[惡搞無極限] 就係咁，我同幾個豬朋上左大陸獵金: ２６５　真係有金

其實話去訓，點會真係訓到，眼光光望到朝早，等Ｄ人叫我起身食早餐，無休息過，但唔知點解好精神，可能係因為解決左一個問題掛。

一行落樓下，第一眼見到既係黑眼圈好重既舅父，我地兩個望一望，笑一笑，大家男人，呢一笑心照啦。

再見到既係阿欣同阿妹，「阿哥早晨……呵～」睇黎阿妹都無訓成晚，而阿欣一見到我，即刻衝過黎攬住我問：「你尋晚有無訓啊？」

我搖左搖頭，然後阿欣就答：「我都無訓過啊，唔知點解訓唔著。」阿欣係我面前，幾時都係咁可愛咁天真。

咦！？我竟然用可愛同天真去形容佢……





行到放滿早餐既枱，見到阿倫同阿輝已經坐左係度大食等食，但係阿俊……連人影都無。

「阿俊呢？」我問。

阿倫同阿輝無理過我，繼續食佢地既早餐，而阿欣就答我：「今朝一早就見到佢出左去拿。」

咁佢都出左去，搵佢都無謂啦。

我地幾個都坐左過去食早餐，食到中途，方叔叔同方中瀡都落左黎，「早晨！」方叔叔好好中氣同我地打左招呼，而方中瀡就無理我地，直接坐低食野。





我望住方中瀡，而佢就用眼神問我做咩望住佢，又係好耐無見既眼神對話拿。

（多謝你。）

（傻啦，我講過查案要靠運氣，我多謝你地就真啦，如果唔係你地黎左，我都唔知最後既真相。）

（但如果唔係你對查呢單案既堅持，可能我都唔會知道個真相。）

（笑……你同你阿妹有共識未啊？」





（有拿。）

（咁未好囉。）

（快Ｄ食早餐啦你兩個）

嘩！邊個亂入！原來係阿妹佢，我地兩個尷尬咁笑左一笑，然後繼續食早餐，但就係呢個時候，我又收到另一個人既眼神對話，係方叔叔。

（一陣食完去我間房度，我有野話你知，可兒都係，一齊黎。）

（知道）我同阿妹兩個人對望左一下，腦子充滿住疑問。

食完早衣，各人都有佢要做既野，而舅父就話要去和平飯店同老前輩傾計，阿倫同阿輝就唔知去做咩，阿欣就話去我間房等我。

我同阿妹上左方叔叔既房，而方叔叔就企左係窗前面，陽光好猛烈咁射左入黎，整到我地望向方叔叔只見到一個黑影。





「……黎左……」方叔叔好似同我地講緊野，我諗佢係背住我地，因為我唔係幾聽到佢講咩野。

「係啊。」我答佢，而阿妹就用手遮住對眼，因為陽光真係好猛。

「我……」呢句完住聽唔到。

「下！？」阿妹同我一樣都聽唔到，再問方叔叔。

「我話……」真係咩都聽唔到ＷＯ，而我身邊既阿妹就行左過去方叔叔度，一手拉埋窗簾，然後話：「谷鬼氣，方叔叔你同我地講野就望住我地兩個講啦，背住我地講邊聽到啊，仲有未扮晒電視劇企係窗邊講野啦。」

方叔叔好尷尬咁笑，「唔好意思……」

而我就入返正題，「方叔叔，你搵我地有咩事？」





方叔叔問我地：「你地有無戴住當年阿福阿爸比你地既果條鏈？」

我地聽到佢咁問後就拎左條鏈出黎話：「有啊。」

佢望一望條鏈話：「咁你地就要好好保管呢條鏈，因為接落黎我同你地講既野，其中一個好重要既事，係關條鏈事。」

「咩事？」我同阿妹問。

「阿福佢，留左Ｄ野比你地，係一批金。」方叔叔話，而阿妹聽到後嚇左一跳，但我經歷過之前既鹹柑桔事件後，都係問清楚好Ｄ，「方叔叔，你講果Ｄ金，係９９９千足鈍金果Ｄ金？」

方叔叔聽到我咁問後，就話：「緊係啦，唔通你以為鹹柑桔啊？」我就係以為係鹹柑桔。

咁講，阿爸真係有留左批金比我！？

「但係，我唔知批金既去向。」方叔叔又話，咁你頭先講既野算唔算講過野……