《每個人點都要食一次檸檬》: 相遇

本身仲諗住話同隔離果個fd d，之後係班度都會好玩d，點知原來咁難搞...自從果次對話之後，我地呢幾日都無再講過野。有好幾次我見佢好似都欲言又止咁，好似想同我講野咁，但又無開到口。開左學差唔多一個禮拜，但差唔多我每日放學都同雄仔一齊放學。開學都放早，無咩好擔心，未上堂，日日就係玩，其實時間過得好快，但又好開心。「喂，雄仔，你隔離同邊個坐呀?」我同佢係學校附近食埋野先返屋企。小學雞升上中學既lunch，都係老M架啦。「無呀，同個女仔坐囉。」佢一邊咬住條薯條一邊講。「點呀點呀?同個女仔相處成點?」我好好奇咁追問佢。「佢幾nice呀，同我又幾岩傾，我地成日都吹水既。」佢憶起佢地既回憶，好似好開心咁。我都想同隔離果個咁樣。我唔明囉﹗明明我小學既時候，坐我隔離既女仔，都同我好投契架，點解依個會咁搞架!?「你呢迪迪仔?」雄仔佢食完包薯條啦，開始食盒脆香雞翼。真係識食一定係食脆香雞翼，因為我超鐘意食呢個餐，我都食緊。「唉...」我嘆一口氣，開始吐我既苦水，「呢條女好難搞呀，唔理我咁，都唔知搞咩。」「下?」佢有點驚訝，「識左無耐炸喎，佢會唔會係怕羞炸?鐘意你炸掛?」「點會呀?」我一臉懷疑，但係又唔排除呢個可能喎。「正唔正既先?」佢講到重點啦，無非都係想知呢d野既姐。「唔算啦，正正常常咁啦。」「但係婷婷就正啦!!!!講起都扯扯地。」果陣時既男仔，好多小五小六就打飛機啦。第二日，返到學已經係要上堂。一到上堂，d氣氛已經唔同曬，同之前輕鬆既氣氛唔同左，變得嚴肅得多。大家都好認真咁上堂，聽書既聽書，抄筆記既抄筆記。就連婷婷都無同隔果個俊鋒傾計，全神貫注咁聽書。都係一件好事黎既，等我有動力咁讀下書。西西就同之前無咩分別，無咩點理我。咁既然上緊堂囉，就無謂撩人地傾計啦。到左小息啦喎，更加唔洗講，因為我會走去揾其他人玩，而唔會理佢。我諗緊點樣先可以接觸下婷婷，但我見佢已經同一班女玩得好埋，但班女一睇就知係八婆。通常靚女身邊，總有一個八婆係左近。你唔覺係因為你唔知，但唔代表呢條八婆唔存在。