(無甜)上天給我的一個玩笑 (新增外傳): (20)

由於煮食用具嘅限制加上手藝未精嘅我只係滾左個冬瓜湯，滷水雞翼，烚左碟菜就算…將冬瓜湯嘅湯渣整埋黎食，勉勉強強都叫三餸一湯
 
「有啲料到咁喎」啊恩試緊啲餸
 
「唔好玩我啦恩姐」我笑笑口「簡簡單單一餐啫，我無你想像中咁勁」
 
晚飯過後，大家都係係到傾心事，而我唔單止要煮…仲要洗埋，一腳踢
 
當我洗好哂所有野個陣，我準備加入佢地嘅吹水團…
 




「哈哈哈哈，其實抽籤個日我知道啊風識煮飯先整啲咁嘅野」啊恩笑住口咁講
 
「好衰呀你」其他三個女仔一齊講
 
「咩喎，你地識煮咩」啊恩問返佢地
 
「唔識」啊珊第一個答
 
「我煮你敢唔敢食先」啊怡第二個
 




「我麻麻地」啊螢扮哂野…
 
「啊慈呢?」啊恩望住佢
 
「哈!哈!哈!哈!哈!」一粒粒哈字咁講「我正係識公仔麵」
 
「噓」四個女仔一齊噓佢
 
「你地講埋啲咁嘅野唔洗咁大聲掛」我忍唔住出聲
 




「做咩呀?你嬲呀?」啊恩望住我
 
「咁又無」我嘆一口氣「想我煮咪出聲囉唔洗咁嘅」
 
如果你地直接出聲…我可能會煮餐好嘅
 
無幾耐啊恩就同啊慈出左去沙灘到用啊慈嘅專業用具係到觀星
 
啊怡同啊珊呢對孖公仔加埋啊螢就仍然坐左係到吹水
 
我就返左去我個營到拎左我張吊床出黎掛好佢，之後就行左落沙灘自己一個吹風睇星加思考，實際上係望住堆星發呆…
 
我都唔知自己呆左幾耐…
 
「啊風，你係到做咩呀」啊螢係我後面出現




 
「發呆囉」我諗都唔洗諗咁答
 
「…」佢唔識應我，仲坐左係我旁邊
 
「你仲記唔記得中一到中三個陣我點樣追你功課呀?」啊螢望住個海
 
「緊係記得啦，同而家都無咩分別」我冷笑一下「我都未問你點解你咁鍾意追我~~~功課呀?」特登拉長黎講
 
「咪借啲意玩野啦」啊螢拍我手臂「無呀，細個個陣就已經覺得交功課係每個學生嘅責任，你唔交，我咪盡我嘅責任去追你功課囉」
 
「咁而家呢?」我又問佢
 
「而家?我都無你咁好氣，你係都要唔交我可以點?」啊螢笑一笑
 




「唔講呢啲啦，係呢你外甥女而家幾大個呀?有無相睇下呀?」其實我係好鐘意小朋友
 
「有」啊螢拎出手機「拿，佢而家都差唔多十個月大架啦，越大越似我家姐」
 
我接過手機，發現張張相都係由啊螢抱住佢，個樣笑得好甜同啊螢亦都有幾分似樣
 
「好可愛呀」我唔覺意講左出黎
 
「你係話我定盈盈先」原來佢外甥叫盈盈…
 
「兩個都可愛得未」我笑一笑
 
我比返部手機佢後大家都無再講過野，一直係到望住個天空發呆
 
過多陣，啊螢又一次挨左係我膊頭到訓左…




 
「傻女，眼訓就返去訓啦」我細細聲自言自語
 
我亦都無嘈醒佢，由得佢訓而我一直都係望住佢訓
 
係望佢期間，我一直都沉醉係佢嘅睡相…
 
就連流星經過我都睇唔到…