拎完兩分之後笑都唔笑，即刻就衝去我身邊又盯住我，一分都唔比我拎。佢強到好似籃球之神米高佐敦咁，主宰成場比賽。
成個上半場就係咁樣過左，我一次起手機會都冇，但就比杜如峰一條友入左廿分。我地傾左一陣，好快諗到方法，就係做僻，佢地會幫我擋住杜如峰，等我可以乘機搵空位接波。
但杜如峰真係好勁，腳步打橫咁移，成隻蟹咁，但無可否認，佢呢招蟹步好快，而且配上米九嘅強壯身軀，幾個僻都連續比佢撞低，而佢嘅步法竟然冇絲毫嘅紊亂。
時間得番30秒，就係我絕望嘅一刻，咸濕強大叫左一聲︰「呀歸！上呀！」佢一轉身，成個人衝向杜如峰到，伸哂雙手要擒住佢。
但下一秒，我就見到咸濕強成個人飛左上半空之中再跌翻落黎，臉露痛苦嘅表情，咸濕強呢個僻本來係犯規動作，球證猶豫左一下，竟然冇吹。一來我地班輸緊太多分，時間得番十幾秒再吹犯規都冇咩意義，二來杜如峰一啲事都冇，反而係咸濕強自己撞到人之後彈番出黎跌底，再吹佢犯規實在太過殘忍。
咸濕強係呢一瞬間捨棄左自己嘅人生安全，阻延左架坦克車半秒，我終於接住左隊友嘅傳球，呢下真係有今生冇來世，我知道時機一瞬即逝，真係半刻都冇猶豫，輕輕一跳就起Q。
我呢一下我出手出得好靚，係出手嘅呢刻，我知道一定會入波，成場波一球都冇射過，啲壓抑住嘅籃球火擺哂係呢一球入面，感覺就好似你停十日唔打J，之後一次過出哂一樣，一個字，爽。
但係好可惜，我真係太睇少港青嘅實力，杜如峰雖然比人阻左半秒，但之後成個人跳起，跳得好撚高，我差啲以為佢對鞋裝左彈弓，一野將我個波係空中格走左，等到執番個波，比賽已經完左。
輸左場波唔係最重要，反正大家本身冇諗過贏到對面隊，但係我呢一鋪連芷晴嘅幸福都輸埋……仆街，我之前仲實牙實齒同佢保證杜如峰會番去佢身邊，而家點收科？
上到最尾個堂，我諗住放學約同芷晴解釋一切，但都未出聲，佢已經主動約我話放學係屋村公園仔等，我覺得事情有點唔對路，佢以前都未試過主動約我。
去到公園仔，傾左一陣，其實唔係傾，主要係芷晴鬧我同係到喊，佢比左杜如峰send過黎嘅whatsapp我睇︰「吳凡歸一球都入唔到，我贏左，希望你可以守約，以後唔好搵我。」
佢問我，點解咁無聊要同杜如峰訂埋呢嘅私約，入左波就一齊，入唔到就分開，咁當左佢係咩？玩具？我個刻望住佢好傷心咁流淚，我唔知點答佢。
佢之後講左一樣野係令我最傷心，佢話我根本唔係安住咩好心去幫佢，話我明知自己廢，仲要同杜如峰鬥波，根本係想特登輸左場賭博，令佢地散，之後我就可以乘虛而入。
我由細到大比人鬧都當人發up瘋，唔識喊，但我聽到佢質疑我真係眼都紅埋，番到屋企我訓係張床到望住個天花板係到諗，乜我冇盡力咩？我有，只係杜如峰真係太勁。乜我想佢地散咩？如果係嘅話我連射三球三分個陣已經可以專登射失，洗搞咁多野？
但唔知點解，芷晴冇再搵杜如峰，我都冇再打籃球，冇再踢波，每日過住番學放學，打機訓覺嘅生活，對一個做開運動嘅人黎講，呢種生活同行屍走肉係冇分別。
有一晚我飲左兩淡酒，諗番起一路以黎嘅事，忍唔住思亂如潮，打左比芷晴。佢第一句就問我有咩事，把聲又唔嬲又唔笑，平淡到就好似應付緊一個完全唔識嘅人咁。
我寧願佢串我、鬧我、屌我，咩都好，都好過當我係一個唔關事嘅路人，我好難受，但係都將自己想講嘅野講左出黎。
我同佢表達左一直以黎嘅愛意，我同佢講，當初同杜如峰賭個陣我真係已經出盡全力，我雖然鍾意你，但只係想你可以得到自己嘅幸福。我愈講愈傷心，把聲哽咽起黎，忍唔住將大半年前苦練球技嘅事都講左出黎。
