《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 來自背後的衝突
「權哥！ 你哋無野下話！」 我哋一聽到慘叫聲， 馬上跑上黎， 見到三樓無人， 所以跑上黎四樓。 四樓都係好黑， 只係見到有幾個人影， 喺未確認情況之前， 我哋唔敢行過去， 因為可能係喪屍。
人影轉一轉身， 但無回答。
呀豪同我並肩而行， 我下意識用身體擋住海晴， 呀豪再問， 「你哋無野下話？」
「無事！ 我哋搵到多個差佬， 依加問緊佢知唔知咩事！」 權哥大聲叫返過黎。
我哋聽完鬆一口氣， 四人慢慢走向前面。
「估唔到仲有咁多警察！ 睇黎我哋有救啦！」 海晴驚喜咁叫道。
映入眼簾嘅， 係岩岩嘅陳晉同埋一個身穿白色警服嘅中年男人， 雖然我唔識警察啲野， 但佢膀頭上嘅徽章點睇都似係一個高級嘅警察。
但係個男人頭破血流， 手都流緊血， 唔通佢比喪屍襲擊完？
眼前兩個警察目光不停打量我哋， 似乎係發現我哋嘅目光， 個警察開口講， 「我唔係比喪屍咬傷。」
「我叫潘sir， 喺高級督察， 呢度暫時係我in charge。」
「潘sir你好， 我哋係… 係生還者。」 Coco姐帶頭回答， 唔經唔覺佢已經成為我哋團隊中負責同人交流嘅一個， 除咗因為佢比我哋年長外， 主要喺佢做人處事比較圓滑， 簡單啲黎講即係見人講人話， 見鬼講鬼話。
潘sir點點頭， 面上仍然流住冷汗同面露痛苦， 所以只係點點頭。
「呀潘sir， 請問係咪會有警方嘅人黎接我哋去安全嘅地方避難架？ 依加出面周圍都係個啲好似喪屍嘅癲佬， 我哋好難先生存到落黎！」 海晴喺我背後探出頭， 問向潘sir， 眾人目光都放喺潘sir身上， 因為呢個亦都係我哋一直等待嘅答案。
潘sir見大家望住佢， 佢乾咳一聲， 之後問口， 「好遺憾， 暫時我哋未聯絡到總部， 亦收唔到到任何總部支援嘅消息。」
「唔係下話…」 聽完我不甘呆一呆， 咁即係代表… 代表港島都可能出咗事？ 如果唔係點會連個高級督察都聯絡唔到警察總部呀？
「咁我哋依加應該點…」 海晴聽後聲線都難掩失望。 大家都陷入沉默。
沈思咗一陣後， 軒少終於開聲。 「帶我哋去你儲存軍用裝備嘅倉庫睇下。」
潘sir叫一叫陳晉， 吩咐佢去做呢件事， 自己則坐喺軒少同權哥兩米嘅之內。 如果出咗呢個距離， 潘sir並唔知道軒少會唔會即刻郁手。
出奇地， 呀豪竟然出聲反對， 「呢件事走之前先做都得， 我比較想知跟住落黎我哋會點樣行動？」
軒少回頭望向呀豪， 雙目就似在發問， 你邊位呀？
雙方凝視一陣後， 呀豪率先頂唔順， 「喂你望完未呀你？ 我問跟住點行動姐！」
軒少微一微笑， 「望完啦， 你哋可唔可以再自我介紹一次？ 畢竟我仲未識你哋。」
正當呀豪想再次燥底個陣， Coco姐及時打斷佢， 「好好， 咁不如我哋坐低介紹一次， 再商量一下跟住嘅行動， 咁好唔好？」
權哥指一指旁邊一間房， 「入去休息下先， 再講。」
而軒少都足夠冷靜， 睇清咗房入面狀況後， 無任何多餘嘅動作， 就帶頭行入去。
