《香港唔係追夢既地方》: Episode 04
Episode 4
佔領中環既行動已經開始左差不多一個月，我亦開始要著手自己既 project 同功課，但我亦無忘記過國家大事，抽空去現場支持。
除左去金鐘之外，我亦有不時探望 Jayden 既情況，但 Jayden 既氣色一日差過一日。佢成日話想一齊去金鐘，但以佢既身體狀況，根本捱唔住。
好老實講，我好擔心佢，因為佢從來未試過係醫院留咁耐。佢話等緊醫生出既報告，但 Jayden 既狀況好明顯越來越差。
有一種不安既感覺，正慢慢係到蔓延。
-
最近好多消息傳出，又話政府會出動音波炮、水炮車驅趕人群。又話必要時會開槍，搞到人心惶惶。
Jamie 同 Sophie 固然係擔心我同 Chris 既安危，而我老母心知道我晚晚去佔中，但佢無講咩特別野，淨係叫我小心。
我知道雖然我老母同我政見唔同，但佢唔會想我出事。
今日，我一如既往同 Chris、Aaron 同 Lok 一齊去金鐘。不過，Jimmy 已經無再來，可能佢要溫書？又或者佢屋企人唔畀？
至於 Sandy 仲係到，佢好堅持自己認為岩既野，似乎佢會為左自己既堅持，同屋企人對抗到底都在所不惜。
而 Mike 既精神都日漸差左。
「喂！你推咩呀！唔好再行前呀！」遠方開始出現騷動既聲音。
已經係今日第四次出現口角既騷動⋯⋯似乎即將有事發生。
Mike 聽到聲之後，即刻衝去前面同推撞既警察理論。隔住鐵馬，都可以睇到Mike 同 Terence既態度同之前已經好唔同。唔單止 Mike 好激動，連 Terence 都唔再冷靜。
「喂⋯⋯覺唔覺氣氛開始好緊張。」Chris 細細聲問。
「我覺呀屌⋯⋯好似就有事發生。」Aaron 都顯得好緊張。
忽然人聲開始嘈雜，我離遠好似見到有紅旗！有紅旗⋯⋯即係代表⋯⋯
「走呀！佢地準備出催淚彈呀！」
「唔好吸呀！」
大家開始叫起上來，Lok 即刻帶埋 Sandy 退去後面，而我、Chris 同 Aaron 開始傳物資去前線。
原來戰爭，唔一定古代或打機先有，香港都可以有。
「Bom！」一聲巨響，地下一光，忽然有好大陣煙攻入我地既眼耳口鼻！
「咳⋯⋯」斃！我吸入左呢陣煙，我對眼完全張唔開⋯⋯好辛苦⋯⋯
Chris？Aaron？Mike？有無人可以幫下我⋯⋯
我伸手摸索，但四圍既人都移動緊，我唔敢亂咁摸，但四圍又好嘈，完全聽唔到野⋯⋯我對眼好辛苦⋯⋯
後來好似有人將我拉返去後面，開始無咁嘈，陣煙既感覺都開始散⋯⋯
「唔好張開眼呀你！你等我幫你洗一洗！」似乎有個女仔，佢準備幫我洗眼，我睇唔到佢係咩樣，但佢把聲好熟，好似好耐無聽過咁⋯⋯
忽然一陣清涼既感覺湧入雙眼，好冰涼但幾舒服，令我雙眼既刺痛有所減輕。
「無事喇，Tony，唔好再上去咁前喇。」個女仔同我講，佢把聲真係好熟⋯⋯好似⋯⋯
Sherry。
我勉強雙開眼，模模糊糊只能睇到佢跑去第二到幫人，雖然我睇唔清楚，亦好唔肯定，但我有好強烈既感覺⋯⋯係佢，係 Sherry。
「喂！你無事呀嘛！」Aaron 跑過來，拍左拍我膊頭。
「嚇死我，無喇喇唔見左你。」Chris 都係到。
「哦⋯⋯無事，唔小心食左兩野催淚煙姐。」我漫不經心咁講，因為我諗緊既，係 Sherry。
-
【你想死呀！行咁前！你唔准再去呀！】Jamie 知道我中左催淚煙之後，佢既反應真係大到⋯⋯不過都明白既，佢只係關心我姐。
【知道喇大人！】我緊係要咁樣覆佢氹下佢，未死過咩⋯⋯
不過，令我在意既係，到底呢場運動，會以點樣既方式結束？係呢一刻，我真係好想，香港可以有一個超級英雄，去拯救我地。
忽然，電話響起，有人打左畀我。
「喂？係咪 Tony仔呀？」講野既係一位阿姨。
「我係呀⋯⋯你係？」
「我係 Jayden阿媽呀！斃喇你要幫下我！」阿姨好緊張咁講。
「咩事呀 auntie？係咪 Jayden 有咩事？」
「佢唔見左呀！」
-
點解會咁架⋯⋯Jayden 你搞咩呀？做咩無喇喇玩失蹤？係咪去左金鐘？