我同佢講，個日我打電話安慰你，問過你一句點解會鍾意個大隻佬，你話因為佢打籃球好勁。
聽到你呢句說話，我之後就成個傻仔咁，一日到黑咩都唔做，淨係落街練籃球同喱係房入面睇NBA，將你嘅一句說話變做自己每一日起身嘅動力。
每日一放學我就係球場到望住個天由日頭變做夜晚，由夜晚變做深晚，直到球場嘅燈都熄埋。每日都身水身汗，但我只要諗到自己第日打波好勁，想像你會係場外面支持我嘅畫面，我就覺得一切都係值得。
我甚至連自己本身最鍾意嘅足球都放棄左，連一班波友都冇埋，但我冇後悔，只係可惜我練幾多都唔會及得上佢，所以一球嘅賭約失敗左，我點解釋都冇用，唯一想講嘅只係對唔住。
講完我就收左線，喱埋係個被竇到喊、流眼淚……你可能話我軟弱，但係男人流血不流淚，只因淚未流到傷心處。
第二日番學，芷晴竟然同我講話佢想打籃球，佢對我嘅眼神唔同左，似乎冇左以前嘅憎惡，我諗可能係尋晚嘅一番說話打動左佢。
我地去左我樓下個屋村爛球場，佢拎起個波射左幾球都air，然後問我點解男仔可以咁鍾意打波，打到咩都唔顧咩都唔理。
我諗左一諗，唔知點解，將同杜如峰講嘅一番說話同左佢講，只要你心入面有鼓動力做泉源，無論幾辛苦嘅事，你都可以堅持不懈咁努力落去。
杜如峰努力嘅泉源係佢職業籃球員嘅夢想，而我學籃球就係因為芷晴，男人心裏面有鼓動力，先會識得不斷努力，希望成為一個強大嘅人。芷晴沉默左一陣，我都唔知佢聽唔聽得明。
隔左一排，我以為事情一切都要告一段落，籃球又好，足球又好，都將會係我生命中消失，但係一個球場嘅夜晚，改變左一切。
我有晚放學心血來潮，去左葵芳睇人打波，呢個係我輸到一敗塗地，知道自己係廢物嘅地方，但唔知點解總係想番黎回味一下，追塑一下以往嘅回憶。
我坐左係到，突然有個好大隻嘅呀叔叫我出黎打波，原來佢地得五個人，唔夠人鬥波，見到我係隔離毒下毒下咁，就叫我出黎頂數。
我話我打波好廢，點知呀叔鬧我，話作為一個男人點可以話自己廢？我以為男人唔可以窮啫，點知連廢都唔比，於是最後比佢推左出黎打。
鬧我個呀叔好Q勁，身型成個杜如峰咁，技術好似都差唔多，但係因為我好頽，冇咩心情打，連累到佢地輸到五比零。個呀叔鬧左我一下︰「屌你，後生仔追下波走下位啦，呢碌柒咁。」當然佢自己冇咩點走位追波，可能因為佢唔係後生仔。
但聽到呢句，我似乎記番起當初係葵芳呢到比一個呀叔扑落黎個下，唔知點解，心入面冒起左一團火，好想認真番一次。
對面mark得我唔緊，我不斷走空位，我隊個呀叔好撚勁，又幫我僻又傳好多波比我，我一接就射，開頭兩球都唔入，但之後連入六七球，一口氣贏番場波。
打完個一刻，我好奇怪，自己明明射波幾準，唔知點解係有人mark實個陣就一球都入唔到。我問呀叔，但呀叔好奇怪咁望住我，好似我問左啲咩白痴野咁。
我唯有厚面皮認真問多次，同佢講我係比賽比人mark住就好容易收皮，空哂個陣先入到，係咩原因？
呀叔見我咁認真，都答番我，原來好簡單，我嘅肌肉記憶慣左係輕鬆嘅時候射波，一緊張就會大力左或者細力左，即係我臨場嘅經驗太少，係有人貼身防守之下射波放鬆唔到自己，同埋上籃一見人跳起就只係識避手，唔識硬碰。
之後一段日子，我跟呀叔打波，因為已經就快去到考中五嘅期終試，我多左好多時間出黎落街場同人鬥波，熟悉有人防守個陣應該點打。心無旁務，個個係到埋頭苦溫，我就用哂啲時間黎打波。我進步得好快，甚至有時連呀叔親自mark我都比我in your face。
