[惡搞無極限] 就係咁，我同幾個豬朋上左大陸獵金: ３　嫲嫲

到我稍為懂事既年紀，我認知到既親人，有我阿媽，爺爺同嫲嫲，仲有一個當差既舅父。 

我同阿媽兩個人一齊住，而舅父好錫我，當正我係親生仔咁看待，時不時都會上去我度睇我，爺爺同嫲嫲就住係離島，有時我都會自己一個人去睇下佢地。 

十四歲果一年，我如常去探佢地，果一年，嫲嫲行動不便，出入都要坐輪椅。 

每次入去探佢，佢都會講以前Ｄ　事比我聽，而當中有一件事係我最深刻。 

「賢仔，你記住，你爸爸係比人害死架，你大個之後一定要查出黎。」 





其實果陣醫生已經判斷左嫲嫲係有少少神知不清，所以我都唔知嫲嫲所講既野有幾多成真，幾多成假，而且次次講既內容都唔一樣，有一次仲要係話：「賢仔，你阿爸係比你阿媽害死架。」

而嫲嫲就係我十四歲果年就走左。