曖昧，永遠都是一對男女最享受的過程。: 第二十九章

呀晴：「好多謝你今日陪我去玩」

在剛回到家時，收到呀晴傳來的whatsapp。

我：「唔好傻啦，應該係我多謝你先岩，多謝你係聖誕節都肯同我出去」

呀晴：「我仲要多謝你份聖誕禮物，同埋...借個膊頭比我挨xd」

我：「咁好唔好挨？」





呀晴：「麻麻地啦，你太瘦喇，不過都好過冇得挨既」

我：「唔好挨又會訓得著？」

呀晴：「咁...好挨囉...係喎，你拆左我比你份禮物未呀？」

我：「未呀，我岩岩先返到，你話返到屋企先比開黎睇丫嘛」

呀晴：「你會咁聽話？」





我：「點敢唔聽你話呀，我依家開黎睇先。」

說罷，我馬上拿出那個呀晴給我的紙袋，想著呀晴會送什麼禮物給我。

一拿出來，原來是一個雪人玩偶，而玩偶內有一大堆零食。

我：「個雪人...都幾得意丫」

呀晴：「你唔鍾意呀？」





我：「唔係呀，點會唔鍾意呢，你送架喎。」

呀晴：「入面啲野食呢，你記得食晒去喎，特登買比你架喎」

我：「咩意思？」

呀晴：「你咁瘦，食多啲野啦，唔係點再比個膊頭我挨？」

我：「係既係既，我一定會食晒去」

呀晴：「你訓未？」

我：「未呀，做咩？」

呀晴：「我想傾一陣電話，陪我傾得唔得？」





我還未回覆，就馬上收到呀晴我來電。

「我都未答你得唔得，你就打黎...」我說。

「咁...唔得？」

「咁又唔係，做咩無啦啦想傾電話？」

「你信唔信星座？」

「唔係好信。」

「我自己就覺得好準。你知唔知呀，原來巨蟹座呢，同處女座、天蠍座係戀愛上會特別合拍架。」





「點解你會信星座既，真係咁準咩？」

「但同時呢，又會有好多唔同既意見分歧，導致成日鬧交。」呀晴沒有理會我的問題，自顧自地說著。

「我都唔信，你同我講呢啲冇用架。」

「點解偏偏你要係天蠍座，而佢要係處女座...」她完全沒有理會我。

其實我不明白為何女生都總是這麼迷信，星座之間有著微妙的關係？即是你的出生時期可以影響到你未來的伴侶？多麼荒謬。

但為了保持和她有話題說下去，我馬上在網絡上找了幾個有星座戀愛有關的網站來看。

「原來你講緊既處女座，係呀智...」在此前我根本分不清在那時出生會是什麼星座。

天蠍座的我，巨蟹座的她，處女座的他。





我們之間確實是有著微妙的關係。

星座真的是這麼準確，還是只是巧合？