[惡搞無極限] 就係咁，我同幾個豬朋上左大陸獵金: １９６　語音地圖

嘔完，舒受晒……

「你地點解會嘔既？」阿欣用好天真既眼神係我地幾個旁邊問，但我地又可以點答佢好。

「阿嫂妳係唔係知架氧。」阿妹笑得好勁咁講，然後轉話題：「唔知邊度可以搵到果位方大爺呢？」

阿妹，妳問我啊？我而家剛剛嘔完個腦唔係點行度。

「求其搵個人問下啦。」阿欣講完後已經好主動四圍問人。





「阿妹，快Ｄ睇住阿欣唔好比佢亂黎。」回緊氣既我話。

「收到。」阿妹答完之後，正想去睇住阿欣之際，阿欣就走返黎話：「問到拿，佢話只要照呢條路直下，轉左，再轉右，個條橋……」

佢講成三分鐘既路線，成個語音地圖咁款……「就到架拿。」

有無咁簡單啊……

「阿嫂妳好勁啊。」阿妹話：「阿哥，咁我地行。」





等等……我地都未知果條友係未亂咁話我地知……

「咁就算係度等都無法架，行啦。」阿妹話。

「係囉，行啦。」阿欣就已經捉住左我行緊。

你地可能覺得點解我一句野都無講，佢地就知道晒我想講咩咁。鬼咩，其實我地幾個仲反緊胃，仲係好想嘔，一開聲就會繼續嘔，點講到野……