《香港唔係追夢既地方》: Episode 12
Episode 12
時日如飛，好快我連最後一個試都考完，連GPA都出埋。唔過三，食得屎，即係可以疊埋心水出來做野。
霎時之間，我就變左個廢青，係屋企 Send CV 出去搵工，又諗下自己想做咩工、自己將來係點。
Jack 就申請左政府工，應該好快有回音。而 Aaron 就做左保險喇一定，唔使問都知。雖然保險易入行，又可能努力就搵到錢，但我知道一定唔岩我做。Chris 撈緊咩呢？我無問，都好耐無見佢。而 Lok 就仲讀緊大學。
同佢地三個已經好耐無傾計，自從個次之後，可能係連我都失望，無左動力，更加無勇氣去搵佢地……
個人越來越頹廢，得閒彈下結他、打下波、打下機，又再 Hea 搵下工，一日一日就係咁過去。
Jamie 比我叻，佢好快就搵到份銀行工，然後佢就唔可以成日陪我，仲開始日日夜夜叫我去搵工，煩人既程度直逼我阿媽。
「你搵下工喇，做坤哥真係咁易咩？腳踏實地搵工喇，想做死一世7仔呀你？中意唱歌，我咪閒時同你唱多D K囉。」Jamie 不斷重覆講類似既說話，佢真係好想為未來打算，仲好有計劃……反而我，真係唔知做緊乜咁。有時我都會想問自己，到底想點。
心入面係唔想返工，想唱歌，但係又唔知點樣去追夢，亦無勇氣去追夢。一諗起 Jamie 對未來既憧憬，仲有我老母個副嘴臉，仲有親朋戚友既睇法，我就唔再諗做第二個坤哥既事。唔通同佢地講，我想做歌手，但仲 Send 緊 CV，咁咩？
-
今日，我又攤左係屋企，睇緊都市閒情。
「喂，你搵下工喇，成個廢人咁。」我老母好老實不客氣咁一野插埋來。
「搵緊喇，都要等回音架。」
「等等等……唔好話你掛住夢想唔去努力搵工？人地陳太個仔呀，都出左來做野坐緊寫字樓喇，我都唔求你搵份好高人工喇，你仲唔……」佢又一輪嘴咁講，唉，又駁佢唔到既真係。
「夢想夢想，夢想幫到你還錢交稅咩，餵得飽你咩，唔得呀嘛，咁你……」
頂，畀我靜下好唔好？
我決定唔理佢，走埋去用電腦。呢個時候，電話居然響起。
「喂？」
「你好呀，我係 C and B 公司個邊打來架，請問係咪黃日朗先生？」係一把好好聽既女聲。
「係，我係。」我把聲都即刻變得好恭敬。
「你之前就 apply 左我地公司 Marketing assistant 呢個職位既，我地而家就想同你做返個 Interview，唔知你下星期一有無時間上來我地公司呢？」
「有呀，可以呀，無問題。」我即刻好興奮咁應佢。
「好呀黃先生，咁你可能要抄一抄低我地公司既地址喇。我地公司就係尖沙咀美麗華大廈38樓P室，到時你搵返我丫，我叫 Venus。」佢好溫柔咁講。
「咁到時你帶返身份證、學歷證明、工作證明同埋其他文件上來，我地會做返個簡單既 Interview，好唔該曬你，咁到時見，拜拜。」
「好呀唔該曬你，拜拜。」
Yes！仲唔威返次畀你地睇！
「喂老母，有人叫我見工喇下星期！都話左我有搵工架喇！」我即刻衝去我老母面前耀武揚威。
係幾爽皮既，人地問起我做咩，我可以答佢做緊 Marketing ，幾型。再問我係邊到返工，我再答佢係尖沙咀甲級寫字樓返工，真係對得人拜得神。
呢個時候我望一望支結他，我個心疾左一疾……不過我無再諗，就準備見工既野。
可能真係係時候，放一放低支結他，放低我既夢想。
-
好快就到左下星期，我一大清早就起身整頭沖涼，著到試試正正咁準備見工。
【加油呀BB！我支持你呀！】Jamie 都晨早 send 左個訊息對我以示鼓勵。
於是我就充滿幹勁咁上去見工。
「冷靜D⋯⋯定D來⋯⋯你得既⋯⋯」我不斷叫自己冷靜，因為我真係好緊張。記得之前去見工都比HR既人問到口啞啞，佢地真係唔係善男信女⋯⋯
上到去，有好溫柔既 reception 姐姐，然後終於見到 Venus 真人，係一個幾後生既靚女，估計大我四五年到，但佢舉手投足間都散發住一種高雅既氣質，高貴又不失大方。
「你好呀，你係⋯⋯黃日朗，係咪？」佢問我。
