男人既定義, 唔係講你有幾歲: 第一節
如果一個人有七十歲壽命既話，屈指一算，原來我已經行左人生既一半。
男人三十而立，四十而不惑，五十而知天命呢句說話講得冇錯，但其實我覺得自己真正變成男人既時候，唔係三十歲，而係二十五歲。
作為一個八十後，人生一開始條路已經唔易行，畢業冇耐就要經歷九七金融風暴，之後係沙士百業蕭條，跟住又到金融海嘯，彷彿整個人生就一直同危機及動盪共存。三十五歲，睇返自己有車有樓，我唔敢講自己成功，但至少同我理想既人生差距唔遠。
我仲記得細個既時候屋企好窮，窮到阿爸要周圍搵人借錢，仲要係借到人地驚嗰種。每次家庭聚會，阿爸既兄弟姊妹就會成日細細聲圍埋講我阿爸借錢既事，叔父怕我唔開心，又或者覺得我細而唔敢講俾我知，但其實係每一次佢地竊竊私語既時候，我都會覺得佢地響到講緊我同我阿爸。
被人背後討論既感覺唔好受，直到今時今日我仲記得叔父望住我既眼神，我唔識形容係負累定覺我地冇用，總之俾佢地望住，自己就好想搵個窿捐入去。
我成日諗，點解我阿爸阿媽咁冇用？同學中一已經有最新既遊戲機，Levi's 牛仔褲，playlord袋再加埋timberland帆船鞋，點解我咁窮，著既係yasaki波鞋，牛仔褲要著條假既Lea(正版為Lee）牛仔褲。
因為窮，我冇錢同同學出街；
因為窮，我返學冇錢食早餐午餐，每日用踢波去消磨時間，順道遮掩自己冇錢買野食既事實。
而因為咁，我既學業成績一落千丈，中二既時候更加係全班考第尾。我讀既係一間Band 1 中學，我呢類讀書唔成既學生，響老師同同學心目中就只係地底泥，同我玩啲優材生覺得根本上就係浪費時間。
到今時今日，我仲清楚記得被同學羞辱既經歷。有日上堂老師問我問題，點知有個同學叫阿揚就好大聲咁嘲笑講：「阿sir！你問個考第尾既又點會答到你問題？」當時既同學個個聽到都響到大笑，我其實好嬲，嬲到自己都覺得臉紅耳赤。
但我可以點？呢個係客觀事實，我的確係考第尾，俾同學笑我根本就冇還口之力，學校就好似迷你版既現實社會咁，讀書好就受萬人敬仰，讀書差就係垃圾。我問自己，點解我做人會做得咁樣衰，點解我因為讀書差就要俾人奚落，點解我俾人笑竟然毫無反擊既餘地。
我望住笑我既同學阿揚個樣，我發誓有機會既話，我一定會十倍奉還，我要努力讀書，下一次我要做笑佢嗰個人。
點知響我未發奮讀書既時候，阿揚又做左一啲事令到我第一次體會到咩叫做人性，係阿揚話我俾我知唔理你係咩人，男定女，幾多歲都好，去到危急關頭既時候，每個人都只係會理自己，冇道德可言。
我既年代，拍拖係一件大事，拖手仔已經受萬人敬仰，打茄輪更加可以話係一種劃時代既前衛行為，唔似而家既社會，見個面唔講咁多，扑左野先講。
當時中二，學校搞左個宿營，我唔記得係西貢定邊到，總之個營地有好多康樂設施俾同學玩，夜晚仲可以燒野食，當然去到深夜時份，個個同學都唔肯瞓覺，有啲人就圍埋傾計，有啲人就玩啤牌，而當中就有一對小情人響一邊卿卿我我。
呢對小情人，男既係壞學生，食煙跟黑社會，女既就係一個好學生，外表斯文，仲要係讀精英班。
咩年代都好，女仔都係鐘意壞男仔，就好似男人一樣，幾歲都好，都鐘意後生大波既女仔一樣。當時既呢對小情人響一角依泣，作為一條柒頭皮，呢個時候當然唔好多事，望多兩眼都怕俾人炳，所以我好聰明，一早就搵個位瞓覺。
之後個宿營都好順利完成，個個同學都玩到樂而忘返，點知過左幾日，壞學生就發晒脾氣咁響學校四圍吠，話有人唱佢地響宿營期間打茄輪，話如果搵到邊個人爆出黎既，就會吹雞打柒條友。
當時既我冇太為意，第一打茄輪其實只係一件小事，我其實一早已經懷疑佢地十五歲就已經扑過野；第二，我根本就沒講過，所以根本就唔駛驚，仲諗住湊下熱鬧食花生，睇下邊條友咁口疏俾人揼。
中午食完飯之後，我就如常咁返課室準備上堂，入到去已經見到壞學生同一班人響到圍住條仆街仔阿揚。
壞學生好兇狠咁質問：「你講！係邊個四圍唱我地既！」
仆街仔阿揚驚到瀨尿咁劑，佢耍手擰頭仲喊住咁話：「唔關我事架！係阿材講架！我咩都唔知！嗚…….」
當時既我腦袋一片空白，我唔知道俾咩反應好，我明明就冇做過，點解要屈我？我唔識處理亦唔知應該點做，衝出去否認既話，有冇人信我？肯定冇！我襯冇人發現我既存在，就立刻走左入廁所搵左個廁格匿埋，怕壞學生搵到我既話，會即刻打柒我。
我個心好亂，想即刻逃學返屋企，但我又怕行出去個廁格就會見到壞學生。
好亂，真係好亂！
上課鐘聲徐徐響起，由於壞學生同我唔係同一班既關係，我而家返課室理論上係叫做安全，於是我行返去課室上堂。行去課室既路好遙遠，我想時間可以停止，我唔想落堂之後俾人打，當時既我真係好撚驚，驚撚到想喊…….
行到課室，入到去老師仲未到，個個同學見到我就好似見鬼咁，唔想同我講野，怕我會連累佢地，感覺好奇怪，我個腦空白一片，睇住每個同學既嘴臉，我覺得真係好噁心，好醜惡。
我唔識分咩叫做朋友，又或者響我生命裡面，根本就從來未有過朋友。古惑仔陳浩南同山雞出生入死，原來現實生活，當你陷入困境既時候，根本就唔會有人幫你。
仆街仔阿揚響自己個位好熱心咁走出黎，佢一臉惶恐咁同我講：「阿材，你放學小心啲，壞學生話今日放學吹雞搵人揼柒你！」
我望住佢個樣，心諗點解一個人可以咁賤？將責任推落我身上，而之後又扮好人走黎同我講，叫我小心啲？我望住佢對眼，發現佢既眼神好閃縮，不停咁逃避我既目光。
當時我十五歲，響學校係地底泥，讀書唔成，老師更加係當我透明，當一個人去到絕望冇能力解決既時候，就只有訴諸暴力。
我已經再忍唔到呢種咁黑人憎既嘴臉，我用盡全身力氣一拳打落仆街仔隻左眼度大罵:「吊你老母！屈鳩我？」
「嘭！」仆街仔應聲倒地，佢掩住塊面響到大叫，我已經癲左幾近失控，我騎左上仆街仔個身上面，不停咁打佢，打到佢大叫救命。
好快，其他同學已經推開左我地，回過神既我發現雙手已經變得藍藍綠綠仲流晒血，手好痛，不過唔及我個心痛，因為我知道我響呢間學校既生活已經完結。