《失蹤》: 第五回
「阿明，如果你再係咁落去，你遲早會變成阿盈嘅下場。」Karen突然認真地對我說。
「你話阿盈!?佢可以有啲咩下場?我又會有啲咩下場?」我一臉疑惑地問。
「我知道你係阿盈男朋友，我地所有同事都知道你黎查佢失蹤件事多過返黎做野......好耐之前我地中心遇到好多奇奇怪怪嘅Client同Case，根本就唔係我地能力範圍可以解決得到，但唯獨阿盈佢不斷去接觸呢類Case......最後佢攪到自己都唔見埋。」從Karen說話語氣之中，可以感受得到佢真係好驚呢件事，如非必要都唔會再提咁。
「奇奇怪怪嘅Case!?上星期跳樓個女仔，今日詩文自殺，你所指嘅係咪呢啲?」我問。
Karen搖搖頭說:「阿盈所接觸嘅Case更加離奇。至於你遇過嘅都唔算咩嚴重事。」
「咁都唔算......唔怪得主任咁都唔炒我，原來你地做慣做熟。」
我同Karen再返到去詩文屋企，發現陳太同細女已經走咗，後來報警後，查過出入口同醫院紀錄都無發現，兩人好似人間蒸發咗一樣，無人再搵到佢地，最後唯有草草結案。
經過呢兩單案，加上Karen嘅透露，我大概知道呢間中心好有問題，經常性接到好多不合常理嘅事，而且好多都涉及到失蹤事情，一向講求科學現實嘅我，都不得不感到疑惑。雖然Karen唔想我再理呢啲案，但我堅持要追查落去，至少比我搵到阿盈為止。
「轟隆!」雷聲響起，緊隨住的是大雨降下，雖然係下午五點幾，但天色已經變得昏暗，街上嘅人都少之有少。
某日，當我同Karen企喺中心門口準備拉閘放工時，大雨之中有個後生仔無擔遮下望住我地。
佢個樣十分驚慌，一副哀求嘅樣望住我地，似乎滿懷心事有事相求。
Karen似乎都留意到，但佢顯得好避忌，叫我快手拉完走人唔好理。佢叫我唔好理我就更覺得奇怪。
「我去睇下個後生仔做咩事先。」說罷，我正想走過去時，Karen捉緊我，一臉認真地對我講:「每次落大雨，個細路就會出現，阿盈都好似你咁，走去問佢咩事，但原來......」
「但原來咩呀?」
「我好驚......唔敢講，都係嗰啲野。」karen真係好驚，而我大概都估到係咩事。
我打開把遮慢慢走到個後生仔面前，然後問:「你係咪有野想同我地講?」
個後生仔望住我，然後捉住我隻手激動地說:「求下你!幫我搵返我老豆返黎!」呢位後生仔隻手凍到.....嗰種寒意由佢隻手傳到我身體任何一個部位，令我不禁有啲不安。
「好好好，我地入去中心傾好嗎?」我帶住個後生仔入左中心後，Karen已經想走，但又怕我會出事，於是企係我身旁捉住我。
我遞上咗一杯熱水比個後生仔，希望可以比佢暖下身。
個後生仔亦遞上一盒舊式錄音帶同一部播放器。
「呢啲係......?」
個後生仔拎起杯飲咗啖水後，目無表情地說:「係2005年9月，反黑組探員薛利華喺西貢獨自行山後失蹤，事後警察派咗好多人去搵，但最後都無功而回。」
「薛利華就係你老豆?」
「嗯。當時老豆佢曾經打過999求助，後嚟電話中斷。而呢盒帶就係當日佢打去999嘅對話。」
我聽完後，開始真係有啲驚，因為呢單野我都曾經聽聞過，特別係錄音個對話內容更令人感到不安，但我以前係文字上睇，又未真正聽過真人嘅聲帶，但我已經覺得自己開始淆底。此時，Karen更加捉得我更緊，但係Client面前我地又唔可以表現出黎，如果連我地都驚嘅，好影響當事人情緒。
「轟隆!」
呢下雷聲打得好勁，震懾整間中心，天花燈都快速閃了閃，顯得氣氛更覺恐怖。但呢位後生仔仍然呆呆咁拎住隻杯慢慢飲。
我將盒帶放入錄音機到播，然後係一片寂靜嘅環境下聆聽。
接線生:「999!」
薛:「我係行山架, 係西貢 586......」
接線生:「咩事呀?」
薛:「我行山，迷途呀!」
接線生:「你迷途呀? 咁你係邊呀」
薛:「我而家位置 48 (停頓一會) 7020!」
接線生:「487020 呀? 係咪標柜柱?」
薛:「係，係果個咩柱呀」
接線生:「487020 呀嗎? 你慢慢講，係乜野地方?」
薛:「等等......」
(相隔 20秒)
接線生:「喂!?」
薛:「等等!」
(相隔 30秒)
接線生:「你係咪行麥理浩徑呀!?」
薛:「係，西貢個頭黎架!」
接線生:「你係咪行麥理浩徑呀?」
薛:「係......冇錯!」
接線生:「你行緊邊一段?」
