[惡搞無極限] 就係咁，我同幾個豬朋上左大陸獵金: ３７６　打開機關

望住呢一對陶瓷娃娃……

「你地見唔見到，頭先佢地好似對坐我笑咁啊……」勞斯萊斯好驚咁話。

「……你……你多心姐。」我答勞斯萊斯，但係我同佢都有咁既感覺……唔係！應該話係見到！對陶瓷娃娃對住我地笑！！！

見到呢一對陶瓷娃娃，我就諗緊之前好ＨＩＴ果一篇潮文，無錯最後個故事係無限ＬＯＯＰ幫個主角搵錯，但係……但係當你面對住咁既情況，你真係有少少驚。

不過，總係會有唔怕死既人，果個就係阿欣，「對公仔好得意啊。」佢行去對陶瓷娃娃面前，眼定定咁望住佢地，「佢地好似識郁咁架，可能係機械人黎架。」





咩話！？識郁！？阿欣妳知唔知咩係陶瓷娃娃啊！！！陶瓷呢樣野基本上一固定左個形狀就唔會變，如果想改變只係粉碎架，而定妳話見到對陶瓷娃娃識郁，唔通呢個世界真係有幫人搵錢既恐怖陶瓷娃娃！！！！！

「佢地對眼好似人咁添架，瞳孔識放大縮細。」阿欣好興奮咁講，然後係陶瓷娃娃既眼前面不停用手揚佢地，「你地係未睇到我架。」

識放大縮細！！？呢一對一定係已經被邪靈付身既陶瓷娃娃！阿欣妳知唔知妳而家既處境係非常之危險啊！！！

我同勞斯萊斯聽到阿欣既說話後，嚇到攬埋一舊……係，如果我可以選擇既話，我當然會攬花木蘭啦，但係花木蘭聽到阿欣既說話絛無驚不特止，仲行左去阿欣身邊一齊觀察對陶瓷娃娃。

「係攝影鏡頭。」花木蘭不慌不忙話，而被嚇既我同勞斯萊斯就問：「下？」





花木蘭指一指對陶瓷娃娃既眼話：「係攝影鏡頭。」佢摸一摸對陶瓷娃娃，然後轉一轉佢地，點知有直係好似有機關咁，花木蘭一轉對陶瓷娃娃，發出左上發條既聲響。

阿欣見到花木蘭咁做，就跟住佢既動作，「等我都轉埋呢個公仔先。」佢地兩個將本來唔係對視既陶瓷娃娃轉成對視，過左一陣間，我同勞斯萊斯所企之處有少少震動。

「阿賢，你ＦＥＥＬ唔ＦＥＥＬ個地有少少震？」問我既人係勞斯萊斯，而我就答佢：「……有。」

呢一個有字先剛剛講完，地下就突然大開左一個大洞，仲正正係我同勞斯萊斯既下方，講到咁，我當然同佢一齊跌左落去啦，而跌既同事，我就聽到，「阿賢，你去邊度玩啊？我又要跟埋去！！！」係阿欣既聲音。