【夢幻】《我從來冇諗過我會有咁正既女朋友》: 海洋公園
「你係咪好想去海洋公園姐！連發夢比賽既獎品都係海洋公園入場飛！」敏兒用搞笑既語氣咁問我。
其實由岩岩起身見到敏兒變返正常好似平時咁我就已經覺得好奇怪....
有咩可能敏兒訓完教一起身就好似今日既事完全冇發生過一樣咁....
如果敏兒佢一教訓醒又真係可以平靜到落黎，做返平時笑面迎人既佢的話，咁樣會係一件好事黎... 但我只係擔憂緊敏兒係因為怕我擔心佢，所以先一訓醒就扮哂好似已經咩事都冇咁...
呢一刻既我覺得敏兒係靠咁樣捱過左爸爸離開左佢生活果一段痛苦既時間同埋接受呢一個殘酷既事實....
不過我都唔想表現出太過拘謹，所以都主動講返岩先既話題。
「講開又講，我都好耐未去過海洋公園喇！」其實本身都冇話特別想去，但比敏兒冇啦啦咁問起搞到我都好想去同敏兒去
瘋狂玩返轉！
「咁就一齊去啦！我都好耐冇去過喇！」敏兒主動提出一齊去海洋公園玩，咁我當然就立即應承架啦！
就係咁我地就約定左下星期放假一齊去海洋公園玩喇！
我好希望敏兒會因為同我之間有好多快樂既回憶，而慢慢淡忘佢過去既傷痛...
就算唔可以令佢忘記悲慘既過去，我都好想修補返之前對敏兒造成既心理陰影....
雖然我知道並唔係一時三刻可以做到既事...
但我相信只要一直起敏兒身邊陪伴佢，同佢一齊製造多啲快樂既時光，有一日佢一定可以走出陰霾。
而我所指係真正既釋懷，而唔係表面上既快樂。
雖然敏兒轉左新公司都有一段時間，但我好似真係未接過佢放工。
因為次次都係約起地鐵站等。唔得！搵日真係要接下敏兒放工，可能有機會撞到佢啲「男同事」，比佢地知道敏兒已經「名花有主」都好。
拿！講明先，我真係唔係信唔過敏兒啊！我只係唔想比其他人有假希望，到時令到佢地失望就唔係咁好意思啦！你懂的！
我地既感情都係一直維持住起同一種關係！加上敏兒既性格好就得人，所以我地都好少鬧交。
但有時我會起到諗，一般情侶唔係應該點都會有少少拗撬架咩！我地相處得咁好反而先有少少驚...
如果到時有咩大事發生，我唔知我地之間既感情會唔會變得原來比我想像中脆弱...
我諗而家好多人都想屌我話我犯賤！但人就係咁犯賤架啦！
不過我都係鳩噏下架姐！我緊係寧願好似而家咁都好過日日鬧交啦！
好快就到左星期六一齊去海洋公園既日子！
我地兩個約左起九龍塘站一齊搭車出發！
今日雖然係閒日，但都唔算話好多人！應該主要既原因係大陸冇假放，但園內自由行比例都重係佔左差唔多一半！
不過我地已經算好好彩架喇！
起碼可以暫時避過見到阿媽從後面好緊張行前去瘋狂搵仔，然後再順勢黎過360度轉變之排排下排左去你前面既超級膠但極之真實既情節！
一入到去海洋公園識玩既一定係搭左海洋列車上去玩左機動遊戲先架啦！
再由山頂玩返落山腳先爽架嘛！雖然山腳係冇野玩的....
我一入到去就緊係玩返轉「動感快車」先啦！
當我行到「動感快車」排隊位既時候，我旁邊既敏兒冇啦啦停低左企起道！
「做咩啊敏兒？你做咩停左起道唔行既？」
「一黎就玩啲咁刺激既野啊？我驚我會頂唔順喎！」敏兒應該都係第一次玩「動感快車」
「唔會架！好爽架！快啲行啦！」就係咁..敏兒起我半推半逼既底下上左架過山車..
「死啦！可唔可以唔玩架..好驚啊我..」當過山車啟動既時候，敏兒就一直捉實我隻手唔放。
「啊！好驚啊！救命啊！」無錯！起呢一分鐘入面，我就不停聽到敏兒係咁尖叫。
而起旁邊既我見到敏兒咁樣都忍唔住笑足全程！而敏兒佢就係「尖叫」足全程！
「終於停啦...雖然係好恐怖，但又真係幾好玩幾刺激。」我又點會估到敏兒唔係震哂口咁話以後都唔再玩，而係覺得幾好玩同刺激。
明明佢起車上面嗌哂救命架喎！好多時有好多野又真係估佢唔到！
一落到去就緊係睇返我地玩過山車時候影既相啦！
「嘩！哈哈！我好醜樣啊！唔想再望到，快啲行啦我地。」無錯！敏兒個樣直頭係「撚住左」，真係好搞笑。
起果一張相入面，佢已經由平時一向既女神形象一下子變左玩到連頭髮都亂哂既「癲雞」！
大家唔好屌我咁形容敏兒住先啦！我都未講完...
