港大七不思議食女事件: 4. 入宿

4.入宿
 
組媽 Carol嘅感情好快告一段落，除咗周不時打吓友誼波之外，生命鮮有交集，令人唏噓。有人話，冇住過宿舍，大學就等如白讀。於是，我喺一年級上學期就入住咗一間男女混合宿舍，展開大學生活新篇章。
                                       
搬去宿舍當日，阿媽由屋企陪我去樓下巴士站，目送我拖住行李，轉身上車。臨行之際，阿媽講：「住宿舍，唔好掛住玩，要畀心機讀書呀，知唔知呀邦邦？」
 
巴士緩緩駛離華富邨。我望住媽媽背影，忽覺佢老咗好多，自己亦不再係小孩子。我居窮已久，甚少離家，媽媽向來照顧我起居飲食無微不至，一想到佢煮完飯，抆完橙冇人食，不禁鼻頭一酸，淚眼潸潸。我同自己講，唔要白繳宿費，要努力讀書，主場征戰，慳番爆房錢。
 
中午陽光明媚，我拉住一袋二袋，終於嚟到宿舍。去到自己所住樓層，就見到幾個惡形惡相嘅大仙喺客廳鋤大弟。
 




其中一個生得比較似張達明嘅大仙，行埋嚟同我握手：「喂，你Late come[1]嚟架？未見過你嘅，係咪住614號房？我叫速龍。」
 
「係，我叫Marvin，BA Year1，多多指教。」
 
「你Roommate好潛架，成日淨係識讀書。唔好學佢，要搏盡呀，知唔知？見你骨格精奇，嗱，我地半個鐘之後落Stanley Ho[2]練波，過嚟跟我玩Lacrosse啦。」速龍一邊Cradle，一邊說。
 
我隨口答應，就行返房。一推開門，只見房另一邊，有個長髮油頭毒撚，架住一副厚厚眼鏡嘅男仔，身材矮小，對住電腦，左滑鼠，右賓周，起勢打飛機。毒撚見到我，企起身，不慌不忙收起小弟弟，行去我身邊，伸出右手，想同我握手：「Hi，我叫Wilson，Dental Year1。」
 
「我係Marvin，BA Year1。但我諗你可以洗咗手先。」呢個當口，我都顧唔到禮貌，拒絕去握佢打完飛機嘅手。
 




「我住咗喺到一個學期喇。對上一個同房讀Glaw，叫卡仔，住咗三個星期就忍唔住Quit咗。呢到好Chur[3]，好多人頂唔順Quit架。」
 
「係咩？而我不知卡仔是誰。」我心不在焉，只想盡快去搵速龍大仙打Lacrosse，完全沒有將小毒撚放在眼內。
 
「我都希望你住耐啲，等我有個伴。」Wilson於我耳邊低聲道：「呢層樓啲人Hall性最強，全部有問題。有Hall性，就冇人性架喇。」
 
「係咩，係咩？」我隨口敷衍Wilson，換件衫，正想去會合速龍大仙。
 
「唉……」Wilson見我反應冷淡，顯得頗失望，低聲沉吟道：「如果卡仔喺到，就好喇，佢最敢於對抗大仙……」
 




Lacrosse訓練艱苦但有趣，幸我運動了得，六舊腹肌，體能上尚跟得上大隊，但投球技巧，就得再下苦工。球場之上，速龍大仙見我訓練用心，不停誇讚我：「Marvin有前途，睇好你下年做Teamcap[4]，帶我地Recapture[5]呀！」
 
運動固然有趣，但相對就犧牲不少讀書時間。我投放大量時間於運動之上，無暇兼顧學業。有時諗起媽媽同我講「要畀心機讀書呀仔」，就十分內疚。書又冇讀，女又食唔到，住宿舍究竟為咩呢？
 
有一次，我為咗Mid-term，同速龍大仙講要缺席一課練習，我天真地以為，同佢平時有講有笑，我練波又落力，缺席一課半課必無問題。點知，佢竟然仙鳩我：「你知唔知咩叫Time Management？成隊波得你一個要溫書？平時你又唔溫？個個都同我講唔得閒，咁唔駛練波啦，仲學咩人講Recapture呀？你自己反省下啦。」
 
仙[6]鳩我。
 
我好嬲，好撚嬲，即刻返入房。我當你樓兄弟，你只當我係練波嘅工具，咁樣住落去，真係冇意思。
 
Wilson溫溫吓書，見我黑晒面，就問我：「被人仙呀？話咗你架喇。係咪速龍呀？佢出名Hall性強、仙氣盛，最鍾意仙人架。」我點點頭。
 
「屌，算啦，之前我同房卡仔都係被佢仙走。」
 
「之前咩事呀？」




 
終於有人同佢講嘢，寂寞嘅Wilson好高興，一五一十將卡仔嘅故事話畀我知。
 
 
 
 
 
 
 
  [1] Late Come：指未曾參加宿舍迎新營之宿生。不過OCamp者，沒有資格成為「仙」[2] Stanley Ho：位於港大沙灣徑之運動場。[3] Chur：港大術語，指忙碌。[4]Teamcap：即Team Captain，隊長。[5] Recapture：舍堂術語，指重奪失落的冠軍。[6]仙：作動詞用，源自「Senior/Seniority」，指欺壓、教訓或提點新生。