錯的感覺對的人: Vol.10
Bryan完全接受唔到：” 你咪玩啦~~~你係唔係入0左戲劇組呀？想搵對手練下戲咋？”
亞雅卻非常認真：”我好清楚自己講緊乜呀！”
Bryan：”可能你唔清楚自己既感覺，你未拍過拖，我唔怪你，我曾經都以為我鍾意你，但我地之間只不過係兄妹之情，真正既戀愛感覺唔係咁0架，話晒都係你哎呀大佬，我有責任同資格糾正你。”
亞雅好激動：”本來我都唔係好清楚，但當我開口之後，我好明白，好確定自己既感覺！”
Bryan：”妖，你都唔知你自己up緊乜，串你都無謂。” 講完之後，Brayn唔理亞雅，死命逃走。
Bryan話亞雅亞知自己諗乜，其實，佢都唔知自己諗乜。
兄妹，兄妹，由頭到尾都係兄妹。
但突然，諗諗下，諗起亞雅除衫，小朗有D反應。
大鑊。
兄妹之情，開始動搖了。
第二朝，Bryan係張太口中，得知亞雅過兩日就去日本，仲叫佢唔好衝動，睇0岩價先好買，個心沉左一沉。
不過都好0既，希望佢過日本冷靜下，之後返來當乜事都無發生過。
或者時間可以沖淡一切，等亞雅返 0黎，可以再做返兄妹。
兩日過了。
今朝 Bryan 一起身，人影都無隻，好正常，四大元老一定會送機。
其實自己一早起0左身，亦都聽到張生張太佢地出門口，不過都係繼續逃避。
突然，聽新 CD 已經唔洗再閃閃縮縮，可以一路聽歌，一路睇歌詞……新 CD，已經唔洗再收埋，但係Bryan 聽完之後，仍小心奕奕咁收得好好……收係一個好似好隱蔽但必定估到既地……
Bryan笑一笑，笑自己好傻……已經無意義啦…
檯面有鄭家條門鎖，緊係d午餐擺晒係鄭家既雪櫃…
入到去鄭家，空無一人……
Bryan用力踢張梳化，郁都唔都，都唔知點解，0個時可以搞到張梳化反轉。唔係好耐之前，呢到仲係翻天覆地，但今日一個人已經無能為力。
拎住杯豆漿，Bryan好奇咁走入亞雅房，走入呢個門口掛住”Bryan與狗，不准內進”既地方。
點解嚴禁進入？因為Bryan 一入 0黎就會搵佢本日記 0黎睇…其實日記內容好無聊，例如測驗唔合格之類…唔值得為本日記激嬲亞雅，不過 Bryan 就係鍾意咁做。
好白痴，但諗返起，偏偏好開心。
唔知佢有無帶走本日記呢？隨手打開一個所謂暗格，日記仲係到。
打開日記，翻睇鬥氣軼事，好開心。
“今日又係Brayn房搵到演唱會啦……”
Bryan 睇完之後，傻一傻笑，我係特登比你搵到0架，傻妹。
“見到Bryan今日溝女，唔知點解火都滾，不過算佢啦，同我跳返舞。”
緊係啦，唔”乙水”返你，唔驚再打交呀?
一邊睇，一邊感動…原來，好多普通不過既平凡事串連埋一齊，有呢個不可思議既效果。
或者，兩人之間，真係唔係親情…
後悔…已經太遲啦，人已經遠走，一個同自己生活左超過廿年既人，今日已經走0左……
發呆咁坐0左係到…………除0左回憶，都唔知可以做乜。
突然，一陣”咔咔”聲，嚇到 Bryan 傻0左。
Walking Talking 居然出聲？無理由0架！！唔通張太咁快返0黎執屋？
Bryan拎起個Walking Talking，既刻講："張師奶，咪玩0野啦~"嚇嚇張太都好~
“張俊朗！！！你做乜係我房0架！！！！” 係亞雅把聲，仲要異常激動。
“亞雅！你唔係走0左0架咩？？？”但Bryan好似比佢更激動。
”邊個話我要走0架？”
“張太咯！早兩日我聽到佢同鄭太講，話鄭太叫你去日本，唔好亂買野！”
“哈哈哈哈哈，低能仔！鄭太叫我去日本”城”買野呀，佢話D地拖棍0岩價先好買！哇哈哈哈哈哈，低能仔呀低能仔呀！”
“啊啊…係喎，亞雅，Sorry呀。”
“Sorry乜？係你自己低能仔咋喎。”
“唔係……睇完你本日記，我先知，原來果晚你唔係亂up，而係我唔知自己諗乜…”
“咁你係咪應該有D野要同我講呢？”
大家都無再出聲，但部 Walking Talking 一路都仲”咔咔聲”，似乎大家都一路篤住個制。
“你平時寫字都叫ok，點解日記D字咁核突？那西就唔好寫啦…”
“係喎！你做乜拎我本日記睇？”
“手痕0者，不過都無0野好睇。”
亞雅隨手就拎起枝地拖棍。
Bryan已經聽到鄭家鐵閘”口彭” ”口彭”聲。
對的感覺對的人0者，無話唔可以刀刀叉叉0既。
<全文完>
故事全屬虛構~
如有雷同~實屬巧合~