「喂！Jayden！覆機呀！你身體唔好就咪亂咁走，金鐘唔係你去既地方呀！」我拎住部手機錄音畀佢聽，希望佢聽到喇。
「喂！咁多位，如果大家起金鐘或者邊到見到我中學同學 Jayden，記住即刻捉住佢然後叫我過來！唔該曬！」我錄音畀各大群組，然後send 埋 Jayden 張相畀佢地。
Aaron、Chris、Lok、Jimmy、Sandy 同 Mike 都有幫手一齊搵，但似乎 Jayden 無去到金鐘。
-
佢會去左邊呢？點解 Jayden 要無喇喇逃出醫院？想死？想跳樓？但佢份人咁有希望，唔似會想死⋯⋯咪住先，跳樓？跳樓機？
係喇！跳樓機！
我即刻二話不說飛車上海洋公園，入左場之後我咩都唔理，直接去左跳樓機個到。
排緊隊既人，我逐個去望，都唔見有 Jayden 既身影。就連附近，都唔見佢。
無理由架⋯⋯跳樓機應該係得呢到⋯⋯
唔係，跳樓機唔係得呢到，仲有第二部。
-
我去左海洋公園既兒童區，見到個部五座位既兒童跳樓機，而 Jayden 就坐左係附近，睇住班細路玩得好開心。
「喂！你係到做咩呀？」我勁大聲呼喝左佢一下，因為我真係好嬲，好想鬧佢，到底你知唔知你身體咩情況，會令人好擔心架？
我走過去，望一望佢，我呆左。
Jayden 對眼紅曬腫曬，佢應該喊過來，不過另一樣野係，佢臉色好差⋯⋯佢個人感覺好灰好沉，無左平時個種生氣⋯⋯
以往就算佢有幾唔舒服，佢臉色最多都係蒼白，但佢而家直頭係⋯⋯臉如死灰。
「你⋯⋯你做咩呀？」岩岩既憤怒一掃而空，隨之而來既係擔憂。
「我好想去玩⋯⋯但我知道我唔玩得大人個部，我就諗⋯⋯玩細路仔個部得喇掛？但我根本連行都開始無乜力⋯⋯」Jayden 把聲好沙⋯⋯
「醫生報告出左⋯⋯佢話我心臟衰竭既程度好快，可能我過唔到下一個星期⋯⋯甚至隨時都會⋯⋯」
我呆左，我個世界好似畀雷劈左一下咁，完全唔識反應。
「我知道我過唔到呢關，我知⋯⋯有好多野我都做唔到。」
「香港真係唔係一個追夢既地方，我地力量太弱喇，根本改變唔到呢個地方⋯⋯所以我就諗，改變自己呢？又可唔可行？」Jayden 語調開始急促，佢對眼又開始紅。
「佔中，我去唔到，我只可以精神上支持⋯⋯睇住班警察同你地民眾由和平、有秩序既靜坐，演變成打仗咁⋯⋯我個心好痛，點解香港會變成咁？」
「香港係一個無自由既地方，所以我先更加想飛⋯⋯但我今世都應該飛唔起⋯⋯我只係希望終有一日，香港人都可以飛翔，係自己既一片天空，自由咁飛翔⋯⋯」
-
我送左 Jayden 返醫院，一路上我都無講野，佢亦都只係靜靜咁望住出面既景色。
香港既一片天空，好似唔再蔚藍，剩返落來既只有紛亂同變幻莫測。呢一秒出現既可能係雲彩，下一秒可能已經係胡椒噴霧、催淚煙、民眾既慘叫同埋警棍打人既聲音。
-
「Tony⋯⋯」今日，Jayden 忽然又有返少少神色，我坐左係 Jayden 床邊，陪伴住佢。
「做咩事？想飲水？」
「唔係⋯⋯我岩岩發夢，夢見自己可以飛。」Jayden 笑得好開心，見到佢笑得咁真心，我都好開心。
「總算做到我想做既野，無憾架喇。」
「係，無憾架喇。」我望住 Jayden 清秀既臉，我好感歎，點解上天咁中意開玩笑。明明香港剩返有希望、有理想既人已經唔多，點解佢仲要收返一個走？
我好想怨個天，點解要受苦、要死個個，唔係個班狗官黑警，而係呢個無做過傷天害理既事既後生仔？
唔通佢想飛，都有錯咩？
「Tony⋯⋯我有樣野想你幫手。」Jayden 忽然開口問。
「你講喇，你即管講。」
「我覺得紙飛機好靚⋯⋯如果可以係我既葬禮到，大家都一齊掟紙飛機，一定好靚⋯⋯可唔可以達成我依個小小既心願？」
「可以，緊係可以。」
「咁就好喇，大家都可以一齊飛⋯⋯」
「Tony⋯⋯你都要，唔好忘記你既理想⋯⋯呢個社會好容易令人迷失自己，但你千其唔好忘記，到底我地生活係為左咩。」Jayden 意味深長咁講，我望住佢，點點頭。
仍然要相信，這裡會有想像。
未完待續