港大七不思議食女事件: 38. 過洋

38. 過洋
 
「三點即刻落船，靚仔，買船飛呢便……」上環信德中心，中年落魄小混混為咗兩餐，不斷兜搭我買飛。
 
我幫襯大叔買咗兩張去澳門嘅船飛，收埋一張喺褲袋，擰轉頭同牧子講：「個阿叔話好多大陸佬過澳門賭錢，啲船爆晒，所以我淨係買得一張飛。如果我有多一張船飛，你……」
 
「你會唔會同我一齊走呀？」牧子瞇著眼，笑吟吟咁接咗落去。
 
我大喜過望，錫咗佢額頭一啖，獎勵佢嘅善解人意。
 




「會呀，行啦，大導演、大文豪。」佢就拖咗我隻手，上咗船，駛進幸福嘅海洋。
 
對上一次過澳門，我只不過得幾歲，當時仲有快達船呢回事。廿年之後，快達船下層地毯嘅霉霉爛爛，同埋船上嘅老虎機，我到而家仲記憶猶新。
 
「歡迎各位乘搭噴射飛航，我地嘅目的地，係澳門外港客運碼頭……」
 
「做咩咁好興致，無啦啦帶我去澳門？」牧子小鳥依人，挨起我膊頭問道。
 
「澳門係故事嘅起點。」搭唔慣船嘅我，鬼拍後尾枕，暈吓暈吓，一時講錯說話。
 




「吓？你澳門出世架咩？」
 
「唔係。我老豆喺澳門過嚟，成日講番以前澳門嘅嘢，所以我想帶你去睇吓，順手逃離呢個城市。」
 
(再逃離不斷打畀我嘅阿予。)
 
好彩我老豆生得我才思敏捷，有賈寶玉七分俊俏之餘，還有三國賈詡嘅智計，不致於將當日喺諾士佛台，Raymond同野狼所講嘅「澳門桑拿Grad Trip」向牧子透露半句。
 
澳門，關愛基金，牧子，野狼，阿Yan，阿予，花柳，牧子，澳門。呢短短個零月發生嘅事，彷彿被噴射船嘅劇烈搖晃，一次過喺腦海倒晒出嚟。
 




我輕掃牧子嘅短髮，驚覺人生就好似玩大富翁一樣，我一擇骰，抽中「細佬誤割包皮」呢張機會咭，就帶同故人牧子，回到澳門呢個起點。摸住冇咗幾舊水嘅荷包，我好希望賭王會著到大富翁阿伯咁，喺碼頭畀番兩舊水我。
 
「澳門對你嚟講，有咩咁特別？」牧子嘅問題，將我拉番去現實。
 
「我對上一次去澳門，仲讀緊幼稚園，因為一提起澳門呢兩個字，我阿媽就會好唔開心，塊面黑足幾日……」
 
「點解嘅？有咩故仔聽？」
 
「一陣去到，我就話你知。畀個袋我，我想嘔……」
 
牧子連忙將嘔吐袋打開，放喺我前面，拎紙巾出嚟，將我咀角嘅白沬抹去。
 
「唔該晒你，你對我真係好。」我挨喺牧子身邊，噴射船上下抖動，彷彿去嘅唔係澳門，係去極東蓬萊仙山。
 
窗外煙雨迷濛，雨點忽化作子彈，打破玻璃，喺我身邊擦過。




 
我張開眼，只見阿予同葡萄牙航海家麥哲倫，喺甲板上膛。
 
「Atirar com rifle！Atirar com rifle！轟落去！轟落去！」麥哲倫以葡文同廣東話吆喝，命令阿予射穿我呢個負心漢。
 
突然之間，賓妹喺暗處撲出嚟，撲倒咗麥哲倫，令到佢枝火槍走火，轟中咗自己；但係阿予嘅子彈劃破長空，中正我額頭。彌留之時，牧子同賓妹伴屍啼哭，我口中喃喃自語：「渡輪引擎轟隆在轉，濕瀝的情感跳進海裡去，打碎了水中的月亮。」
 
濕瀝的情感……
 
濕瀝的情感……
 
濕瀝的情感……
 
濕瀝的情感……
 




我又醒了。
 
「你啱啱發夢，係咁雨雨雨，傻咗呀？未見過落雨呀？」牧子一邊摸我嘅額頭，一邊安慰我。
 
「冇咩，尋日知道要見你，緊張得濟，冇訓過覺嘛……」諗起阿予，我又唯有敷衍過去。
 
落船之後，我幾經辛苦，終於同牧子截到部的士，徑往白鴿巢公園駛去。
 
白鴿巢公園榕樹參天。去到門口，買咗包龍鬚糖，一路食住，我就一路同牧子講：「呢個公園，我想嚟好耐架喇。馬禮遜都葬喺呢到，嗱，你睇吓個門口，李小龍當年套『精武門』都喺到拍，一腳踢爛咗『華人與狗不得內進』嘅牌』。」
 
「唔係搭幾百蚊船，就係嚟睇個墓，食龍鬚糖呀嘛？嗱，我今晚唔會同你過夜，過夜都唔會同你搞嘢，費時你太易得到我，當我係鍾無豔呀。」牧子雖口裡說不，但係依經拎起紙巾，幫我抹咀邊龍鬚糖嘅粉。
 
「想同你扑嘢，就唔搭船，直接帶你去百佳算啦。我而家個人唔同咗，屌感情，唔屌西架喇。」
 
於是，我就帶住牧子，一路往公園深處走去，一路講咗個蕩氣迴腸嘅故事佢聽。




 
西洋鬼帝國寂寞餘暉，葡萄牙最後殖民地，不曾投降予西班牙人嘅「天主聖名之城」。一個鐘之後，短髮牧子，會因為呢個梳打埠故事，喺逝水如斯嘅生命，永遠記得呢一個比瑪嘉烈葡撻還要甜嘅澳葡秋午。