無品神探: 第十九節
深水埗。合和茶餐廳坐到好爆下，啲伙記做到踢曬手腳。
「黐撚線，個有錢女而家霸咗我屋企住。叫咩話？妹仔大過主人婆？」岑世英大吐苦水。
「哈哈哈，有人居然肯住你個狗竇，你應該要還神啦。」張德明笑住講，轉頭向侍應落單：「喂，啊…菜遠牛肉飯。凍奶茶。」
侍應走過黎抄單。
岑世英撓撓頭，講：「火腩飯，凍啡。」
「唉，屌你老味你唔撚明架啦。」岑世英托住頭，死氣沉沉。「諗住等佢過黎，安撫下個有錢女，等遲啲收多啲錢。點知佢霸咗我間屋，趕我出我間屋。我間屋喎！我架喎！」愈講愈憤憤不平。
「哈哈哈，人地都講，請佛容易送佛難嘛。更何況人地係關誠天個女？」張德明笑得好開心。「你搞咩搞到畀人趕出黎？」
岑世英嘆咗口氣，講：「我只係問咗佢男朋友有冇一個習慣。」
張德明反問：「咩習慣？打飛機？定去滾？」
岑世英睥咗對方一眼，冷冷講一句：「你估係你咩？虧你仲講得出笑，兄弟而家無家可歸！」
「得啦屌，好快就過架啦。」張德明拍拍岑世英膊頭。「話時話，係咩習慣？」
岑世英等侍應上完菜，先細細聲講：「我問佢，佢男朋友有冇吸毒。」講完，佢拎杯凍啡喺度飲。
「咁九唔搭八嘅？」馮德明眨眨眼，個樣好疑惑，問：「點解咁問？」
岑世英食啖飯，壓低聲音講：「我搵到嗰毒販，佢知道廖家豪一啲野，但唔肯講。我想知道，個毒販同廖家豪有咩關係。知道咗應該可以幫我搵廖家豪。」
馮德明聽完點點頭，低頭食啖飯。
「喂。係喎，阿英。你條死仔又話幫我查案嘅？」馮德明突然諗番起自己黎嘅目的。
岑世英一早將呢單無酬嘅案件，忘記得一乾二淨。咁都好正常，一單係人情，另一單係幫有錢女做野，咁有先後次序，都好正常姐。佢撓撓個頭，苦笑：「哈哈，查緊架啦，阿明。」
「屌你啦，識你咁多年，仲唔知你咩？」馮德明完全唔客氣。「睇你個衰樣，肯定連單案嘅資料都拎咗去墊臺腳！」
「哈哈，哈哈。」岑世英一路撓頭，用苦笑黎掩飾尷尬。
「仲記唔記得，我之前話過，長洲一向冇乜野，只係有啲人失蹤？」馮德明表情轉得嚴肅。
岑世英咬住支吸管：「嗯？好似係。」
「呢排又多一單失蹤，係個MK妹。我開始覺得有啲唔單純。」馮德明講。
「又黎警察嘅直覺？」岑世英語帶相譏。
「我之前同你講喺長洲搵到條屍。再加上MK妹失蹤事件，可能有關係。」馮德明講。
「不過，可能只係我諗多咗。我亦理唔到咁多，手頭上都唔少野要查。」馮德明飲啖凍奶茶，講：「咁你下一步想點？」
岑世英諗咗陣，先講：「查嗰條販。我覺得最正路都係咁。」
等咗陣，岑世英講：「你單案，我會睇下。不過唔擔保咩。」
「得啦，你小心啲。」馮德明講。
「你都係。」岑世英講。佢諗起自己就係喺長洲畀「人」襲擊，心入面派現一絲不安感，但佢將想講嘅野又吞番落肚。
岑世英心入面，漸漸覺得佢愈黎愈接近案件嘅真相。
*************************************************************************
明愛醫院。病房出面。
