[惡搞無極限] 就係咁，我同幾個豬朋上左大陸獵金: ２８５　就而家啦

阿俊走左，留低既當然係一個問題，點解佢要走。

「條友一定身有屎先走啦！」阿倫已經先入為望咁話。

「未係，呢幾日佢都自己一個人行事，咁古怪，一定係做左Ｄ衰野唔比我地知。」阿輝話。

而我，就諗極都諗唔明點解阿俊會咁做，亦都諗緊佢係由幾時就有咁既行為。

係黎到方叔叔呢度佢先咁，定係一早就係咁……唔知。





係一個暫時未有答案既問題上死都係要諗唔係一個方法，所以我同大家講：「不如我地做左眼前知道要點做既野先好唔好？」

所有人聽到我咁講後，全部都將目光放到我身上。

而我，就組織左一陣我以下所講既野後，話比佢地知：「而家，我地知道阿爸真係有留低Ｄ野比我同阿妹，方叔叔話係會有批金，但係，我最想搵到既係阿爸想同我以及阿妹講既說話。再者，我記得阿爺同我講過，話搵阿爸Ｄ人會惹到Ｄ好險既人，所以你地有人唔想參加既話，可以而家退出。」

我望一望佢地幾個，見佢地無動作後，我就繼續講：「阿爸留左比線索比我同阿妹，分別放左係五封遺書入面，佢臨走果日交左比大寶，而大寶又將果五封遺書交左比五個人，不過而家大寶個頭受過傷，所以記唔係果Ｄ人，只係講左比阿妹知，要搵五個人，分別係武則天、白雪公主、花木蘭、還珠格格同鐵扇公主。」

講到呢度，我阿倫同阿輝再消化下我所講既野，然後我先繼續，「我地已經成功搵到其中一個人，係鐵扇公主，拎到其中一封遺書，以及知道另一個人，武則天既下落，搵到鐵扇公主令我知道，呢五個人唔一定係女人，因為今次搵到果個人，係一個有鐵扇公主紋身既人。」





「咁會唔會其他果五個人都會紋左相對應既野？」阿輝倫問，而我就答佢：「唔排除有呢個可能，但係下一個武則天，已經知道一定係女人。」

眾人點一點頭，而我又講：「呢封遺書既內容，阿爸叫我同阿妹要信身邊既朋友、身邊既人，所以，我相信你地，亦都唔好為左一個走左既人再煩，因為我地而家最緊要既，係搵到其餘四封遺書。」

講到呢度，阿輝就舉手想發問問題，「呢位同學請講。」我配合佢咁話，而佢聽到我咁講後都講出佢既問題：「我地，可唔可以睇下封遺書寫左Ｄ咩？」

我望一望阿妹，見佢點一點頭後，就拎左封遺書比佢地兩個，佢地睇完之後，問左一個我都諗緊既問題：「點解係呢五首歌？」

「我都唔知，而且呢五首歌都唔係我鐘意既，所以，我覺得阿爸係特登講我地知呢五首。」我答。





「世伯Ｄ提示都比得幾明顯下架ＷＯ。」阿倫話。

「係囉係囉，我咁蠢都睇得明，咁樣阿賢都一定會明。」阿輝你讚自己之餘仲踩低我果下好野。

大家聽到阿輝既說話後，都笑左出黎，而阿欣笑完後，就好興奮咁問：「咁，幾時開始啊？」

我地幾個對視左一下後，就話：「就而家啦。」