(爸爸no.1)我老豆係口靚妹: (part4)趙語聆2
(Part 4): 圓舞曲
趙語聆 2 踏進戰場
「咁早返嚟嘅?」頌
「砰!」入咗房
依一個算唔算係我咁多年最難忘嘅生日呢?雖然都預咗做唔到d咩出嚟,但都冇諗過連戲都睇唔成
要自己一個返屋企,點解我做親乜都咁失敗?突然間好似全身無力郁都唔想郁!
「依~~~」
「發生乜嘢事呀?」頌
「佢有d急事走咗!」
「乜嘢急事呀?係咪同你嗰個最好朋友有關架?」頌
點解佢會知嘅?
「講嚟聽吓!」頌
「......................」
「你個friend 又幾識得揀時間出事啵!」
「講乜呀佢真係有事架,仲整親隻腳添!」我
「但你嗰個阿政又真係.......扔咗你響條街都得!」頌
「咁救人要緊嘛!如果有咩事就慘啦!」
「如果係救人你都可以跟埋去啫,嗰個人你又唔係唔識,就咁睇住你嘅阿政走咗去!」頌
係喎!其實跟埋去都得架點解我會自己走返嚟..........
「咁就比人搶走咗阿政啦!」頌
「搶.......喂唔好亂講嘢呀!阿嘉係我好朋友唔好講到我哋好似敵人咁!」
「得得得!講還講唔好出手打人!」頌
「等陣!唔記得換水呀........啪啪啪!」衝咗去厠所
「差d唔記得好彩冇事啫!」
「龜?」頌
「嗯!阿政送比我嘅生日禮物!」
「生日禮物送龜?」頌
「好意頭嘛長命百歲!」我
「下次叫佢送千年人蔘!」頌
「噹噹!以後依度就係你屋企啦!」我
「隻龜叫噹噹?」頒
「嗯!」
「你幾時同噹噹反咗面架?」頌
「幾時有呀?噹噹係阿政改架!」
「原來佢哋有心病!」頌
「冇呀!只不過阿政覺得噹噹同隻龜好似先講出嚟!」我
「點都好啦千祈唔好比噹噹知道,如果唔係你哋兩個會死於非命!」
「依個係我哋兩個嘅秘密!」真係打死都唔講得
「其實你個阿政同你都幾似,一樣係冇機心諗到乜就講乜又唔識防避人!」頌
「係呀佢同你唔同佢好好人架!」其實我都唔知阿頌係讚我哋定串緊我哋
「你哋就好似兩隻小白兔和平共處,但如果走咗隻食肉動物入嚟就大件事!」
「嘟!」
「阿政........響屋企..........阿嘉冇事吓?哦聽日朝早你同阿嘉上嚟,好啦聽日見!」我
「同哋聽日上嚟依度?」頌
「係呀!佢哋話同我補祝生日!」
「咁呀,聽日我都同你哋一齊興祝生日啦!」頌
「又關你事?」
「又關我事?我係你阿哥呀,同個妹興祝生日都唔得?而且我都想見吓阿政同你嗰個最好朋友!」頌
依種眼神...........每逄我比人蝦嗰時佢就係依種眼神,最嚴重一次直頭踩上學校揾澄澄!
佢唔係當咗阿嘉係我敵人嘛?
************************************************************************
星期日 9:00am 九龍城碼頭
「呼~~~~呼~~~~」
「吹夠風未呀表姊?成個孤獨老人咁好凍呀!」表妹
「凍你咪返屋企囉又冇人叫你跟住嚟!」我
「姨媽叫我睇住你架,你今朝同佢炒得咁勁,佢驚你會揾d無辜嘅小朋友出氣!」表妹
「依度咪得你一個無辜嘅小朋友響度囉!」我
「唔好亂嚟!無辜嘅小朋友周街都係,無謂傷害我哋兩表姊妹嘅感情,而且你好似有男朋友,
揾佢出嚟訴吓苦囉!」表妹
「吓!我幾時有男朋友架點解我唔知嘅?」
「唔洗唔認啦面都紅晒,姨媽爆比我聽你晚晚都同男仔傾電話,仲笑到咔咔聲!」
竟然比佢聽到?係咪所有女人都係咁八卦架?聽到乜嘢都要講比人聽!