薛:「西貢個邊，西貢東。」
接線生:「西貢東，西貢嘅東面，由邊度出發?」
薛:「由西貢北潭涌，行左兩個幾鐘頭。但係蕩失路，而家企左係過左 58......5870嘅主要嘅路。」
接線生:「5870 幾?頭先你又話係487020?」
薛:「仲差少少咋!」
接線生:「有冇見到 M幾多，M 幾多，你見唔見到呀?」
薛:「仲差少少路程!」
(相隔 30秒)
接線生:「你見唔見到 M001呀，M011，M030呀?」
薛:「你等陣先!」
(相隔 20秒，很多雜音)
薛:「睇唔到呀!」
接線生:「你淨係見到個 number，咁個 number (487020) 刻係邊度呀?」
薛:「唔係d 柱，係密碼!」
接線生:「乜野密碼!?」
薛:「可能我讀錯密碼啦!」
(接收不良，很多雜音)
接線生:「咁你仲係咪行麥理浩徑，先生，你唔好行去個邊呀，收得好差，你唔好再行，喂!喂!你停係到!我要問你問題!」
薛:「你快d啦，個 number 係………」
接線生:「你停係到，你有冇扭親腳?」
薛:「頂唔順呀!」
接線生:「你停係到，你有冇扭親腳?」
接線生:「你幾多人係到?」
薛:「我一個人。」
接線生:「要唔要救護車?」
薛:「要!」
接線生:「你係唔係要救護車?」
(接線生接駁至救護車)，然後接線生與救護員通話及救護員問位置，隔20秒)
薛:「救命呀!!(相隔5秒) 救命呀!!!!」
救護員:「你要話比我聽你係邊!」
薛:「最慘我唔記得條路!」
接線生:「先生呀!喂!喂!喂!」
薛:「救命呀 (相隔3秒) 救命呀 (已經再沒有薛的對話)」
(接線生解釋收到電話後的情況給救護員知道，救護員覆一次薛的手提電話號碼便收線)
接線生:「先生呀!喂!喂!喂!」
(斷線)
錄音播完，我同Karen都無出聲，段錄音令人想像到好多野，一路聽腦海一路幻想個畫面出黎，完全唔明白點解行山
可以行到好似比「野」追住咁，而且短短時間內竟然可以傾傾下突然叫救命就消失咗? 對方仲要係一個警察，我相信體力方面應該比一般人更加好同更加冷靜吧?
「林Sir，幫我搵返老豆返黎，可唔可以?」後生仔放低隻杯問。
呢個時候，Karen終於出聲:「其實呢單野已經係十年前，警察都搵唔到，更何況我地? 而且我地中心服務並唔係幫你搵......」Karen未講完，個後生仔已經插咀再問我:「林Sir，幫我搵返老豆返黎，可唔可以?」
從佢眼神同語氣都散發出一股令人心寒嘅感覺，真心令我感到淆底，而且Karen講得岩，已經遠遠超出我地服務範圍。正想我拒絕時候，對方亦講左一句:「盈姑娘都話幫我搵，而且佢仲去左西貢搵。」
呢句說話令我非常在意，我諗都無諗就答應左佢。
「好，我答應你，聽日我就去西貢，係你老豆消失嘅位置下搵佢。」
「阿明!!」Karen想說服我，但已經阻我唔到。
後生仔講左句唔該就起身離開中心了。我地兩個目送佢離開時，先發現佢留低左錄音帶同機係到，當我地追出去時已經搵唔返佢。
「點解你要答應佢?就係因為阿盈?」
我邊收怡物品邊說:「嗯，直覺上覺得呢件事我一定要處理。」
拉上中心閘後，Karen堅持叫我唔好去，但我只係同佢講一聲:「聽日幫我請假，我要去一去西貢。」
晚上，我上網睇返呢單失蹤案嘅新聞同資料，愈睇愈心寒，同時我亦重覆咁聽返錄音帶嘅內容，從佢語氣同時間位置上去分析當時失蹤警員究竟發生咩事，不知不覺間抄寫左好多筆記，似乎好似掌握唔少內情咁，但又過於空洞，睇黎聽日點都要去一去西貢睇下點。
正想瞓覺時，阿媽入房話知我聽日要去行山，送左張符牌比我。
「咩黎架?阿媽呀!唔好咁老套啦!」
「拎住係身啦!你知山上面有好多結界架喇!一陣你踩左入結界出唔返黎你就知驚!」
我拎住符牌緊緊握係手到，阿媽所講嘅結界我都有研究過，原來都有一番學問係到，點都好，聽日都係小心為上。
直至聽日，當我落到樓下後，竟然見到Karen拎哂背包咁企係等我。
「你做咩著成咁?你等我?」
「我同埋你一齊去。」
「點解?你唔驚咩?」
「驚。但我都係社工黎，如果我咩都唔理嘅，我覺得自己再做落去都無意思。」
「咁好喇，你去我都放心啲，起碼有個照應。但係......總之大家小心。」
接著，我同Karen正式出發到西貢，去返失蹤警員失蹤位置。