我想講既係...我從來都未見過咁靚既「癲雞」...
得啦...我知唔好笑啊嘛… 但敏兒果一張相真係炒哂車！
女神都可以有抄車相架！咁先真實架嘛！
我想講平時果啲「Ig女神」放左幾多心機落去影相加構圖，先營造到咁正既效果啊！
但講開又講其實我個樣都唔係話好得去邊...
張相影到我個樣好似成個傻仔咁擘大個口起到笑，個口重要係勁大...
想點先而家..即係逼我唔買姐而家！
不過其實我不嬲都係唔會買的...
但張相入面既我地，都係最真情流露。
我好希望敏兒可以將佢心入面既抑鬱嗌哂出黎。
但我都唔敢扮哂至理名言咁同佢講話...
人生就好似過山車咁有起有伏之類既說話...費事佢又諗返起佢爸爸同佢講過既說話啦....
跟住我地就行左去隔離玩我由細到大最鍾意玩既遊戲，就係「碰碰車」。 我同敏兒一人揸住一架碰碰車，一開始既時候我發覺敏兒真係完全唔識控制架車既方向，而我就不停跟住佢架車後面撞佢。
「喂啊！你唔好再追住黎撞我啦！你走去撞下其他人啦！」
「喂！我學識左啦！你咪走啊！我要撞返你啊！哈哈！」再次見到敏兒笑得咁開懷，我開始相信自己係有能力帶敏兒走出
陰霾。
「原來碰碰車係咁好玩架！我由細到大都未玩過啊！」果然比我估中左，原來敏兒佢真係未玩過碰碰車。
「哈哈！唔怪得你一開頭完全唔識控制架車啦！」我對我手車既技術感到十分之自豪。雖然只係揸碰碰車，但碰碰車都係車啊屌！
我地玩完碰碰車之後，敏兒冇啦啦提出想去睇企鵝。
「我好想入去睇企鵝啊！快啲行啦！」敏兒同我講過佢最鍾意既動物就係企鵝，所以佢都急不及待拉住我跑左入去睇企鵝
既展館！
「但點解呢到咁腥既...可能係因為沙甸魚！企鵝最鍾意就係食沙甸魚架喇！」敏兒就好似小朋友睇緊卡通片咁，講返果個動物既特性出黎一樣。
「嘩！你睇下佢地行路幾得意！！」敏兒一見到企鵝就好興奮，好似好想沖入去餵佢地食魚咁既樣。
「哈哈！我發覺你行路同企鵝又幾似喎！」敏兒用一個想「打我一拳」既眼神黎望住我笑
「你睇下！呢個企鵝家族好幸福啊！佢地一家四口都好可愛啊！」敏兒指住我地眼前既四隻企鵝
「你又知佢地係一家人？」
「唔知架！不過佢地一定係一家人黎架姐！」敏兒呢個答案就好似應該係，除非唔係一樣。
我終於明白點解敏兒一直咁渴望想組織一個家庭。
可能係因為...由一出世佢既家庭已經並不完整….
所以佢自己會好想擁有一個家庭...
敏兒想感受到既係家人之間既溫暖同埋一個小小的安樂窩。
但你居住起香港...想買樓真係難過登天，除非你好似志成咁「靠父幹」啦！
不過如果你冇得「靠父幹」的話...只好腳踏實地用半世人既時間不停工作去供樓啦！
但首先既係…你要有份首期。 我地起企鵝展館逗留左一段時間就出發去去左「山腰」玩！
因為我地兩個都好想一齊坐一次「摩天輪」。
我相信一提起「摩天輪」，好多人腦海裡都會主動浮現起一首歌。
無錯，就係陳奕迅 - 幸福摩天輪
天荒地老流連在摩天輪
在高處凝望世界流動
失落之處仍然會笑著哭
人間的跌盪 默默迎送
當生命似流連在摩天輪
幸福處隨時吻到星空
驚慄之處仍能與你互擁
彷彿遊戲之中 忘掉輕重
https://www.youtube.com/watch?v=1OpmIf5htMk
呢一首咁經典既歌曲，我相信好多人都有聽過。
但又有幾多人知道，其實呢一首並唔係一首情歌黎。
因為幸福摩天輪既故事中， 主角由始至終都係孤身一人。
雖然係咁，但我都相信起不同場合又或者不同心情底下唱出呢一首歌，
又有一番特別的感覺和不同的體會。
最重要都係歌詞能唔能夠表達到你果一刻既心情，而歌詞背後真正既意義又係咪真係咁重要呢？
就好似我同敏兒一樣，呢一刻既我地好享受同珍惜大家一齊既時光，但冇人知道將來會發生咩事。
好多野都係預測唔到，我地只可以活在當下，珍惜而家所擁有既一切。
當我同敏兒坐上摩天輪既一刻，隨著摩天輪向上升既轉動，係咪又真係可以好似歌詞所講
「天荒地老流連在摩天輪」
我唔知道...
但當摩天輪停留左起最高位置既一刻，我同敏兒黎一個深情的擁吻。
而家呢一刻既我只係知道，起半空中坐住摩天輪既我地過得好幸福。