[惡搞無極限] 就係咁，我同幾個豬朋上左大陸獵金: ３５４　三樣野

「咁係邊三個考驗？」我問花木蘭。

而佢，就坐左係度答我：「我要你拎三樣野比我。」

「三樣野？」我問。

「有無睇個一套電影叫運財智叻星？」佢突然咁既一問，我係腦入面不停咁諗，都諗唔到呢套係咩野戲，我就話：「無ｗｏ，港產片黎架？」

花木蘭點一點頭，然後我就話：「咁唔怪得我無睇過啦，我睇西片多。」





佢聽到後笑左幾聲話：「咁你以後要睇多ｄ拿，港產片都有好野架。」

無錯，我地應該多ｄ支持港產片既。

「咁妳要我搵三樣野比妳，關呢套戲咩事啊？」我又問。

「係套電影入面，有一個劇情係叫個女主角去搵三樣野去救返佢既愛人……」我聽到佢咁講後，已經心知不妙，港產片ｄ劇情叫搵既野，一定唔方係好野，「個女主角要搵既，係仇人的禮物、情人的眼淚、衰公既家用。」

「再見，我都係叫我個妹黎搵妳好過。」呢個係我聽完佢講出黎果三個條件既結果。





點搵啊！！！情人的眼淚呢個好易姐，叫阿欣喊就ＫＯ度，但係另外果兩樣都唔知係咩撚野黎，衰公既家用！？我仔黎架！邊度出現個衰公比你啊！！！仇人的禮物！？而家我既仇人係碇司令，而果條友係癲既，佢會唔會比份禮物你先，佢見到我迫我交阿爸既遺書出黎啦，仲比禮身我咩？

「你真係可以考慮下ｗｏ，如果你覺得衰公既家用好難，轉做衰婆既家用都得架。」花木蘭話，但係我又點樣變個衰婆出黎先得呢？

「咁唔衰公衰婆，轉做……衰人既家用……唔家用既話，轉做補貼？我好ｏｐｅｎ你想點改？」我聽到真係無言，妳講到妳咁ｏｐｅｎ，點解唔直接比封遺書我……

「花小姐，妳似搵著我黎玩多ｄ　ｗｏ……」我話。

「呢度悶嘛，見你咁勁破到我既迷術，你一定有ｄ過人之處未想同你玩下囉。」呢一句後我更加無言。