《末日東方之珠--- 淪陷香港後花園》: 7.

呯呯…呯呯…呯呯…
我個心跳得越黎越快。
唔理啲水入眼有幾痛，我都瞪大對眼，望實佢。
佢望咗一陣，就行開咗。
腳步聲越黎越遠，佢好似，行咗去床嗰邊。
 
就快抖唔到氣，我將個頭伸出水面，深呼吸。
「嗚......」熟悉既低鳴。
我聽到急速既腳步聲向浴室邁進，我即刻縮番個頭入水底。
今次，佢冇行近浴缸，而係喺浴室門口外停咗一陣，就離開咗間房。




 
我唔敢輕舉妄動。
一直重複將個口浮出水面呼吸，再匿番入水底既動作，直至十幾分鐘過去。
 
我攝手攝腳地離開浴缸，用顫抖既雙腳行近房門，輕輕地將其關上。
 
好凍。
 
我轉身，見到地上向雙人床延伸既一道血痕，正確啲黎講，係一道屍水既痕跡，啱啱驚心動魄既場景再次浮現。
 




好得人驚。
 
我避過屍水，無力地走向床邊，除低身上濕哂既衫褲。
 
頂...我部電話...
 
換上乾淨既衣物之後，我無力地癱軟在床上。
 
唔得，而家唔係休息既時候。
 




我打開衣櫃拎起風筒，一手吹乾部電話，一手拎起房入面既電話打街線。
 
「喂？」
 
「喂，媽！你喺邊？」
 
「買緊餸囉，我買咗隻鴨啊，今晚炆俾你食。」
 
「唔好買啦！快啲番屋企啦！你係咪冇睇新聞啊！出面好危險啊！」我真係好緊張，我好驚尖沙咀唔係唯一出事既地方。
 
「你講咩啊，都話買緊餸咯，邊有新聞睇啫。」
 
「媽你聽我講，而家即刻番屋企，叫埋老豆細佬，鎖實哂啲門窗，拉埋窗簾布，搬啲重野擋實度門，唔好出聲。」
 
「懵咗啊你？」




 
「你聽我講啦！！！乖乖地番屋企，咩都準備好哂之後開電視，你就明架啦！」
 
「喔...咁好啦...」
 
「你記得小心啲啊！我陣間就入去搵你架啦！」
 
收咗線之後，我即刻打俾阿文。
換黎既係，我所打既電話未能接通。
無論打幾多次，都係一樣。
 
濕咗既iPhone依舊打唔開。
 
1083。
 




「唔該，我想打去伊莉沙伯醫院。」
 
我唔記得泳茹個電話，部iPhone又濕左，唯有搏一搏。
 
「嘟——嘟——」
「喂，伊莉莎伯醫院。」
「泳茹？係咪泳茹啊？」
「你講施姑娘？佢而家準備過其他醫院幫手，先生如果冇咩事既話......」
佢未講完我已經打斷左佢。
「有事啊！叫佢唔好去啊，你快啲叫佢聽電話啦！」
「先生你冷靜啲，我地唔會隨便幫陌生人聯絡我地既同事......」
「而家尖沙咀咩事你唔係唔知，我係佢老豆啊你快手啦！」咁講係咪誇張咗少少？唉，唔理得咁多。
「呃...咁先生你等等...泳茹泳茹！」
 
「喂？」泳茹把聲聽起黎好急。




「泳茹？我係阿Don啊！」
「Don！而家醫院好亂啊！琴晚啲同事幾乎全部傷哂，有啲送咗番黎，有啲失蹤咗，原來你琴日講既野係真架，佢地真係會死過番生，仲會周圍咬人，上頭而家想派我地過瑪嘉烈治療受左傷冇辦法過黎既傷者。」
 
「痴線架，唔好去啊！你唔好去瑪嘉烈，即刻離開伊莉莎伯，番屋企避下。」
 
「唔得，我唔可以丟低佢地唔理。Don你記得小心啲......啊！嘟——嘟——嘟——」
 
「泳茹？泳茹？你唔好嚇我啊，泳茹！」
 
呢一通電話，喺泳茹既尖叫聲下結束。
 
我一定要去救佢。