[短篇]不捨

話說有一男一女拍拖，男仔一個人住。

當時女仔係個學生，而男仔因為返夜班，
所以佢地每一次見面，都係個女仔趁屋企人訓晒之後，
再坐車去男仔屋企樓下同男仔食宵夜…

第一次上去男仔屋企，係因為實在太夜，商場都閂左門，
但真係好急，就上左男仔屋企借廁所。

男仔屋企好乾淨，好整齊，但係唔似一個男仔住咁樣，




男仔話，因為間屋係佢家姐買落既，所以係家姐決定咁樣裝修。

女仔叫自己唔好諗咁多，你愛一個人，就應該要信佢。

佢地開始左一段時間之後，女仔發現，男仔每一個週末都會失蹤，
唔使返工既日子，男仔唔會主動搵女仔，
女仔心裡面知道，其實發生緊乜野事，
但女仔同自己講，唔會既，唔好諗咁多…

直到有一日，男仔突然同女仔講，佢另外有一個女朋友。




之前同女仔開始果陣，個女朋友話佢無出色，所以要分手，
但女朋友後來又係出面碰左釘，又返返黎想翻兜。

因為係初戀，
因為唔捨得，
雖然成日嘈交，
就算好港女性格，
但係都一齊返。

女仔靜左一陣，問：咁我地係咪最後一次見面？




男仔話：你想呢…
女仔就話：咁我地唔再見會好D。
男：咁我送你去車站。

係車站，女仔攬左男仔一下。

就係呢一下，所有唔捨得既感覺突然間湧出黎，
就係咁樣，男仔同女仔，又拖左五年。

女仔知道，男仔心裡面有另一個更重要既人，自己唔可能爭得驘，
唔想被討厭，所以亦唔敢去爭。

係呢五年裡面，女仔偷睇過男仔電話一次，
因為想睇下，佢女朋友係點樣。
係街度見到差唔多款既女性，




都會覺得好大壓力，會避開…

唔敢去人多既地方，
唔敢去「女朋友」住既區域，
好怕會見到佢地，
唔知點面對。

直到有一日，男仔同女仔講：我下個月要結婚啦。

女仔心裡面知道，呢一日總會來臨。
女仔無太大既反應，或者應該講，係唔識得點去反應。

男仔再問：你…要唔要黎飲？
女仔問：我唔會封禮俾你，一係，你要唔要幫手？咁就係你封利是俾我，哈哈！
「嗯。」





男仔話，好想係婚禮果日俾D 驚喜老婆，要個女仔教男仔樂器…
剩返果一個月，每一日倒數，佢地每一日都見面…

女仔話：我真係好妒忌，佢可以得到你…

係呢個時候，男仔唔知係邊度拎左隻戒指出黎，
向女仔講：雖然我乜野都俾唔到你，但係，只要你願意，你都係我既…

到左婚禮果日，
女仔一整日都好忙咁幫手打點。
由朝早係教堂，直到婚宴差唔多完結，女仔係廁所門口撞到男仔。

男仔拍一拍女仔個頭，講左句：對唔住。





女仔已經忍唔住啦，
返左位坐低，一粒聲都無再出過，亦無再影相。

散席，女仔同左一個，
亦係席間唯一一個共同朋友同埋另一個完全唔識既人，去飲野。

果個唔識既人叫做明哥。

一坐低，明哥就話：得啦，你好叻架啦，唔使再忍!
然後女仔眼淚開始湧出來，喊左出黎。
可能飲左酒既關係，越喊越過份，可能係成年後唯一一次喊成咁樣…

其實係婚後，都維持左兩年咁樣既關係…
直到一場好無謂既交，男仔趁女仔出差既時候，女仔打長途電話回去時講分手。
或者咁樣，唔能立刻見面修補，硬頸既女仔先無得唔放手。





果一日，女仔係FACEBOOK上寫住，
佢將果隻戒指係一個好高既地方掉左落去…

講分手既最後一句，男仔話：無左我你會過得幸福D，你一定要過得幸福。