是咁的，我禁錮了我的女神: Ω－19/7/2017

香港爆發喪屍病毒，幾乎所有既人都變哂做喪屍。我地完全無辦法收到外界既資訊，唔知其他地區係咪一樣都有喪屍。最少我地可以肯定，九成九既香港人都已經無得救。
 
我同佢可能係世界上僅存既人類，雖然我唔係幾鐘意佢。
 
「等埋，你行得咁快架！」佢同我講。
「係你行得慢姐啊叔，雖然話日頭係唔會有喪屍活動姐，但係你行咁慢因住比人食呀！」我回答佢。
「你著住校裙，點解都可以行得，咁快……」
「係你廢姐，阿叔。」
「水，仲有無水……」
「無啦，一早比你飲哂啦。」




 
我嘆左啖氣。似乎呢個阿叔只會拖累我，完全唔會咩作為。
 
其實我係咪應該丟低佢係到，自己一個生存呢？咁樣可能仲好添。話哂，我同佢只不過係我既客人，並唔係咩特別關係。
 
「話時話，你唔覺得喪屍好恐怖架咩？」佢開口問我。
「OK啦。」
「佢地會食人，你唔驚咩？點解一直以黎你都咁冷靜？」
「佢地本身咪又係人，佢地都係人黎姐。」
「佢地唔係人，係喪屍啊！已經死左啦！」




「喪屍咪又係人，喪屍同人類有咩唔同？」
「你係咪比佢地咬左我啊？」
「係啊！」
 
佢嚇左一跳。
 
「講笑姐，駛唔駛咁淆啊，肥斯大隻生人唔生膽。」我笑住講。
「喪屍同人類差咁遠，點會一樣啊！」
「你唔覺好似架咩，喪屍好似係夢遊緊既人？」
「……夢咩遊？」




「感染成為喪屍既人，會唔會發緊一場春秋大夢，然後咬人只係佢地夢遊既行為？」
「咁一定係發惡夢。」
「可能啦，不過可能都會發緊一啲好夢，例如夢到自己仲係一個人類，可以同心愛既人係埋一齊咁，你唔覺好浪漫架咩？」
「浪……漫？哈哈……」佢陪笑。
「唉，你呢啲中坑識條鐵咩？」
「無，我只係覺得，由你呢啲雞呢啲說話出黎，有少少突兀……好奇怪姐……」
「所以我唔可以有鐘意既人？」我睥住佢，然後唔再理佢。
 
「前面有間便利店！」佢好似個小學生咁興奮咁大叫。
 
然後，我同佢一齊行左入去。
 
「有喪屍啊！」佢又好似個小學生咁好驚咁大叫。
 
我望入便利店，一片狼藉。




 
有一條屍體瞓左係地下。
有一隻喪屍圍住條屍體黎轉。
 
我呆左咁企係到。
 
「係你熟人？」死中坑問我。
「嗯。」我執起地上面既一本日記黎睇。
 
「條屍係我同學，叫Jasmine，係呢間便利店既店員。」
 
由2017年5月10日到2017年6月11日既日記，之後唔知因咩原因無再繼續寫落去，仲以為係記錄低喪屍潮時期既日記添，6月11日都未有喪屍。
 
「而個喪屍係Jasmine既同事，我唔識佢。」
 




然後，我開始閱讀日記既內容。