「係呀，我係。」
「你好呀我叫 Venus，係人力資源部既職員，咁不如你先簡單介紹下自己先？」Venus 好溫柔咁講。
之後就係我表現我口才既時間。
有時為左得到一樣野，可能真係要誇大少少自己既能力，甚至係講大話⋯⋯例如講到自己點樣點樣想係 Marketing 呢行發展呀、有咩計劃咁，其實我打從心底唔係想係呢行到做一世。
Venus 聽完之後都點曬頭，我唔知道佢係唔係會信我，因為多數HR都係喜怒不形於色，我真係望唔透。
「咁不如到我講下呢份工既資料畀你聽下先喇⋯⋯咁我地就係返星期一至五，九點至六點⋯⋯」Venus 講左一大輪關於份工既野，我都係不斷點頭。
「咁你有無問題？」Venus 講完之後就問我，我就緊係老練都話無問題。
「咁今日唔該曬你先，我地有進一步既消息就會盡快通知你架喇，唔該曬你。」Venus 笑笑口咁講，但我心情就低落左。
等消息⋯⋯咪即係又 fail？
Venus 送左我出門口，我感覺又好似原地踏步咁。明明呢間公司寫字樓都幾靚，我幾中意，點解唔畀我係到返工⋯⋯天呀，我想返工呀！
-
返到屋企又繼續 hea，然後夜晚繼續返7仔，今日又見到 Kate 返工。
但係 Kate 好似唔多開心。
「喂，做咩今日悶悶不樂咁既你？」我問佢。
「哦，無⋯⋯同男朋友相處唔愉快姐，無咩野既。」Kate 有少少頹咁講。
「哦，食餐飯就無野架喇⋯⋯呀屌，我未寫本簿呀！」我忽然醒起今日食左餐飯無將飯錢寫落本簿仔到！
Kate 見我咁緊張寫，就望下我。
「哇？你做會計呀？咁多數既？」Kate 問我。
「唉，唔好提喇，我女朋友逼我寫架，話咩為將來打算喎⋯⋯」我歎左口氣，點知 Kate 歎得仲大聲過我。
「唉，唔好嫌你女朋友煩呀，我都明白點解佢會咁做。」Kate 竟然唔企係我個邊！
「我男朋友 Eric，佢仲讀緊 master，所以無返工。咁有時都係我畀錢，都唔緊要⋯⋯」
「但我問佢想做咩，佢成日都話唔知唔知，想遲下先諗⋯⋯佢都廿幾歲人喇，唔通真係讀書讀一世咩⋯⋯佢有無諗過將來架，佢有無夢想架到底？」Kate 眼濕濕咁講。
「佢唔係唔好，佢好好，對我又溫柔，又唔會出去識第二個，但佢偏偏⋯⋯好似舊廢鐵咁，對未來完全唔著緊，一味逃避⋯⋯我都唔想咁話佢⋯⋯」
「我愛佢，但我係佢身上真係睇唔到將來⋯⋯我咁努力，但佢就⋯⋯」Kate 講下講下仲開始喊起上來，我都唯有即刻開張紙巾畀佢。
「唔好咁喇，可能佢遲下會識諗呢。」我只可以咁樣安慰佢。
「仲遲？我仲可以遲多幾多年？過多幾年我已經二十尾，佢仲唔諗將來唔儲錢，咁我咪要四十歲先做新娘？女仔最美好既年華好快就過，然後就無得返轉頭⋯⋯」
「我唔係想佢好叻，搵幾百萬，我唔係想做少奶奶，但我只係想跟住一個有目標、上進既男人，一齊奮鬥。但而家好似得我一個有夢想，得我一個奮鬥咁⋯⋯我真係覺得好激氣。」
睇得出 Kate 真係好揪心，佢好想佢男朋友可以成熟。係相愛，但現實總係會有更多既問題。
Kate 呢個女強人，都有軟弱既一面。
我都係時候覺得，Jamie 講得無錯，我唔應該再發夢，而係要面對現實。
-
呢幾日我都無彈結他，而好努力咁去搵工，我好想可以定落來，為將來打算。
「文員⋯⋯行政助理⋯⋯唉，都唔知邊條蛋散發明副學士呢樣野出來，係大學同中學之間，又唔係比好多公司承認，花左幾廿萬唔知讀左D咩返來，垃圾政府！」人一頹，有時就會做左憤青。
正當我頹廢之際，電話忽然又響起。
「喂？黃日朗丫唔該。」把女聲好熟！
「係，我係。」
「你好呀，我係 C and B 人力資源部 Venus呀，上次咪同你做過個 interview 既，我地決定畀個 offer 你。」
下？請左我？
請左我？
好野！
「咁你下星期一九點鐘去返我地寫字樓丫。」Venus 帶有笑意咁講，唔知點解我覺得佢把聲特別好聽。
「好！無問題！唔該曬你！」
上天關曬所有門，都會留返一扇窗畀你既。
但我無留意，支結他，已經開始慢慢封塵。
未完待續