我問過自己，當初打波係為左芷晴，咁而家呢？我練落去到底係為左乜野？我自己都唔知，但當每次踏入球場，就好想拎住個波證明自己嘅能力，唔係為左其他人，只係為左自己。
後來呀叔同我講，我係佢人生中見過第二個會咁努力打波，咁有火嘅人，我問佢第一個係邊個，佢話係杜如峰。我呆左，香港籃壇真係好細，呢個呀叔原來之前打過甲一，識杜如峰的確唔出奇。
霎時之間佢咁樣講，搞到我好想知道自己而家同杜如峰到底實力差幾遠，我打左籃球唔夠一年，就算再努力都唔會及得上佢，呢樣野我好有自知之明。但另一方面我都對自己好有信心，有信心唔會再好似班際咁樣輸得咁慘，可惜我已經冇再同佢鬥嘅理由。
但點知去到新學年九月，發生左一件事……
有晚芷晴打左比我，喊哂口咁同我講佢有左，唔知而家點算，唔敢同屋企講，唯有打比我。我呆左，咩有左？有左的咩？佢有左BB。
原來個半月前，杜如峰有一晚突然打比佢，話想見佢，芷晴於是上左佢屋企。杜如峰飲到好醉，問佢咩事，先知佢去左甲一球會選拔，但最後落選左，個教練話佢有前途，但得18歲太後生，始終實力未到，幾年後可以再黎選過。
我話，咁咪幾年後再去過，20歲21歲再打囉，有咩問題？芷晴都係咁講，但原來杜如峰已經冇咁嘅機會。
佢屋企人逼佢去外國讀書，因為佢掛住一路打波，DSE真係差到連3322都冇，用精英運動員入大學嘅計劃泡湯，一定要準備出國升學。
佢屋企人話，係香港打波冇前途，收入又少，而家社會上周街都係大學生，如果佢唔去外國學拎番張沙紙，真係等乞食啦。
杜如峰梗係好堅持啦，仲話香港而家都有一間球會有全職籃球員，一個月收入三四萬，仲多過好多大學生。佢老豆話佢不自量力，香港咁多人，一間球會得個十幾個人，佢點爭？爭唔到唔通去乞食？
就係咁，杜如峰走左去個間球會選拔，希望即刻可以做到全職籃球員，等佢老豆唔洗逼佢出國讀書。但好可惜，就算以佢嘅能力，都入選唔到，最後要放棄夢想，準備出國讀書。
夢想霎時間破滅，我唔知對一般人黎講會有咩感受，我細細個雖然都諗過全職踢波，但係香港生活左咁耐，人愈大愈黎愈明白呢個夢係幾咁遙不可及，漸漸咁已經麻木左，覺得係香港冇得講夢想只不過係一件平常事，連傷心都冇點話傷心過。
但杜如峰佢憑住一路以黎嘅努力，犧牲左無數時光，比只係識發夢嘅人更加實際，一步一步咁漸漸踏近夢想，點知係呢一刻，先有人同佢講，夢想已經唔存在啦。
佢好傷心，一個大男人攬住芷晴係到喊，兩個人胡里胡塗咁就係個晚扑左，芷晴仲要有埋BB，但係杜如峰同佢講冇可能一齊，因為佢訂左機票，年尾就要飛去美國升學，所以又再次block哂contact，唔肯見芷晴。
我聽到自己鍾意嘅人比人扑左，仲搞大埋個肚，忍唔住好心酸，佢係電話睇唔到，但我對眼已經紅哂，我亦唔敢出聲講野，怕佢聽到我哽咽嘅聲音。
隔左一排，我就陪左芷晴去左墮胎，呢個係唯一對佢好嘅做法，佢仲細，要讀書，唔通叫佢大隻個肚番學？生左出黎之後又邊個去養？佢屋企唔有錢，亦係傳統家庭，如果比佢老豆老母知道左呢件事，一定鬧撚死。
我地偷偷地去深圳落仔，我扮係BB嘅爸爸簽紙，落完之後個醫生同我講，落仔對女人好傷，叫我以後扑野記得帶套，唔好為左一時舒服而辛苦人地。
落完仔一排，我怕芷晴仲傷心緊同諗唔開，所以成日除左打波之外就係陪住佢，有時買早餐同佢一齊食，有時夜晚去睇場戲，有時佢黎球場睇我打波，有時深夜叫我陪佢食糖水，好似影形不離嘅情侶咁。
