《香港唔係追夢既地方》: Episode 17

Episode 17

我見到 Lok 咁樣，就即刻急 call 佢睇下佢發生咩事，最怕係⋯⋯

「昨日傍晚時份，有一名理大學生於家中跳樓身亡，連同呢一宗，已經係本港踏入今年度之後第十宗學生跳樓⋯⋯」新聞主播咁岩就播出呢段新聞，令我更加擔心 Lok 既安危。

我地四兄弟之中，只有 Lok 一個入到大學，當時仲幾替佢開心，仲話佢前途無限，仲讀到神科。以為入到大學就一天光曬，原來唔係。入大學，只係佢展開新一輪較勁既擂台⋯⋯

「唔通既！」我打左幾次畀 Lok，但係都唔通，點算好？





呢個時候，有個訊息傳左過來，係咪 Lok 呢？

【Tony，我好累，屋企人好煩⋯⋯唉。】唔係 Lok，但竟然係 Jimmy。不過而家我都唔得閒理佢住，要搵到 Lok 要緊！

-

我搵左 Chris、Sophie 仲有 Jamie 一齊商量，而 Aaron 知道左咁既事之後，亦都趕左過來。

「喂！搵唔搵到佢？」Aaron 走過來，好緊張咁問我地。





「未，仲未搵到。」我答佢。明明應該係老死，但唔知點解感覺好生疏，而 Chris 同 Aaron 明顯都仲係好尷尬。

「我從來未見過 Lok 咁樣⋯⋯」Chris 好擔心咁講。

「係⋯⋯上次一直都已經覺得佢古古怪怪，但又講唔出有咩唔妥⋯⋯」我都開始回想返上次見佢既時候，覺得佢春風滿面，實在有別於以前。

「或者佢只係發生左D野，所以想靜下？」Jamie 提出各樣既可能性，試圖令我地唔好咁擔心。

「係囉，我地再試下搵下佢，用多幾樣唔同既方法，或者就可以搵到佢呢？」Sophie 都嘗試令我地冷靜落來。





「咁喇，Jamie 同 Sophie 幫手負責繼續打畀佢，而我地三個就去佢屋企樓下等佢，好無？」我開始發號施令，分工合作。

「咁你地小心喇，唔好等到太夜！」Jamie 叮囑我。

-

以前我地四個都係住同一條屋村，所以先識到對方。但隨住時間既流逝、世界既變遷，好多野已經慢慢唔同左。地鐵變成港鐵、從前只有粵語同英文既地鐵廣播而家就再加多隻普通話、六點半新聞一定會例牌播國歌、然後再睇唔到肥姐主持既節目、聽唔到伍晃榮講「波，係圓既」。

而 Lok 都搬走左好耐，離我地既屋村好遠。我以為距離並唔係一個問題，但原來⋯⋯真正令我地疏遠既，可能係另一種無辦法量度既距離。

一代球王施丹都退役，再燦爛既星光都會暗淡。有時真係想講：叮噹可否不要老？

細個既時候，好希望可以長大，最開心睇到亞古獸進化，打低惡魔獸、吸血魔獸同小丑皇。好想睇住佢地變得越來越強，越來越唔同。

但人大左，反而唔再想變化，我地都中意安穩，明白到，變，其實未必係好事。





我忽然諗起寵物小精靈有一集，令我有好深刻印象。個集係講比卡超終於有機會可以進化成雷超，只要進化佢就可以打低敵人，贏到聖章。個陣小智諗左好耐，最後選擇比卡超唔進化。

個陣我驚訝左好耐，心諗：小智你傻架？有得進化你都唔比佢進化？

我一直都唔明白點解小智會咁諗，但長大之後，我先明白，如果我係小智，我都唔會想比卡超進化成雷超。

因為我中意既，永遠，永遠都只係個一隻比卡超。如果我地既人生都可以選擇，我都想選擇唔進化、唔長大，永遠做一隻無憂無慮既比卡超。

望住 Chris、Aaron，我先感歎原來歲月真係好無情，到底仲有幾多野係我地可以守護到？所以，無論點都好，我都會守護我每一個朋友、每一份友情。

「叮噹可否不要老 伴我長高
星矢可否不要老 伴我征討
孩子 即使早知真相那味道
卻想完美到 去違抗定數





偶像全部也不倒 爸媽以後也安好
最好我在意的 任何面容都 不會老

為何在遊蕩裡 在遊玩裡 突然便老去
談好一個事情 可以兌現時 你又已安睡
祈求舊人萬歲 舊情萬歲 別隨便老去
時光這個壞人 偏卻決絕如許
停留耐些 也不許」

-

我、Chris、Aaron 都到左 Lok 屋企門口，但佢屋企似乎無人。其實都唔出奇，因為以前 Lok 既屋企人都已經成日出去遠行⋯⋯

原來，Lok 一個人係屋企既時候，都係咁孤獨。





「去左邊？會唔會係 hall？」Chris 問。

「我地返返落去先，再睇下點，或者等夜少少會見到佢。」我仍然都想堅持落去。

於是我地三個就落左佢屋企樓下既小公園，坐低等佢。我地三個都無出聲，因為我地同 Aaron 之間，有一種無辦法解釋既鴻溝⋯⋯

「你聽朝係咪要返工？你走喇一係，我地等得喇。」我見 Aaron 無咩心機咁，就叫佢走先。

「唔使，我唔累。」Aaron 好平淡咁講。

呢個時候，我望到有個男仔同我地差唔多年紀，高高大大，身型同 Chris 差唔多咁大隻，係到來回踱步。

「今晚都幾多人係到等人。」我細細聲同 Chris 講。





「人地就等女，我地就等仔，唉。」Chris 苦笑咁講。

「喂！望下個邊！」Aaron 忽然指住另一面，原來係 Lok 行緊過來！

太好喇！佢無事！

當我地諗住衝過去既時候，個個踱步既男仔竟然用更快既速度跑過去⋯⋯

個男仔竟然勁大力攬住 Lok！

「下？佢⋯⋯」我地仲未來得切反應，個男仔居然一下錫落去 Lok 個嘴到！

未完待續