(無甜)上天給我的一個玩笑 (新增外傳): (34)

為左準備一個驚喜比啊螢，我亦都提早左好多起身整早餐比啊螢食，亦都準備左午餐方便我今日安排嘅行程
 
「早晨呀」啊螢步出房門
 
「早晨呀，我地要快啲執好野起行啦，陣間啊媽起身就唔比你走架啦」我都係到執緊個背囊
 
「知道」啊螢都即刻去廁所刷牙洗面食早餐
 
我洗埋啲野，拎好個背囊著埋鞋等啊螢出黎
 




「行得嚕~」啊螢一身輕便裝咁行出黎
 
而我係朝早就帶左啊螢去左米埔到行下，吸收大自然嘅氣息同埋…野餐
 
一去到個陣我就拎部相機出黎係咁幫啊螢影影影，不時亦都搵人幫我地合照
 
「哈哈，好少年青人會咁早黎」係附近一對公公婆婆望住我地笑住口咁講
 
「係呀，今日天氣咁好咪早啲黎囉」我亦都點點頭微笑回應
 




「公公婆婆你地好呀，你地好襯呀」啊螢對眼發緊光，好似好羨慕呢啲人生
 
「哈哈哈哈，你地亦都好襯啫」個公公雖然一頭白髮，但仍然中氣十足
 
「仍然咁有緣，我地一齊影幅相做留念啦」婆婆笑笑口
 
「好呀」啊螢成個大細路咁
 
而我亦都搵左個路人幫我地渣機，就係咁同呢對老夫妻影左張相
 




別過公公婆婆後，我同啊螢都開始左我地嘅野餐
 
係呢個大自然景色到野餐，真係身心都能夠完全放鬆，太陽嘅溫暖，飛鳥嘅叫聲，微風嘅流動
 
啊螢背脊挨左係我手臂上，輕閉雙目去感受呢個大自然，我亦都望向天上，去享受呢一個畫面
 
「咔擦，吱~~~~」呢個時候又有人影我地相，我同啊螢無理到
 
結果又黎多張…
 
我同啊螢嘅寧靜被第二下嘅相機聲打破，一齊望向相機嘅方向
 
「兩位唔好意思呀，我係影相嘅發燒友黎，見到兩位，我都情不自禁影低左」佢連忙各我地道歉「我影左兩張，一張你地KEEP，一張我KEEP啦」
 
呢一個刻，我個腦就諗起左周星馳嘅《國產凌凌漆》…




 
「多謝你呀」啊螢接過張相
 
我望一望又真係影得好有意境
 
時間一點一點咁過，太陽亦都越黎越兇猛，我就帶左啊螢返市區仲去左…冒險樂園
 
「我要玩呢個」啊螢指住氣墊球
 
「我去買代幣啦」我亦都拎起銀包
 
係呢段時間啊螢玩左好多唔同嘅機，仲玩得好笑心添
 
可能你會問我，點解唔帶啊螢去機鋪呢，又平又多野玩，我只可以話去機舖嘅話，啊螢對耳會好難受，加上佢咁孩子氣，帶佢黎冒險樂園完全係最好選擇
 




當我地都玩得差唔多嘅時候老媽打黎
 
「衰仔，比啊螢聽」我都估到架啦…
 
「喂…啊媽…哦好呀…咁你同啊爸等我地啦喎，咁好啦陣間見」
 
「啊媽又做咩呀」我接過部電話
 
「啊媽話一齊食埋飯先返去呀，而家叫我地去太子XX餐廳搵佢地呀」
 
「咁起行啦」我拖住啊螢
 
今晚餐飯啊螢同老媽係咁講去左邊到邊到玩，成晚講唔停，而我同老豆都只係旁聽同食食食…不過個場面就好似一家四口咁，好溫馨…我係到諗如果呢個場面有埋我同啊螢嘅小朋友，人生係幾咁美滿