一行八人走入房入面， 房間剛好係一間會議室， 我哋一人一張櫈就坐喺到， 等待有人帶起討論。 由於在座有位高級督察， 各人理所當然將視線投喺潘sir身上， 除咗權哥同軒少。 軒少一入黎就點起枝煙， 一陣煙味漫延開黎。
「咁多位， 我哋香港警方喺九龍區最高負責人暫時定喺我， 所以暫時由我in charge呢到。」
「大家都知香港依加發生緊咩事， 因為有呢種未知嘅病毒令到人變到喪屍咁， 所以我哋警察先要保護大家離開九龍， 不如大家介紹下自己先， 跟住再商量點行動。」
我哋呢幾個一齊生還嘅團隊就續一介紹自己， 簡短咁自我介紹後， 呀豪都唔轉彎抹角， 直接進入正題， 向潘督察問我哋前景。 一直以黎都只有靠自己逃生， 依加難得有一個知道真正情況嘅高官在埸， 我哋基本上都放心交托比佢。
「就我最後收到嘅信息黎講， 港島區嘅警察將會喺確認有方法對抗感染者後就會登陸九龍半島進行救援行動… 喺救援行動展開前， 好抱歉我哋暫時無方法， 亦聯絡唔到其他人…」
「點會咁… 你唔係警察黎架咩！ 你咁講即係叫我哋困係到等死啦！ 係咪！」 呀豪非常激動， 企起身拍台向潘sir大叫， 身旁嘅Coco馬上拉返佢落黎。
潘sir等呀豪坐返低後， 再搖搖頭嘆一口氣， 潘sir有一頭接近陸軍裝嘅短髮， 雖然佢外表睇落並唔英俊或者有型， 但佢身上散發住嘅喺一股老練嘅氣勢， 喺由多年做警察得返黎。 潘sir身上好多傷口同血跡， 令佢睇得更加狼狽， 頭上嘅白頭髮令佢猶如一個油盡燈枯嘅老人。
潘sir開口講， 「呢一次行動係我做警察以黎最大獲嘅一次， 所有野發生得太快， 能夠反應得到及時撒退已經做得好好。 行動中總有取捨， 能夠以少數換取多數， 已經值得政府去做呢件事。」
「無人想感染發生， 無人想有喪屍， 如果可以嘅話我都想帶你哋走， 不過我無咁嘅能力。」 潘sir嘅說話帶住蒼涼嘅味道， 佢感慨咁講出自己嘅心底話， 我諗呀豪都明白， 潘sir都唔想咁， 但實在無辦法， 我哋只能夠等待…
「咪住先！ 呀權哥之前咪話碼頭有得走佬嘅！ 你係咪有船係個到？」 正當呀豪失望低頭時， 佢突然靈機一動， 諗起舊事馬上問向權哥。
權哥抬起頭， 沉默一陣後回答， 「係， 我相信碼頭可以逃亡。」
呀豪繼續追問， 「咁你即係有船係個到？」 正當權哥想回答時， 軒少望向權哥， 令權哥欲言又止。
「等得救援黎可能喪屍都衝到入黎， 況且都唔知幾時會有解藥！ 靠政府不如我哋自己走， 好過係到等死！」
「我哋畢竟都係要一齊生存， 你有船嘅話不如一齊用， 我哋可以一齊去無喪屍嘅地方， 到時就各行各路， 你睇我唔順眼我都唔會再見到你， 好唔好？」
呀豪把口好似機關槍咁係咁講， 每一句都好有道理， 令我聯想到佢係喪屍出現之前打個份工係賣保險。 算死草又精明嘅佢已經發現到軒少望向權哥嘅眼神， 都估到軒少並唔想帶我哋走， 呀豪雖然唔鍾意佢哋覺得佢哋係古惑仔， 但為咗生存佢都照問， 我仲以為佢會同軒少佢哋撐到行， 點知依加就去求人幫手， 真係諷刺。