我以為我地咁親密，成日一齊，應該可以成為情侶，但佢有時睇睇下戲，見到女主角好慘，就會無啦啦眼濕濕咁，我好清楚佢心入面有一條好深嘅刺，有時佢黎睇我打波，係場外面又會無啦啦流眼淚，佢個刻雖然係望住我，但我諗係佢心入面出現嘅係另一個男人嘅身影，我知佢好掛住杜如峰，好想見佢。
我有次嘗試細細力捉住佢隻手，佢之後好不經意咁甩開我隻手，指住前面咁話不如去買燒賣食，但我好明白，佢個刻唔係真係想食燒賣，只不過係搵個藉口去鬆開我隻手。
我諗呢件事已經令到佢有心結，冇辦法展開一段新感情，唔單止佢唔開心，我都唔好受。解鈴還須繫鈴人，如果佢可以見到杜如峰，兩個人三口六面講清楚，我諗佢先會死心，所以我去左搵杜如峰。
我同佢講芷晴兩個月前墮左胎，到而家雖然好似冇事，但事實上仲好唔開心，好有心結，我希望佢可以見芷晴一面。佢沉默左一陣，同我講，呢件事不如就好似當日我所講，用籃球去解決。
就係咁，我地係佢離開香港之前，訂左最後一個私約，佢比一個月我練，如果我可以係一個月之後嘅one on one入面入到佢一球，佢就答應臨飛之前見一見芷晴。
我知道今次杜如峰一定會比班際比賽個時更加認真咁同我打，我自知實力唔及佢，於是苦練球技，不斷跟曾經嘅甲一呀叔學野，學一打一嘅技巧，但去到第五日，出左一件我意料唔到嘅事。
番學個陣，新黎嘅體育科張sir突然叫左我去教員室，我以為自己唔知做錯啲咩，新官上任三把火，唔通佢都搵我祭旗立威？我係咁say sorry，只係希望佢唔好留我堂，因為我放學要練籃球。
點知隔左一陣，咸濕強、軒爺、龍哥一班人竟然都係教員室出現，全部都係比張sir叫過黎。張sir同我地講，佢希望學校重開足球隊，佢問過人有咩人識踢，又係體育堂見過我地現過兩腳波，似乎唔差，所以希望我地會係將來足球隊嘅主力。
呢一刻，全部人都好驚訝，但大家已經好耐冇踢波，唔知軒爺佢地團火仲係唔係到？
咸濕強眼濕濕咁話佢等左學校重開球隊好耐，一定要踢。之後軒爺諗左一諗，舉手話參加，龍哥、俊少、飛機建，每個都舉起左佢地隻手。
得番我一個放低雙手，仲猶豫緊。張sir話如果加入嘅話，聽日就要遞名上去參加學界比賽，之後球隊會係一三五放學練波，應付學界賽事。
但係我同杜如峰嘅決戰就係一個月之後，我本來已經唔夠佢強，如果而家仲分心去踢波，我連半分嘅機會都會冇埋。
我唔敢望咸濕強，唔敢望軒爺，沉默咁離開左教員室。咸濕強佢地冇出聲，只係望住我走，佢地都知我近排成日打籃球，已經完全放棄左踢波。係呢一刻，我淨係知道，我再一次背叛左我嘅隊友。
咸濕強佢地苦練球技，係為左應付學界賽，我唔敢去睇佢地嘅訓練，我驚我會忍唔住喊出黎，因為一齊踢校隊就係我地咁耐以黎共同目標。
我唯有用籃球麻醉自己，只係不斷咁苦練球技，準備同杜如峰嘅one on one比賽。一個月之間，我地都為左各自嘅目標而奮鬥不懈。
去到決戰嘅一日，我去到一個室內場，身高一米九嘅杜如峰著住23號紅色波衫、白色波鞋，身型高大，手臂強壯，就好似公牛嘅米高佐敦。
我著住白色波衫，雖然矮佢成個頭，但係我冇驚佢，好似呀叔話齋，打波最緊要唔可以驚，唔可以怯，怯，你就輸左成世。
我地鬥七分，每球都係one chance模式，只可以進攻一次，冇得搶籃板。如果我入到一球，我就算係贏左個賭約。
第一球我一拎波就毫不猶豫咁剷入去，雖然佢高大，但我可以運用我嘅速度去壓制佢，可惜佢都唔慢，係我上籃嘅一刻，一手格左我落黎。
