港大七不思議食女事件: 23. 生活
23. 生活
上回講到，無眠嘅晚上，牧子帶淚來電。
「我老豆賭輸錢，發酒瘟，又打我同我個媽，我真係唔想再見到呢個人。」
牧子向來都好孝順佢老母。同我傾計嘅時候，佢周不時都提及佢老母一人打兩份工，供佢同佢個妹讀書；但係，山大尚稱呼佢老豆做「撚樣」，但牧子永遠都唔會提佢老豆。
「屋企日日家嘈屋翳，我真係好憎佢。我好想搬出嚟住，但真係冇朋友肯收留我。我想問，你屋企會唔會方便收留我幾日？等我搵到劏房租，或者有人肯收留我，我就會搬走架喇！我唔係收兵，我知你係好人，一定會幫到我。」
「你又知我係好人？」
「我對得男人多，我知道。」
我老豆長期喺大陸，細佬又住緊宿舍，但畢竟我屋企只係區區華富邨，兩房一廳，地方淺窄，要容納一個離家少女，須過我老母嗰關，並非易事。
「痴線架，無可能。」次日，我阿媽喺廚房一路塞住對耳聽收音機，一聽到我要帶條女番嚟訓，恰似有千里耳，一嘢轟落嚟，否決咗我。
「屋企好多錢呀？上次我Check你戶口，呢排你已經洗咗好多錢喇，屋企邊仲有錢畀你去溝女？仲要帶番嚟訓？俾你老豆知道實屌死你。」我阿媽一路剁豬肉，一路隨住菜刀嘅起伏，屌鳩佢個寶貝仔。
「我有幫人補習架，係搵唔多啫。你知而家啲嘢幾貴架啦，食個常餐都四十蚊……」我嘗試去抗辯，但係始終一日未搵錢，一日講嘢都係毫無說服力。
「睇吓？又買件新衫？你一個人得一個身體，著得落幾多件衫？」我老母雖然係好人，但係生活逼人，令佢冇辦法唔斤斤計較起上嚟。講煮飯，老母已經好耐無煮佢拿手嘅菜心炒牛肉，理由好簡單，因為牛肉好貴，佢唔捨得買。
身為少爺脾氣嘅浪子，我相信「千金散盡還復來」，買件衫同舊牛肉咁小事都要咗度右度，計呢樣計嗰樣，我真係好希望我已經港大畢業，搵到份好工，令我可以隨心所欲，幫輕吓阿媽同埋身邊嘅人。
然而，我仲日日係薄扶林求學問道，GPA唔上唔落，追趕讀唔完嘅Readings。面對未知嘅將來，身為準畢業生，我上下求索，茫無頭緒，完全不知來年今日，自己會所在何地。所以，我好矛盾，既想盡快畢業，又留戀大學生活，做一個長唔大嘅浪子。
翌日下午，五點五十分。我趕喺下午茶時段完結前，喺茶記食只得四舊牛肉嘅乾炒牛河。
「你問吓你啲公子哥兒朋友，睇吓有冇辦法幫吓你個囡囡啦衰仔。」我媽呢句說話，好似牧子嘅短髮一樣，喺我腦海中徘徊不去。
我厚住面皮，喺「HKU WOLFPACK」呢個Whatsapp group 入面，向野狼同Raymond求救。
「我有個女仔朋友，屋企有啲事，你地屋企方唔方便，可以幫手收留一吓佢幾日？」
「Marvin哥，邊條女呀？唔係賓妹被事頭炒咗呀嘛？」野狼依然恥笑緊我屌過賓妹。
「你唔好問，係兄弟嘅，就借住間屋嚟用住先。Raymond，你阿爺早輪去咗，唔係留咗間公屋畀你咩？借嚟住住先得唔得？」
「Okay嘅，你唔介意我阿爺半夜返嚟睇你un女，你咪拎去駛囉。但係，係邊條女先？」Raymond答道。
「係牧子。」 「個名好熟，係咪嗰隻援交妹妹？你真係大情聖。唔駛講嘢，聽日拎條鎖匙畀你。」 正所謂物以類聚，人以群分，如果我係Salvador Dalí，野狼同Raymond一定係Man Ray同Luis Buñuel。佢地兩個覺得沉船呢件咁超現實嘅事，竟然覺得好似吃喝拉睡一般平常，並無追問落去。
我問Raymond拎咗條匙，第二日將佢畀咗牧子，幫佢拎齊行李，準備上Raymond阿爺嘅屋企。
搬入去嗰日，我只不過係第二次見呢個短髮女仔。
縱然我知道呢個短髮美女，只會好似無根嘅浮萍一樣，喺我生活飄泊而過，泛起半分漣漪，終究復歸平靜，但係唔知點解，我竟然盡晒力幫佢，甚至連真名都話咗畀佢知，嫖牧子嘅係麥可，喜歡牧子嘅，係Marvin。
牧子挽住我嘅手，上咗Raymond屋企，估唔到嘅係，呢間狹小公屋，居然成為咗我嘅離宮，為我無事可記嘅大學生活，又添上一筆絢爛綺妮嘅色彩。