(無甜)上天給我的一個玩笑 (新增外傳): (40)

全身濕透嘅我返到屋企換走濕透嘅衣服，獨自一個坐係床上望住我同啊螢嘅合照，腦海中不斷回憶起啊螢同我講過嘅一言一語
 
「如果將來我地都可以帶自己嘅仔女出街玩就好啦」
 
「一定有咁嘅機會嘅傻女，我地拍拖無幾耐你就咁快想同我生細路啦?」
 
「哼，邊個話呀，幻想下將來唔得咩」
 
「我拖得你手我就唔會放手」
 




「你頭先話拖得我就唔會放開我架，呢個承諾一世架」
 
「緊係啦，我唔會輕易許下承諾，但一旦許下承諾我就會實行到底」
 
「嬴左啦!!!」
 
「我知你實得嘅」
 
「我好想去外國嘅教堂呀，好浪漫架」
 




「你想去，我咪帶你去囉老~~婆~~」
 
「傻佬，成日係到傻笑」
 
「諗下都開心啦，遲下就可以同你仲有啊B一齊去行海旁散步，呢個亦都係你以前最想做嘅事啦」
 
係呢一刻我嘅淚水瘋狂流下
 
啊螢，係我對唔住你…同你一齊咁多年我都發覺唔到你身體有事…一齊咁多年…我一直都係好怕講肉麻野，所以一句我愛你都無講過…而家想講都無機會，係我對你唔住呀…啊螢…
 




痛哭嘅我不斷打牆發洩，無耐我就聽到好似有野掉下來嘅聲音…我開燈望過去…係一封信…上面寫住TO:老公
 
封信一定係啊螢留比我…我立即拎起封信，拆開黎睇
 
「老公:
 
當你見到呢封信嘅時候一定係為左我嘅離開而傷心打牆吧…你唔好再傷害自己啦。
 
仲記唔記得當年我同你講過我家姐生完盈盈之後身體出現問題呀，其實家姐同我一樣都係唔適宜懷孕，所以差啲送命，不過佢最後都咬實牙關，成功遠離死神，所以我都抱住我一樣可以嘅心態，去生下屬於我同你嘅孩子…」
 
當我睇到呢到嘅時候我內心更加難受
 
「傻女，點解你要咁做…我寧願我地唔生小朋友我都唔想你去冒險…」我嘅淚水亦都不斷流下
 
「而家或者係天意啦，我輸左啦，上天要帶我返去啦，無論點都好，我希望你可以能夠湊大我同你嘅愛情結晶品…




 
最愛你的老婆
絕筆」
 
睇完呢封信後，我仰天咆哮，淚水都仍然流個不停，呢一晚就好似將我儲左好耐嘅淚水要一夜間流盡為止，不知不覺間我亦都睡去了…
 
起身過後我坐係床上，望住我同啊螢嘅結婚相，摸住那個已經失去主人嘅枕頭，又不斷回顧住昨晚啊螢比我最後嘅一封信…我知道我而家要做嘅事唔係為啊螢嘅離去傷心，而係要湊大我同啊螢嘅女─永螢…
 
難受傷心過後，日子仍然要如常咁過…日子一日一日咁過永螢亦都越黎越大個啦，係永螢成長期間除左老媽，岳母之外，仲有一眾契媽去陪伴永螢…而我亦都可以專心工作，養活永螢…
 
「啊螢…你見唔見到呀…永螢學識行路啦…」
 
「啊螢…永螢識得叫人啦，佢叫我做爸爸啦…」
 
「啊螢…永螢開始返學啦，希望佢可以同同學仔相處得好好啦」




 
「啊螢…永螢今日問我…點解個個同學都有媽媽…係得佢無…我唔識答佢呀…我真係唔識答佢呀…」
 
「啊螢…永螢今日扭計唔肯做功課呀…我一望到佢份作文係寫我的媽媽…佢話佢唔識做呀…」
 
「啊螢…永螢佢升中學啦…而家望住佢就好似我當年望住你一樣呀…個樣性格都同你一樣呀…而且佢同你一樣都係一個乖學生黎架，希望佢唔好好似你咁，一返中學就遇到成日唔交功課，成日同你鬥氣嘅我啦…」
 
「啊螢…永螢佢都拍拖啦…個男仔都叫做係乖仔，又對啊女好好…我都幾鍾意佢」
 
「啊螢…永螢佢終於大個女啦，要結婚啦…你見唔見到呀，老婆」