[惡搞無極限] 就係咁，我同幾個豬朋上左大陸獵金: ２４０　阿爸坐頭等

係方瀡果間公安所其中一間房入面，坐住既，有大寶、有舅父、我、阿妹、阿欣同方瀡，係長桌好似分左楚河漢界咁坐成兩邊。

我地，等緊一個人……

門開，「方中瀡，你要等的人到了。」一名公安帶左一個老伯入黎，果位老伯，係開和平飯店既老前輩。

老前輩慢慢行去一個座位度坐低後，望一望身邊既舅父同大寶，問舅父：「是時候了吧？」

舅父佢點一點頭。





「也是，這麼多年的事情，都要有一個交待吧。」老前輩嘆左一口氣，然後用唔鹹唔淡既廣東話講：「你阿爸，佢係一個頂天立地既人。」

「咁你地幾個可以講我阿爸既事比我聽未？」我等到有Ｄ唔耐煩。

「一切，都要又你阿爸返大陸果陣講起。」舅父話。

————————————————回憶分隔線又出場————————————————

「點解你要著草？」我問眼前煩惱緊既阿福：「咁我阿妹點啊？你就咁放佢係香港唔理？」





阿福佢拎左Ｄ相我睇，然後話：「我知我好對唔住你阿妹，但係佢寄左呢Ｄ相比我，威脅我如果唔上去見佢既話，就會是但殺相入面其中一個人。」

我望一望Ｄ相，相入面既人，老方、我阿妹、賢仔、仲有一個未見過既女人同一個細路女。

「老方、我阿妹同賢仔我知係邊個，但係呢兩個人係……」問題問左出黎，但其實心中已經有答案。

現場靜左好幾秒後，阿福終於出聲，「可唔可以幫我找門路著草？」

「下？呢Ｄ你熟過我啦，你唔自己搵？」我問佢。





「如果我自己去問，會引起其他人既多疑……」阿福用一個我從來都未見過既眼神望住我：「而家只有你可以幫到我。」佢係用，一個懇求既眼神。

「你比一日我，我再通知你。」我答佢，然後又問：「我阿妹佢知道未？」

「未知，不過我而家要返去執少少野先走，我都唔知好唔好話比佢聽？」佢答我。

「如果你唔可以親自話比佢知的話，就等我話佢知。」我同佢講。

「好，唔該你，阿志。」佢話。

我用左半日就搵到著草既門路，搵完之後就話比阿福聽：「喂，阿福，著草果邊搞店左，估唔到著草而家咁先進，有分頭等、商務同經濟位，我幫你留左個頭等位比你，著草都舒服Ｄ。（

「真係唔該晒你，阿志，你真係好兄弟。」阿福好感激咁回答我。

「傻啦，你都講啦，我地兄弟嘛，到步後話一話比我聽，我睇下搵唔搵到人同幫你。」我同佢講。





「好，你都幫我好好照顧阿芳同賢仔。」佢好似交帶身後事咁講。

「會，我一定會。」我回答。