「喂!嗰個係我普通朋友嚟咋,你唔好聽我阿媽亂講!」我
「我明嘅!d明星同人開房比人影埋相斷正都話係普通朋友,明嘅明嘅記得做好安全措施呀!」表妹
講乜鳩嘢?乜宜家d小學生思想咁開通.......咁壞嘅咩?定還是係依條靚妹特別d?阿姨你點樣教女架?
「唔好亂講呀都話冇囉,喂你織夠未呀?一路講一路織你唔倦嘅咩?聽姨媽講你今個月買咗幾百蚊橡筋,
唔好亂咁洗錢啦!」我
「幾百蚊響今日嘅香港跟本就唔係錢,買杯雪糕都幾十蚊啦,你唔好用你嗰個年代幾毫子條雪條嚟同我比!」表妹
幾毫子條雪條?乜嗰個係我個年代嚟嘅咩?聽講我大佢五年咁大把............
「喂!我宜家講緊唔好亂洗錢呀幾毫子條雪條,而且你越織越大條,咁大都唔似手蠅嘅?」我
「頸巾嚟架!」表妹
「橡筋頸巾................」唔係化
「係呀最近收咗隻兵仔又驚人搶咗佢咪比d甜頭佢囉!」表妹
小學生...............
「你得嗰幾歲學人收兵?」我大叫
「十歲啦,而且依d嘢好普通啫,我哋學校d女神都玩緊收兵啦,我都係5B班女神我都唔可以太失禮!」表妹
又係女神...........仲要係小學雞女神,我需唔需要帶佢去見社工呢?
「表姊你都open d啦,女仔最值錢就係15-25歲依段時間,識多d男仔收多d兵攞多d着數嘛,好似我咁一句
說話大把男仔走埋嚟!」表妹
「儉點d啦你十歲咋,唔好咁快學人拍拖!」我
「邊個話拍拖?」表妹
「你唔係鍾意佢哋咩?」
「兵嚟咋愛嚟打仗架咋!岳飛會唔會同岳家軍搞嘢吖哈哈哈!」無可救藥
「夠啦你知唔知醜架?女仔嚟架成個公厠咁,真正鍾意一個人係唔會三心兩意,只會一心一意一生一世,
眼中只有嗰個男仔,唔會再有其他..........」
「表姊你喊.........」
「邊度有呀?」
「表姊你真係好鍾意嗰個男仔,點解你哋仲唔拍拖?」表妹
「都話普通朋友囉!而且人哋有女朋友架啦!」
「搶佢返嚟囉!」表妹
「嘩講乜嘢呀你?都話人哋有女朋友囉,你知唔知我哋屋企搞成咁就係因為有你依d人,我絕對唔會做第三者!」我
「而且........我又唔靚又唔係乜嘢女神,佢跟本只係當我朋友,佢跟本唔會鍾意我!」細聲
「噹噹表姊!」
「你點知我個花名架?」
「你知唔知其實你好靚女架?我比你D相學校D同學睇佢哋都話你靚過晒學校所有女神(包括表妹)!」表妹
「你將我D相比晒成間學校D人睇?」殺氣
「哇等等!又唔係祼照普通相之嘛,講返正題其實表姊你知唔知自己有一種好獨特嘅氣質?」表妹
「氣質?」
「唔!就好似陽光一樣好溫暖好熱情好爽朗,好似去到一個藍天白雲嘅公園一樣,每一個人都會有親近你
嘅衝動--------我班friend講架!」
「只要你唔好咁惡死你嘅少女氣質就會散發出嚟!」我班friend只係見過佢張相,唔知佢性格咁兇殘
「得啦得啦!」估唔到我無啦啦做咗小學雞女神,其實我嘅程度係咪只得小學級
「仲有呀噹噹表姊,唔好將所有嘢都收埋響個心度,你性格成日都只係將自己堅強一面對住人,咁做你會
好辛苦架,試吓將你心事講比嗰個男仔聽吖,最緊要講你鍾意佢呀!」
「唔!」
有陣時我會諗如果我變返小學生,開心唔開心都可以同人講係咪會開心好多呢?
如果我同阿政講我喜歡佢,佢一定會唔知點面對我,可能連正常嘅朋友關係都做唔到,以阿嘉嘅性格,
如果佢知道我對阿政有意思佢一定當我係仇人!
個幾星期冇見過佢,聽日回復正常跑步又可以見到佢啦!
其實維持現狀都幾好吖,只要每一日都見到佢已經足夠!