一般人, 會叫我哋做地盤佬, 其實我哋係腳踏實地既工程佬

我係一個工程師。

嚴格上，我唔係一個真正既工程師，我只係喺大學既工程系畢業之後，入左一間工程公司度, 個position係工程師，但仲未考獲工程學會認可既資格。

工程都分好多種，我讀既大學，有土木，有電機，有機構，有電子等等。土木就最吃香，即係最多人揀最有前途最搵到錢。而我呢，就好似我既人生咁，好多時都係次一等，我讀既係有「大電」之稱既電機，Electrical Engineering。

我一畢業，就入左呢間公司，入職既時候係AE, Assistant Engineer，係呢間公司打滾左五年有多。公司既制度係，轉post先會加人工，喺上年我升左職，升左做Project Engineer，掛名，人哋親屬朋友問起，都可以叫做工程師。

我從來唔覺得工程師係高人一等，可以同一哋醫生律師，或者係會計師平起平坐，只不過係由讀書仔，耷低頭做左幾年野，有個名，專業少少，算係對自己有個交代。





相信好多啱啱畢業出黎既大學生，投身社會，頭幾年都唔知自己做咩。有陣時，會覺得讀咁多書要黎做乜，出到黎做野，好似咩都望唔透，尤其喺呢個時局既香港。

上個星期，我同一位同事，佢喺一個AE, 叫Robert仔，一齊去左北角睇一單工程既野。香港既九月，就算過左中秋，都仲熱，我哋兩個帶住安全帽，著番對安全鞋，帶埋啲電路圖就出發。到左個客座大廈，我哋就同左個客走入去佢哋個電錶房睇野啦。唔知係唔係眾所周知，電錶房係無冷氣，環境係好過地盤既，不過入左去唔駛十五分鐘，係一個咁焗既環境下，大家傾完初步既工作計劃，行番出門口，我哋幾個都流汗流到成身濕哂咁。

喺門口有番啲風既位置，我同Robert仔一路抖涼，一路繼續為個客解答一啲工程上既問題。

「媽咪，妳睇哥哥佢地好似珍寶珠!」珍寶珠? 咩珍寶珠呀?

門口其實對住條大街，我一眼望過去聽到呢句話既方向，我見到一對明亮既眼，呢對眼係黎自一個應該三十歲樓下既人妻，應該係一個人妻既媽媽，因為佢拖住左一個四、五歲大既男仔，求先嗰句說話就係呢個小朋友講。





點解我哋似珍寶珠? 哦，原來喺因為我哋求先喺電錶房出黎，仲未除低頂安全帽，個小朋友覺得我哋戴住頂黃色既安全帽個樣，似珍寶珠。

「無禮貌，唔可以咁樣話哥哥...」我再打量一吓呢個媽媽，佢有個幾標緻既樣貌，眼大大，佢同個小朋友一樣衣著幾光鮮，仲有啲高貴，流住一把長長既秀髮，。佢迎望左我一眼，同我笑左一笑，抱起左個小朋友，跟住就另轉邊，向番住大街，似乎佢係等有人黎佢。唔夠一分鐘，就有一架香檳色既四驅保時捷接走佢。唔知係唔係我睇錯，佢上左車之後，係車既玻璃入面望出黎，同我笑左一笑，點左點頭。係呢一刻，我感覺紅都面哂。

我定個神之後，同個客傾多十分鐘度，其實主要係Robert仔同個客傾，我地正想離開之際，迎面而來又有另一對既母子，今次呢個媽媽只係一個好普通既屋邨C9, 佢望一望我同Robert仔，就耷低頭擦身而過。當我以為若無其事繼續向前行之際，我聽到個媽媽同個細路講:

「阿仔，如果你唔讀書，大過就會好似呢個哥哥咁架啦，做地盤佬架!」

我聽完呢句說話，好想拎轉頭同呢個C9講，我有讀書，不過唔叻，但係讀完大學，都係做工程，做地盤咋。







我係一個電機工程師。

但嚴格黎講，其實我又唔係。