岑世英無家可歸，間屋畀人霸咗，戇居居唔知去邊，於是番去睇下佢保鑣阿強同佢阿媽。
岑世英見到坐喺出面嘅阿強：「喂。你點？」
阿強眼神有啲浮腫：「冇咩。」
岑世英反問：「喂，隻眼咁撚樣都話冇咩野？」
佢望咗望病房，問阿強：「你阿媽…做完手術？」
阿強點點頭。
「咁走。」岑世英指指門口講。
「走去邊？」阿強有啲愕然。
「做野囉。」岑世英望番阿強。「香港人，唔使返工呀？」
阿強冇出聲。
「你阿媽都需要休息。橫掂你而家都做唔到啲咩，倒不如跟我做啲正經野。」岑世英講。「何況，我都需要有個保鑣。前排你大佬我先畀『人』斬，而家背脊仲有勁大個刀疤，搞唔掂遲啲命仔都冇埋。」
「大佬，你嗰啲都唔算正經野…行行企企收收保護費…」阿強抗議。
岑世英一野敲落阿強個頭：「大佬都夠膽駁嘴？」
佢壓低聲音：「而家我地去查一個人，佢一定同廖家豪有關係。」
*************************************************************************
海灣新邨。毒販喪榮嘅屋企出面。
岑世英做個手勢：「殊。」
阿強屏息靜氣，點點頭。
岑世英同阿強觀察住喪榮嘅門口。喪榮都幾低調，以佢嘅身家，要住上豪宅都唔係問題。
喪榮屋企道門突然打開咗。
岑世英即刻同佢保鑣縮埋一邊，匿喺走廊嘅凹位。
一個人從喪榮屋企行咗出黎，一頭短髮、精明嘅男人。
正正係陳耀華。佢面無表情，實在睇唔出佢頭先喺喪榮屋企做咗咩。
岑世英見到陳耀華行出黎，心諗：「屌！又係你？老是常出現！你黎呢度搞咩？係咪你收埋咗廖家豪，而家唔畀喪榮講出黎？」
等陳耀華走咗之後，喪榮屋企道門又打開咗。
阿強同佢大佬啱啱想從凹位行出黎，點知喪榮屋企又行一個人出黎，佢地又即刻縮埋一邊。
一頭紫色嘅頭髮，係毒販喪榮。
等喪榮走咗，阿強細細聲問：「大佬，係咪要跟佢？」
岑世英壓低聲音講：「你去跟。」
阿強點點頭，然後跟住喪榮走咗。
「好。」岑世英同自己講，喺褲袋拎出個萬字夾，然後扭開萬字夾，隊佢入鎖匙窿。
佢拎住萬字夾左扭扭、右扭扭。「咔擦。」冇幾耐就扭開咗個鎖。
岑世英深呼吸一下，推開門，走入喪榮間屋。佢閂番道門，開始搵線索。
佢將個櫃嘅櫃桶逐格逐格開始搵。個喪榮同一般人冇咩唔同，屋企都係多垃圾。不過佢正職做設計師，當然要講究下啲室內設計，所以將啲雜七雜八嘅野收曬入櫃桶。
「龐！」喪榮屋企道門突然打開咗。
岑世英喺心入面自言自語：「仆你個臭街做乜野？」即刻匿入隔離個衣櫃。
映入眼嘅係一頭紫色頭髮：喪榮。
喪榮表情陰沉，一言不發。佢慢慢行入黎，望咗望道門。
岑世英從衣櫃偷偷望出去，心諗：「做咩？佢唔通發現咗我？」
喪榮突然望向岑世英匿埋嘅嗰個衣櫃，開始慢慢行過黎。
岑世英睇到眼都大，心諗：「仆街。」
喪榮愈黎愈近。
岑世英流冷汗，佢開始閉氣，仔細望住喪榮一舉一動。
喪榮喺地下拎咗支鐵通，又慢慢行向衣櫃。
岑世英喺心入面講無數個「屌」字。
喪榮左手放到衣櫃門度，右手拎住支鐵通，同岑世英相差只有幾釐米嘅距離。
「彭！」