那夜,我在老蘭狩獵了天使: 第五章

果晚我特別早訓(因為唔想錯過聽日既約會),唔知係唔係太興奮,成晚都訓唔著,成晚諗起佢既聲音,諗起佢既微笑,諗起佢既身材(壞習慣...),諗下諗下,連夢都諗起佢,第二朝起身,咦?檢查下條褲...好彩無野(點會連續兩晚都有丫...)。跟手沖涼換衫,著得靚靚咁迎接我與她第一個一齊食既早餐。
到左冰室門口,禁啱阿珊又到左,唔通真係心靈相通?
「早晨,阿珊!」
「早晨,阿Ken!」太好喇!佢記得我個名...
「入去喇!小心...」我地又坐返第一次相遇個張枱度,我問:「食咩呀?」
「唔!我食左野,我飲茶走得喇。」
「哦,唔該一個A餐,兩柸茶走!」
「唔係走茶咩?」又係尋日串我個待應,而阿珊又露出殺死人既微笑。
跟住我地一路食一路傾,傾下大家工作既野,傾大家既興趣,傾大家既理想...
「唔!差唔多係時候返工喇!」佢摸摸隻表同我講。




「嗯...呢餐等我來,我送你返工丫!」
「你唔使返工咩?」
「我個位好自由架,幾時返都得...」老實講連我自己都唔知係唔係有我個位,我根本無返過公司一次...
「咁好喇...」
我地行左大約半個鐘左右,就到佢返工既社區中心。
「好喇,我到喇...」依刻我真係想咀佢個咀,但我知我唔可以咁心急驚嚇親佢重衰,於是我講:「你收幾點?我過來接你丫...」
「唔...我收六點,不過有時未必咁準時嫁,你要等下...」講完怕醜咁低頭,跟住轉身入去。
「好!六點,我係度等你,不見不散...」
就係咁,依幾日我地就過著一齊食早餐,我送佢返工,接佢收工返屋企(係佢屋企,當然我最想係我屋企喇,嘻嘻...)。但問題來了,我感覺我地似朋友多啲,有時我想進一步既時候,阿珊好似有意無意咁迴避,或者係我多心,或者係我怕醜,但我覺得係一個問題,咁唯有請教專家Patrick...
於是,約左Patrick星期五晚係老蘭S吧等。一去到,Patrick又用佢最拿手既魔術溝女。見佢表演得起勁,都唔打擾佢,坐埋一邊等佢表演完先。正當我想嗌酒時,突然有人好大聲嗌我...




「Ken!」係烏鴉,見佢怒氣沖沖咁,一支箭咁向我方向行過來,我估多數同我溝阿珊有關...
「Ken!你要玩既,唔好搞我個妹!」
「你冷靜啲聽我講!我認真架!係玩都唔玩你個妹...」我未講完,我左面已經中左拳,由於無預過佢會出手,我成個跌左落地(正常來講我無咁渣既)...
「你咁既樣仲話認真?」唉...雖然我自問個樣係有少少衰(係少少),但點解次次我話認真既時候全世界都無人信我架?
「個傻女好純,好易相信人,好易動感情,我唔想佢又再被人呃啊!」
相比烏鴉喊晒口個樣,佢個句「我唔想佢又再被人呃啊!」更令我震撼...
「又再」?咁即係話阿珊之前被人呃過?傷害過?