《末日東方之珠--- 淪陷香港後花園》: 4.

阿文未到之前，我喺附近行咗陣諗住搵下有冇鳳梨酥。

城龍大藥房——小熊餅乾。

搵唔到鳳梨酥，買兩盒餅頂住當都好。

「老細，兩餅小熊餅乾唔該。」
「好既，哥仔買唔買把萬用刀啊？40蚊把好洗好用，剪刀、開瓶器、生果刀、螺絲批多合一，買黎旁身都好丫。」
「喔…好……」





平時我絕對唔會俾呢啲不入流既行銷動搖，但係今日，都唔知係咪未訓醒，唉。

「鈴鈴鈴鈴鈴—————」
「Don，我到咗尖沙咀啦，你喺邊？」
「加連威老道。」
 
上咗車之後，阿文一邊開上西九龍公路，一邊話我俾人呃，100蚊盒餅都買。

但係我既思緒始終都係俾路面狀況所吸引。





星期三朝早九點幾，點解會咁塞車？
開咗車成三十分鐘，終於經過荔枝角公園。

呢個時候，係我身邊既阿文打咗個喊怒，一問之下，原來佢琴晚成晚開工冇番過屋企。

車外突然越黎越吵鬧，我抬頭一望，發現原來前方廿幾部車既司機都紛紛落哂車，好似前面有咩事發生咁。一個著住粉紅色POLO衫既少年由駕駛座爬上車頂，似乎想睇清楚前面發生咩事。
 
「咦，好似有大單野喎，Don，不如出去睇下？」阿文解開安全帶。

「坐好啦你，好奇害死貓，冇聽過？開個收音機聽下好過啦。」





「又好。」

「嗞——嗞——昨日於機場突襲民眾之地勤人員經已掙脫醫護人員的壓制，曾被該名地勤人員咬傷之市民及海關人員均先後相繼發狂，瑪嘉列醫院現場相當混亂，建議民眾勿於附近聚集，盡快返家以保安全——嗞——嗞——」
 
瑪嘉列醫院？前面咪瑪嘉列醫院囉？咁塞車，唔通真係有事……？
「DonDonDon！你快啲睇下前面！」
 
我抬頭一望，只見粉紅衣少年一邊拍手叫好，我循著佢既視線望過去，見到兩個人係地下打鬥，其中一個人似乎越加虛弱，無力反擊，而另一個人好似喺度……食緊佢……？

我幾乎唔敢相信我既雙眼，我竟然親眼見到一個人食緊另一個人，食人族幾時黎咗香港？更令我唔敢相信既係，個粉紅衣少年竟然係車頂度拍手叫好都唔落去幫手。

我即刻解開安全帶，打開車門。

咦？打唔開既？





「做咩啊阿文，你做咩鎖門啊，要落車救人啊。」

阿文粒聲唔出，眼定定望住前面，好用力咁咬實棚牙，用力到額頭爆滿青筋。

由細到大，只要阿文受到驚嚇，就會咁……

原來我淨係掛住望地下個兩個人，完全冇留意到身邊發狂既人越黎越多，被咬傷既人亦越黎越多，遍地哀號。

係我發呆之際，我感覺到部車緩緩向後退，阿文嘗試離開現場，我落車救人的想法亦都逐漸消失，因為場面已經失控，如果我落車，命運只有一個，就係被茹毛飲血、肚破腸流。

部車越退越後，失控既場面逐漸消失於視線範圍。我最後見到既一幕，係一隻狂屍跳上車頂，抱住粉紅色少年，一口咬落佢高挺既鼻樑、面頰、肩膀。

少年既粉紅色POLO衫漸被染紅，佢全身抽搐，驚惶的眼眸往上翻，僅剩下泛紅的眼白……