那夜,我在老蘭狩獵了天使: 第十三章

「得喇...你無肥到呀,依條係貼身裙,係咁嫁!」
「唔係呢,買個時都無咁貼嫁...仲有我咁著真係得?咁貼...」
「得喇!你著咩都無人話你嫁!你著咩都係我女朋友,都係咁靚!」
「哦...」又來殺死人既微笑,「咁我攞返個袋先...」
「你又攞你個爛鬼斜孭袋呀?嗱...攞依個!」我俾個新買手袋佢。
「咩來架?手袋?喂...你又買裙又買手袋,使唔使呀?」
「唔襯嘛!嗱!依個淺藍色手袋襯埋條淺藍色露肩貼身裙,又成熟又性感,正呀!」
「喂!隻手唔好亂摸呀!」
「執埋啲野行喇,差唔多啦!」
經過一輪擾攘,我同阿珊終於去到我屋企,一個我幾年都未返過既屋企...




「返來喇,二少!」開門既係容姨,由細睇到我大,係屋企做得最耐既工人。
「返來喇!依位小姐點稱呼?」
「我來介紹,依個我大哥同大嫂,佢叫阿珊啊。」
「大哥!大嫂!你好!」我見到大哥眼神露出一絲驚訝。
「你睇仲有邊個返來?」
兩個人從客廳走過來,「二哥!」
「咦?你地返左來呀...阿珊,依兩個我細路妹,伯衡,家媛,孖生嫁佢地,而家係英國讀緊書。」
「依個二嫂呀?我叫仲衡呀!Hello!」
「Hello!二嫂,我叫家媛呀!」
「終於返來咩?」一把令我敬畏既聲音由樓上傳來...




「爹地!媽咪!依個阿珊,我女朋友!」
「子浩呢?仲玩緊燈籠?叫佢過來食飯喇!」媽咪問容姨。
「子浩係我大哥七歲既仔。」我同阿珊講。
「依個就係你女朋友呀?唔使怕醜,跟伯權一樣叫我媽咪得喇!」媽咪已經捉住阿珊隻手仲帶佢去飯廳,而飯枱擺左八餸一湯。
「唔好客氣,家常便飯來渣...」
坐低之後,我問阿珊:「想食咩?有豉油雞,魚喇,排骨喇...」
「試下啲雞,我整左成日,好入味嫁!」媽咪插把口。
「啊!媽咪記唔記得細個食過碟咕嚕肉,跟住問個廚點整既,原來個廚係阿珊爸爸。」
「係咩!咁要見下你爸爸交流下喇!」
飯局氣氛都幾熱鬧,話題都係大家近一年既事,有講有笑,而依種感覺令我好似無離開過屋企咁,或者依種就係家既感覺,無論大家分開幾遠,發生過咩事,但大家個心依然連埋一齊...




「權,上來我書房,我同你有野傾。」飯局完後,大哥有野同我傾,我知道咩事...
「喂...你地幫我睇住阿珊,唔好蝦佢丫!」我同伯衡講。
「放心喎,我地會睇住二嫂嫁喇!」
於是,我就同大哥行去樓上書房...
「坐喇!我諗你都估到傾咩喇,關於你個project我交左俾公司既顧問,而佢地得出既答案係...」
同大哥傾完之後,我就揸車送阿珊返屋企。
「做咩陰陰咀咁笑?」我問佢。
「無呀...你開車啦,唔使理我喎!」
「唔使理你?嘿...嘿...哈哈哈...哈哈哈...」
「你做咩係度傻笑呀?痴左呀?」
「睇見你忍笑個樣好衰...忍唔住...哈哈哈...」
「你正經啲揸車啦!」
「好好好...」
年零後我問返伯衡,原來個衰仔同家媛係咁二嫂二媛叫阿珊,就連媽咪都叫佢家嫂玩埋一份,逗得佢鬼咁開心...
然而,最令我記得係大哥同我講既一段話:




「我知你肯改變都係為左佢,而佢已經係你個世界既中心,所以你要努力,為左佢...」