男人既定義, 唔係講你有幾歲: 第三節
十五歲就學食煙飲酒，我唔知而家呢個世代點睇，可能覺得係小兒科，但係對於當時既我黎講，已經係一個非常跳脫既行為。
我唔知去邊好，亦唔知到揸住包煙可以去邊到食，好自然咁，我就行左去我平時踢開波既球場。
當時既我好柒，中間分界，但係又怕俾學校捉我記缺點而唔敢留長頭髮，前蔭短到掂唔到眼眉，髮尾就剷高，再配上一副鵝蛋形既金絲眼鏡，而家睇返自己細個既相，其實我真係好似一個「龜頭」。
我坐響球場既看台位置，攞左包煙出黎諗緊點食。第一次食煙，原來冇想像中咁容易，點極支煙都唔著，我明明用火燒緊支煙，但係支煙就點極都燒唔起。我諗燒左有五秒到，煙紙點到著火我就立刻大力吸左一下，終於燃點成功。
聽人講第一次食煙會咳，我一早已經做足心理準備，吸左一口之後入肺再噴返出黎。「呼～」人生第一口煙就係咁樣食左，我冇咩太大感覺，只係心諗食煙就係咁戇鳩？點解咁無聊既事仲會有人食？
諗完唔夠兩秒就即刻覺得身體有變化，突然之間覺得好頭暈，仲要係暈到即刻要瞓低嗰種。我知道呢啲反應係食煙帶俾身體既變化，我於是瞓左響看台再不停咁食煙，等身體慢慢適應煙既味道。
食左兩三支煙之後，身體已經再冇不良反應，我於是開埋支已經俾太陽晒到熱晒既啤酒飲，「吊！好撚難飲！」我飲左一啖之後就大聲吊左出黎，對於一向飲開百事既我黎講，呢種苦味真係好難頂，而且好快我就已經臉紅耳赤醉醺醺，呢種感覺真係仲差過食煙。
我響球場坐左兩個鐘，食左差唔多半包煙，呢段時間係我一生人裡面最複雜既時間，好多事我唔識拆亦都唔識處理，我諗既全部都係大話同借口，諗緊用咩理由去呃老豆我被人退學，諗緊如果冇書讀屋企冇錢既話，我去做老麥人地請唔請，點知去到最後，我諗極都諗唔掂。
過左一陣，好多學生放學經過球場又或者黎踢波，但我冇走到，繼續坐左響到。
電視電影成日講，當有人唔見左既時候，最好既搵人方法就係去平時去開既地方搵佢，但其實我真係好想講，我而家響球場唔走，其實係好想人搵到我，我真係要避開其他人既話，又點會去返自己成日去既地方？
當時既年代冇手提電話，有既都係幾萬蚊一部既水壺，要搵一個人其實唔容易。其實我對自己已經冇咩信心，俾仆街仔阿揚屈完之後，我更加響到諗其實我係咪個人有問題，搞到佢要屈我唔屈其他人。
我唔識分咩叫做朋友，同我一齊玩一齊踢波既叫波友定朋友？我唔知，我只係好想有同學因為我既離開而出黎搵我，我真係好想搵個人同我傾訴。
話口未完，我生命中兩個最重要既朋友就響呢段時間出現，佢地係十八峰同吹水文。
簡單介紹一下，十八峰個老豆開報紙檔，佢成日攞咸書「十八伴」俾我地睇而得名；吹水文最叻就係吹水，佢話自己有女朋友，十三歲就打過茄輪扑過野，但其實我地根本就冇見過佢女朋友。
「你條撚樣做咩搞到咁撚大獲呀？」
「咪係囉！個個老師出晒黎搵你呀!嘩！你條仆街，仲學人食煙？」
唔駛出奇，中二既Band 1學生都有咸濕仔，都一樣會粗口爛舌。
兩個人用粗口同我打完招呼後，就坐左上黎，佢地攞起包煙，點火，好熟練咁就響我面前食起煙來。
「唔駛咁驚訝，我地一早就有食，不過冇話俾你知，廢事教壞你。而家咪幾好，第日可以一齊夾錢買煙食。」十八峰說。
「你件事成級既同學都有講，原來成件事只係一場誤會，其他人估壞學生有冇打茄輪，點知估估下就當真，仲四圍傳佢地打茄輪扑埋野，而家知道咩事，你俾人揼既事就唔駛再擔心啦！」吹水文也抽著煙道。
我苦笑了一下。
誤會，令我打柒仆街仔阿揚；
誤會，間接令我被退學，冇書讀。
自此，我領悟左一個道理。
做人，唔可以道聽途說，好多事我地未聽過未去理解，就貿然當真，冇去求証胡亂咁講會好容易令到自己做錯決定，而我正因為自己既愚昧而要承擔惡果。
出黎做野，我地成日收到投訴話前線同事做錯野，禮貌唔好，好多人咩都唔問就鬧同事，冇調查就一口咬定同事做錯野信晒個客講，其實呢個世界真係好多仆街鐘意屈人，我地唔多角度諗野同調查，咁好多同事就會無故食死貓，而你，亦唔會係一個受人尊重既經理。
「喂！食埋支煙好返去學校啦！」十八峰說。
「返學校？」
「緊係啦！你唔返諗住一世響到逃避呀？話唔定校長知道你俾人屈先失控而原諒你呢！」
的確，避得一時唔避得一世，自己做錯事我地要承擔要面對，逃避係懦弱既表現，對事情完全冇幫助，況且，事情發展到去呢個地步，我自己都好想有一個解脫。
我俾左包煙佢地之後，就行返去學校，我唔知道歉，主動要求留級有冇用，我呢一刻只係唔想被退學，唔讀書我真係唔知自己可以做乜。
行到學校，見到訓導主任一早已經響到等我。
「對唔住…..」我扮死狗道。
「唔駛講野，跟我去校長室先！」訓導主任一如以往的冷漠。
推開校長室大門，只見我父母一已經坐左響度面對住校長，佢地見到我入黎之後就即刻捉住我叫我同校長道歉。
「對唔住！」
校長企左起身，行到我身邊同我講：「庸材，我地已經知道點解你要打人，但打人就係唔啱，嗰位被打既同學身體受到好嚴重既傷害！今次既事嚴重損壞學校既聲譽，我冇辦法唔作出呢一個決定…….」
聽到呢度，我已經喊到豬頭咁，我仲記得眼淚流到完全遮住我自己既眼睛，眼前白濛濛一片，就好似我既將來咁一樣模糊，我喊得太犀利而透唔到氣，我立刻扯幾啖大氣希望自己可以平伏返少少，但我發現原來透大氣係冇咩用。
「校長！我求你！你俾次機會我個仔！」我阿爸佢大叫一聲，跪響地上面求校長。
我一生第一次，見到我阿爸因為自己既錯而跪響人地面前。
心好痛，真係好痛！
痛到我要用拳頭不停咁打自己個心口…….
***
寫到呢度，諗返往事，自己都忍唔住流左兩滴眼淚。
俾個面，小弟自揭瘡疤，只搏大家既一