[惡搞無極限] 就係咁，我同幾個豬朋上左大陸獵金: １５１　妳究竟係邊個

門關左後，我隨即有幾咁可以貼住道門，就幾咁貼住道門，呢一刻，我不知幾想成為呢道門既一部分。

佢望實我，慢慢咁行埋我度。

「妳……妳唔好再行埋黎啊！我嗌架！」我向住佢大叫。

「你已經嗌緊啦。」佢好冷靜咁話。

「係ＷＯ……咁妳仲行埋黎！」





佢無理過我既大叫，而亦都無人會理我既大叫，佢愈行愈近，然後比左個壁咚我。

估唔到我一生人竟然可以有比人壁咚既機會，但係我其實唔係幾想有，雖然時興隆係正，但係……「我已經有女朋友！我好愛佢架！妳唔好污辱我！」

人係緊急既關頭，真係會唔知自己講Ｄ咩，將自己既心聲全部講晒出黎。

時興隆聽到之後，大笑然後向住房入面行左過去，而我，就一副唔知發生左咩事咁望住佢。

佢坐左係果張唔知穩唔穩陣既床上面，然後話：「你剛剛，問我條鏈既事……」佢欲言又止，而我聽到佢咁講後，衝到佢面前，問佢：「咁頭先我話妳戴果條鏈，係未我架。」





佢無答我，只係神色好憂傷咁低下頭，問我：「條鏈你點得返黎？」

「呢條鏈係我阿爺比我架！係佢比我架！所以對我黎講係好重要！」我唔理三七二十一咁講左佢知。

但佢繼續低下頭，然後係佢條頸度除左條鏈落黎，遞左比我，而我見到咁就一手拎左過黎，「好彩搵得返。」但當我打開個鏈咀，見到入面唔係一張字條，而係一張四個人既合照果陣，我先知道，原來呢條鏈唔係我，係時興隆，而我仲未搵返條鏈。

更重要既係……

時興隆開始喊緊……





而我……就望住鏈咀入面張相，張相上面，有一個同時興隆好似樣既女人，抱住一個好可愛既細路女，而女人身邊左右各企左個男人，一個係老，另一個就後生Ｄ，老果個係我阿爺，而後生Ｄ果個，我呢一世都唔會忘記佢個樣。

果個人，就係叫我以後要好好照顧頭家，好好睇住阿媽既人，呢個人係我阿爸……

「妳究竟係邊個？」我問，我問緊仍然喊緊既時興隆。