「手天使的愛情」幫人洩慾，竟愛上盲女。: 1；網上搵工認識殘聯會主管林小姐。

失業一年幾，俾老豆老母日日嘈我，甚至叫我搬出去，逼於無奈我終於上網搵工，見到好多倉務工文員工，真係見到到煩 擺明搵老襯既垃圾工滿天飛，心水工作真係好難搵，於是我喺Uwants開post睇下有冇人推介工作俾我，我仲好記得我自己打既每一隻字，如下：

「有志氣肯承擔既青年，想搵份付託終生既職業。」

「本人視力有少少缺陷，但可以正常睇野，四肢健全，只不過偶爾會胃痛需要休息片刻。搬唔到太重既野，但為人有愛心有耐心，肯學肯做，任勞任怨，唔想成日轉工特此開post希望有人賞識我，我定當全力以赴報答閣下親恩。」


而呢個post一打出，唔使一日時間，已經好多人pm我，地產啦保險啦銀行啦零售啦電訊啦打call啦金融啦，黎黎去去都係呢班人搵我，仲有其他就係倉務同地盤。唔係我唔想搬野，只不過我視力唔多好（其中有隻眼戴咗眼鏡都睇唔清楚），驚論論盡盡搬野整到自己。




如果真係再冇人pm我好既offer，我真係打算去做水貨客

而第二晚，有個好另類既pm，我睇到都不禁即刻回覆佢

佢話：「協助殘疾人工作，幫殘疾人解決需求。」

我re：「嗯，想知道具體做乜？thx」

佢re：「簡單講，你就負責協助殘疾人摺下野，簡單包裝下野。」



我re：「我唔知我幫唔幫到手，但我口才都算ok，應該得既。」

佢re：「我wechat id mslamivy，加我WeChat傾。」


我細過都成日睇肥貓正傳，我諗弱智都算係殘疾掛，應該唔難服侍掛，我本身都幾鐘意動物，待人友善，所以我聽到話要協助殘疾人，我一d都冇抗拒，一d都冇。


而我拿拿臨WeChat佢。



我：「Hi，我係Uwants，尋找伯樂的千里馬。」

MsLam：「Hi，你有冇聽過手天使?」

我：「聽過……幫人地Hand Job個d…… 」

Mslam：「我地都係呢d。」

我：「但我係男人wor 」

Mslam：「其實冇問題既，都係戴手套甚至有需要可以戴面具，同埋對象唔一定係男人，都有女仔。」

我：「咁呀…恕我唐突問句，咁每個月人工有幾多？ 」

Mslam：「16000-38000 hkd」



我聽到之後真係嘩咗出黎

我：「我ok呀，幾時可以interview。」

Mslam：「約你後日黎葵芳ok？」

我：「OK」

馬死就落地行，有工返點都好過冇工返，人被逼到上懸崖，一係投降向現實妥協，一係跳落去，

幫自己打飛機都一年幾百次啦，幫人地打飛機都有錢收，我點解唔去先。只不過呢份工難以啟齒，唔敢同外人講咋嘛 我以後最多對外宣稱我係做網上生意咪得，邊個都check唔到我正職係乜。


於是我真係帶齊學歷，工作證明，相片等等，著埋老西去見工。MsLam叫我葵芳地鐵站等，佢話佢著米色衫粉紅色裙，5分鐘後到。嘩，齋聽覺得扯扯地 不過都做好心理準備係大肥婆咖啦。




恕我真係塵世間一條好撚自卑既毒撚，未拍過拖，暗戀無數，連雞都冇叫過，見到女仔會怕醜…… 企喺地鐵站外等，我唯有用玩手機去掩飾我既怕醜


5分鐘後，Mslam傳黎WeChat，佢話佢到左，唔見我。

而我就四周圍望下，果然有個米色衫粉紅色裙既女仔，任我視力再差，僅有既對焦都得知佢生得唔差 典型既護士姐姐形象，愛心天使，義工達人個一類。


「Hi，我係阿輝。」我行過去，鼓起勇氣打招呼先，隨著解像度越黎越高，我懷疑我紅都面曬，眼前呢個女仔的確幾靚

「Hi，我係林小姐。sorry呀我遲咗。」親切既笑容，嬌俏既外表，成個學生妹咁既pure 莫講你遲到5分鐘，遲到50分鐘唔捨得嬲你啦

「唔緊要呀，我都係等咗一陣。」



「咁我地行返去公司啦，好近。」

「好。」

從後望住佢粉紅色裙，pat pat微微咁扭動，都咪話唔心郁郁，好想篤

莫非真係上天可憐我呢個世紀毒撚，賜給我一段美好緣分？ 如果溝到佢，真係一鋪字返曬黎，人生大逆轉呀

話咁快，我地就兜入類似工廠區既地帶，大廈林立，而我跟住林小姐上到辦公室。我留意到呢度地方唔大，職員都唔多，但佈置得算幾得體，完全唔似某d寫字樓咁成個亂葬崗咁。

入到房。林小姐未等我show學歷同之前既工作證明，已經俾份表格我填，都係一d基本資料黎，填完之後林小姐即刻睇睇我既學歷同之前既工作證明，滿意地點點頭。

林小姐：「其實我地呢度呢，學歷有冇都唔係最緊要，最緊要係有愛心同耐心 同埋要保密，唔好四周圍洩露公司秘密，同我地服務對象既資料。」



我：「明白。」

林小姐：「大家成年人，就唔好避諱啦，你既對象係一d例如盲咗或者手腳唔協調，又例如四肢唔健全既人，佢地苦於冇洩慾既途徑，所以先搵我地幫手， 我地能夠做到既係尊重佢地，而唔係歧視佢地。出面既世界點睇佢地，我地可以唔理，但我地一定唔可以歧視佢地，要當佢地係朋友咁看待，知唔知？」

我：「知道。」

林小姐：「咁你最快幾時可以返工？」

我：「後日。」

林小姐：「就後日啦，黎返呢個地址，早上十點鐘 」

我：「好，唔該。」

步出辦公室，我忽然覺得自己好正義，過幾日一件好有意義既工作等緊我。

當然，林小姐既美色，的確又成為我既又一種新既動力