《香港唔係追夢既地方》: Episode 02
Episode 2
我好頻樸咁趕左去醫院。
打畀我既，係我中學一個好好既同學，佢叫 Jayden。叫得 Jayden，佢個樣都係唔差，白白淨淨，五官幾清秀，靚靚仔仔之餘仲有幾分似女仔。
好可惜，佢唔可以好似衝上雲霄個個 Jayden 張智霖咁四圍食女，因為佢有長期既心臟問題，所以中學既時候佢已經出出入入醫院，身體亦都唔好，好似從來都無上過PE堂。
走入去白茫茫既醫院，我就根據 Jayden 畀我既指示去搵佢間房。
1901，係呢間。
我慢慢推門入去，見到熟悉，但亦陌生既好同學……
Jayden。
佢一如既往，塊臉都係咁雪白，雖然佢訓左起到，聽緊音樂，望落去都算精神，無我想像中咁嚴重。
「喂！」我粗粗魯魯咁叫左佢一下，就入左去。
「喂……Suprise！？」Jayden 笑笑口咁講。
「Sup 你個頭呀！嚇死人咩，做咩無喇喇入左醫院？」
「入左成個星期架喇，見今日好返好多咪同你講下，順便勞煩下你移玉步，探下我呢個老朋友囉。」Jayden 仍然都係笑笑口咁講。
「講野串我喇而家，話我唔搵你。」
「點呀？你應該就來畢業喇喎，有無諗住之後點？」Jayden 問，佢亦都坐左起身，全神貫注咁望住我。
「而家探我定探你呀，問返我轉頭既？」
「我病就唔係第一日既事，所以無咩好講畀你聽，但係你畢業同前路就重要好多喇，講來聽下喇。」Jayden 一臉懇求咁望住我。
「我應該唔讀架喇……遲下應該搵份工做下。」我漫不經心咁講，因為事實上我都仲未諗到。
「打份工？打份咩工？」Jayden 唔知點解好有興趣咁樣，喂大佬，我返工，你咁有興趣做乜先？
「唔知呀，返份朝九晚六既Office工做住先掛。」我講完之後望左望佢，我好似見到 Jayden 臉上，有一絲失落……
「你做咩咁失落？有咩問題？」我真係好好奇。
「無……但……你真係想咁？」Jayden 失驚無神咁問我。
「想……想掛……你想講咩呀？」唔知點解，Jayden 好似怪怪地咁。
「咁我問你，你有咩夢想？」Jayden 一臉認真咁望住我。
「夢想？」講起夢想，我就諗起個日同 Aaron 佢地飲野個陣講既夢想。
「你唔好笑我喎……我上次同班兄弟講，講完之後佢地笑左我成晚呀！」
「講喇！夢想有咩好笑姐！」Jayden 緊張咁講。
我吸左口氣。
「我想做第二個坤哥。」我好快咁講，Jayden 就好似呆左咁。
「都話左架喇……又要聽……我都知無咩可能架喇，香港有幾多個坤哥丫，我都知自己咩斤兩，唔使咁樣喎……」
「好呀！加油呀你！」Jayden 忽然好興奮咁講，甚至嚇左我一跳。
「下？」今次輪到我下返佢喇。
「原來你想做歌手，好丫，幾有大志，諗住點做呀你？第一步係咪好似坤哥咁唱COVER？」Jayden 一輪咀咁問我。
「夢想，緊係得個想字架喇，同埋發下夢囉，點做姐？」
「點解唔可以真係做？」Jayden 好認真咁問。
「下⋯⋯咁⋯⋯」我發覺我答唔到佢。
「想，只係第一步，你唔去做既話就永遠得個想字。與其去羨慕人地，點解唔嘗試做比人羨慕個個？」Jayden 好認真咁講，我從來無見過佢咁緊張，咁認真。
「其實你比好多人已經幸福，起碼你仲有機會可以去追夢。」Jayden 忽然望出窗，用好羨慕既眼神望住出面既事物。
「至少比我幸福。」Jayden 不慍不火咁講。
「我既夢想，係永遠唔可能做到，因為我想飛。」
「飛既感覺一定好爽，我有諗過去大峽谷玩滑翔傘，又諗過去玩跳傘，但我既病根本唔容許我咁做。」Jayden 講講下，不自覺低左頭。
「結果⋯⋯我就連跳樓機都玩唔到，真係可笑。」
我呆左咁望住佢，第一次見到佢咁既樣，個種好想去追，但明知唔可能成功既感覺，完全係佢身上體現到。
-
同 Jayden 傾完之後，我諗左好多。我到底有咩理由唔去追夢？當坤哥只係大我幾年，但佢已經參加超級巨聲，令全香港人都聽到佢既歌聲、知道佢個名，我呢？我仲係到做緊咩？
點解連夢想都唔敢同人講？乜野又先算係成功？係呢個商業社會，係唔係人人都要做到金融才俊先係成功人士？係唔係又係成功先會令人開心？
人，到底係為左咩先要生存落去？
-
「大批市民聚集係金鐘夏慤道一帶，高呼要真普選⋯⋯」
「行政長官表示願意同各界展開對話⋯⋯」
「我正式宣布，佔領中環行動提早啓動！」
短短一個月，香港已經變得好動盪。係我仲思考緊 Jayden 同我講個番說話既時候，世界原來已經不斷變化緊。
昔日我地以為和平既都市，轉眼間，原來已經去到戰爭既邊緣。
去到呢個時候，我亦相信無人再可以置身事外。
呢幾日，我返去學校，有幾個講師都因為「佔中」既事而取消左課堂，亦有更多既學生去左中環靜坐。學校既學生會開始派發黃色絲帶扣針，畀我地戴上，以示對抗爭既支持。
我，平時都係一個唔太理政治既人，一來覺得太複雜、太黑暗。二來覺得事不關己，所以就己不勞心。但係今次，我認為係時候要企出來，爭取我地應該要爭取既野，做我地應該要做既野。
-
【你萬事小心呀！如果有咩異樣，即刻同 Chris 佢地走呀！知唔知道呀？】Jamie 知道我準備同班兄弟去金鐘靜坐，就即刻what's app我。
【放心喇！我醒目架嘛！】我都即刻回個訊息畀 Jamie，等佢唔好擔心。
但事實上，我自己都好擔心，因為我根本唔知道，而家呢個政府，將會點樣對付我地呢班異見人士。
前路，忽然好似一片黑暗，睇唔到曙光。
未完待續