[惡搞無極限] 就係咁，我同幾個豬朋上左大陸獵金: ３６１　黃雀在後

ＭＡＮ姐入院既消息好快傳開，跟佢果Ｄ人好快就黎到醫院睇佢有無事，但係ＭＡＮ姐依然昏迷緊，佢Ｄ兄弟都好鼓燥。

不過呢度始終都係醫院，所以勞斯萊斯都叫左佢地先返去收拾好殘局，唔好等ＭＡＮ姐醒左要佢操心。

係病房入面，只剩返五個人，訓左係度既ＭＡＮ姐同阿俊，我、阿欣以及勞斯萊斯。

「點解呢？」勞斯萊斯不停念念有詞，而我就問佢：「點解Ｄ咩？」

「點解佢一再襲擊我地，次次都唔趕進殺絕，次次都留活口呢？」勞斯萊斯講完後，我就諗返轉頭，又係ｗｏ，次次雖然都傷，但係無人死，但係聽聞碇司令咁惡怖，而且佢以前為左封遺書都可以殺左武則天，點解對我地又會咁呢？





唔通！？

「佢係未想靠我地搵晒Ｄ遺書，然後一次過搶走晒佢啊？」阿欣話。

而我好驚訝地望住阿欣，點解？點解阿欣無啦啦又會咁正常講句咁有道理又咁有邏輯既說話既？

「阿欣，妳講得好岩，妳好叻。」勞斯萊斯話，等等！我本來都想咁講架！只係唔知點解比佢講左先咋。

比人讚既阿欣笑得好開心話：「我緊係叻啦。」





而勞斯萊斯就問我，「阿賢，而家你地有幾多封遺書係手？」

「鐵扇公主一封、武則天半封……一封半，仲有你老闆還珠格格果封佢未比我，不過一該都走唔甩，可以計多一封，花木蘭果封要等同阿妹一齊去先拎到，唔知計唔計入去好……」「等等！」我未講完勞斯萊斯就喝停左我，「咩野事？」

「我係度諗，其實我地既一舉一動佢都好似知道晒咁，所以我可以估計，佢都知道我地搵過花木蘭，所以……佢會唔會派人去左花木蘭果度？」勞斯萊斯好認真咁同我講。