之後佢嘅進攻方法好簡單，用背脊食住我，推到籃底勾手，所以我基本上冇防守嘅能力，一球一球咁輸。
「點解你會鍾意杜如峰？」
「因為佢打籃球好勁？」
……我回想起同芷晴講過嘅野，轉眼間我已經輸到六比零。
我每失一球之後嘅進攻權全部都入唔到波，我試過遠射，但佢反應好快，竟然係我出手個陣將個球擦開，我試過左右邊上籃，都比佢打走個波，假射亦都fake佢唔到。
「你……你覺得如果一個人可以為左打波而飛左個女朋友嘅話，佢會係一個咩人？」
「係其他地方我唔知，但如果係球場上面嘅話，佢一定係一個強大嘅人。」
……我曾經講過，杜如峰係一個強大嘅人，我拎住個波，望住佢極為認真嘅神情，呢一刻，彷彿我面對緊嘅唔再係杜如峰，係籃球之神米高佐敦。
最後一個機會，我嘅幸福掌握係自己嘅手入面。我突然記起一個動作畫面，係心入面諗左一諗，模擬每一個動作同細節，下定決心之下，終於郁左。
我左手拍波，佯裝向左切入，極速黎一個Crossover將波運番去右邊，杜如峰第一下有少少比我fake左，但好快轉番過黎對實我。我右手將波由跨下Cross番去左手，左手拍左波兩下。再黎一次更大動作嘅向左切入！佢今次真係以為我要切入，腳步一上，半個身已經對住左我嘅左邊。
我係呢個時候迅速再黎多一個Crossover將個波運去右邊，我知道時機一瞬即逝，於是即刻右手抄起個波，左手托住，就黎個jumpshoot，但同時間佢已經回身跳起，向籃球伸出佢嘅右手……
「呀歸，你會唔會成日諗……自己有一日可以好似一啲好勁嘅籃球員咁，一跳就掂到個籃框，然後將個波放入去？」
「爆籃就冇諗過，但係都會希望自己平時打波可以勁到好似NBA球星咁嘅。」
……呢一瞬間，我彷彿變成左戰神AI，出盡全力用左兩個Crossover之下，佢終於係慢左一步，阻唔到我射波，皮球打左兩下籃框，最後跌左入網。
杜如峰遵守左佢嘅諾言，係臨飛個一日，去左見芷晴，我企係遠處，望住佢地見面。我唔知佢地講左乜野，只係見到兩個人講左一陣，然後芷晴眼淚就流左落黎，成個人投入左杜如峰嘅懷抱之中。
杜如峰都伸開左雙手攬住左佢，任由芷晴係佢心口上面喊左一陣。之後先輕輕咁將佢推開，講左兩句，就撘的士走左。
我唔知佢地之間講左乜野，只係知道芷晴已經開朗左好多，亦唔會再係戲院入面偷偷地咁流眼淚。我唔知佢放低哂杜如峰未，亦都唔需要知道，只係默默咁守護係佢身邊，照顧佢，帶快樂比佢就已經好足夠。
隔左兩個月，我收到消息，咸濕強佢地要踢學界賽啦，我當初拒絕左加入足球隊，已經冇得再同佢地並肩作戰。但係我都好想咸濕強同軒爺佢地可以係足球場上大放異采。
我驚佢地仲怪我，所以唔敢去睇比賽，但係芷晴唔知點解拉左我去，話想睇吓人踢波。我唔知佢幾時有睇人踢波嘅嗜好，但佢叫到我唯有陪佢。
我一去到個陣就見到咸濕強，我見到佢手上拎住一啲野，係一件全新嘅七號球衣，上面寫住我嘅英文名，之後芷晴係個袋入面又拎左一對波boot同襪出黎，好明顯係佢係我屋企到偷番黎嘅。
原來咸濕強同一班隊友都冇放棄過我，一早叫呀sir加埋我個名上去，等我有火嘅一日再番番黎同佢地踢比賽。我望住佢地兩個，諗番起一路以來嘅事，除左百感交集，唔知可以再用咩去形容我嘅心情。
芷晴突然捉實我隻手，同我講︰「吳凡歸，今日，我想睇人踢波。」
我著好波衫，綁好波鞋，踏入草地場上，微風吹起左我嘅頭髮，呢一刻，我唔再係毒撚，我就係c朗拿度。
-完-