[惡搞無極限] 就係咁，我同幾個豬朋上左大陸獵金: ５２　粉紅色私家車

返到去問左個阿姐，原來佢果度有大陸電話卡買，仲好唔駛走幾轉，換左張電話卡，拎左紅毛個電話，我地就去搵阿姐講我知架車係邊度。 

「阿紅毛哥……」 

「不如你叫我阿俊啦。」 

「係係係，叫慣左好難一時改口。」 

「改改下就慣架啦，我地兩個而家一齊著草，無分大細就未哥前哥後，返到香港先再叫我紅毛哥。」阿俊講完後扮晒型棍咁叨住口煙。 





「……係。」我好無奈咁望住阿俊。 

「唔好用仰慕既眼神望住我，我知我真係好俊，但係我唔搞ＧＡＹ。」 

屌！俊！邊撚度俊啊！我睇唔到ＷＯ！ 

「阿俊，趕時間啊，不如我地行啦。」同佢一齊去係未真係無問題架。 

我地好快就搵到坐車既地方，只不過我地等左好耐都無車，而每一個經過我地既人，都用一個好奇怪既目光望住我地。 





阿俊佢就回啤返每個望住佢既人，而我就扮晒睇唔到咁低頭。 

「究竟Ｄ人望咩春呢？」阿俊語帶少少怒意，「咁撚耐一班車都無既。」 

等等下，一架粉紅色既私家車停左係我地兩個面前，車窗慢慢落下，見到既係一個滿面鬍鬚既阿叔，「去邊架你地？」佢講野仲要乸乸地。