「哇你幾好口才喎， 你之前做盛行呀？」 軒少代權哥答。
「我係保險公司到做。」
「哦， 你岩岩話一齊生存， 你唔係睇我哋唔順眼架咩？ 我一早就知啦！ 你個死保險佬！ 依加見到有著數想痴埋黎？ 收檔啦！」 軒少吸一口煙後， 毫不留情咁直接罵呀豪， 呀豪個樣一時青一時紅， 聽到最後都罵返轉頭！
「死mk仔你以為自己係邊個！」 呀豪企起身行去軒少到， 面紅耳赤咁想去打佢！ 海晴同coco馬上拉住佢， coco都開口，
「呀軒少， 可能我哋意見不合姐， 大家話曬依加都一齊坐喺到， 如果有船嘅話不如帶埋我哋走啦， 幫咗我哋以後你有咩需要我哋都會幫返你！」 呀豪狠狠望住Coco， 不滿佢應承會報答黑社會， 但coco搵手掩住佢個口， 唔比佢講野。
「哈哈哈哈哈，」 軒少突然笑咗幾聲， 「幫返我？ 咁你跟我去隔離房我哋傾一傾！」
呢個時候海晴拉拉我手臂， 我不解咁望向佢， 佢雙眼望望Coco姐又望望軒少， 應該係想我幫幫口。 軒少嘅意圖好明顯， 就算係蠢人都明白佢嘅意思係咩！ 喺軒少救我同海晴個陣我仲以為佢係一個好人， 我對佢嘅印象就由佢岩岩輕蔑嘅發言一落千丈。
「傾？！ 傾你老母呀！！」
呀豪雖然再次想罵佢， 但coco繼續掩住佢個口， 叫佢唔好出聲。 Coco面色起初有少少錯愕， 見到coco竟然阻止佢之後， 呀豪馬上撥開佢隻手想同佢理論， 但奈何佢女朋友用盡全力頂住佢， coco對住呀豪搖搖頭， 示意佢唔好同軒少再嘈。
咁又係， 呢一刻軒少直頭同之前完全唔同， 佢言行舉止都好有無賴嘅感覺， 又或者可能我哋根本對佢嘅認識其實唔深。
我開口道， 「Coco姐你唔好理佢啦， 軒少你講笑姐下話」
軒少帶住微笑望住我， 一面你吹咩咁嘅樣。 正當Coco開口個陣， 軒少再次出聲， 「但唔好意思， 都係無船。」
呀豪轉向對軒少發作， 佢終於忍唔住破口大罵， 「你玩野呀死金毛！」
軒少聽完馬上企起身舉槍指向呀豪！ 「玩你唔起呀保險佬！」 權哥馬上起身按低佢枝槍， 潘sir都企起身馬上開口， 張開雙手示意兩邊冷靜， 「唔好衝動！ 我哋係討論！ 放低枝槍先！」
「呢輪出面差唔多日日都打大交， 搞到香港好似打仗咁七國咁亂， 警察焗住要做野， 但係市民都需要合作！ 如果我哋依加唔合作， 大家一隊人狗咬狗骨， 最後受害嘅又係我哋！」 潘sir企起身義正詞嚴對住各人講， 見大家都冷靜落黎之後， 就繼續講，
「其實我哋差人隔離啲感染者都係做埸戲比市民睇， 我哋根本完全唔知道發生緊咩事， 全部都係照上頭柯打去做。 政府都知道咁搞法無可能趕絕感染者， 佢哋都知道市民無飯開， 秩序就會失去平衡， 無咗平衡， 個局就會亂！」
「差佬最唔好見到嘅， 就係亂！ 所以， 佢哋先會將救得到嘅人救咗先！ 而就搵我哋呢個環頭做中間人， 希望我哋可以拆掂呢壇野！ 但好明顯我哋失敗咗！ 不但之送唔曬市民走， 連呀頭都失蹤埋！ 好老實講， 我都想離開呢個鬼地方！ 如果大家真係想離開呢到嘅話， 我有方法！」
潘sir一話震驚全埸！ 到底佢有咩方法可以帶我哋離開呢到？