那年玩社，四位靚女: 三十四

之後嗰幾日嘅考試，由於對我嚟講實在太過輕鬆，都冇乜提及嘅價值，總之就係用一半時間做完份卷，然後用一半時間發下吽哣，唔知做咩好，鬼叫考試規矩寫明唔比人早走咩。

做數學卷嗰陣，我大概用咗個零鐘就做晒份 paper 1。連卷都check咗幾次，確認自己冇咩錯之後，就開始無所事事。可能監考老師都知道我不屑去出貓，所以佢都冇乜巡過我坐嗰行，走去巡嗰啲出貓慣犯聚集嘅地方。確認咗監考老師唔會望過嚟或者行過嚟之後，我就開始四圍望。第一個梗係望坐我隔離行嘅嘉瑜啦，見佢應該仲喺Section A2嗰題圓形角度到掙扎緊，不斷喺個圓形上面畫嘢同㩒cal；我嗰陣真係有一個衝動，想喺個位到大嗌「唔好做住先啦，以你嘅智慧而家搞唔掂㗎啦，去下一題啦」，但係我最後都冇咁做。

當嘉瑜冇乜嘢好望，跟住我就望吓坐前一個位嘅 Yvonne。佢應該仲做得慢過嘉瑜，但係見到佢真係好努力咁解緊條題目，雖然我唔清楚，但係應該係嗰條體積題。話就話冇人做數會唔努力，如果唔係點做到條數，但係要知道 Yvonne 喺三個月前仲係成份數學卷連兩成都未必攞到嘅人口嚟，所以而家佢竟然可以做到去呢個程度嘅題目，作為佢半個數學補習老師嘅我，心裏面或多或少都有啲欣慰，Yvonne 終於百屌成材。不過佢都可以係呃我，一飛就飛到去中間嘅題目嘅。

所以完咗數學考試之後我就去咗問 Yvonne，睇吓佢係咪真係呃我。

「乜我似啲會自己呃自己嘅人咩？何況我唔做前面啲題目先，我會連嗰兩成嘅分都冇，到時肯定仆街。」





「咁我對你又好有信心嘅，至少我知道你會肯搏下，睇吓可唔可以創造奇跡。」

「自欺就只會欺埋人嘅姐，我自己有幾多料我心中有數，我好清楚我比你教完之後，我嘅數學程度的確提升咗唔少。」

監考老師攞住我哋啱啱做完嘅嗰疊卷離開試場，同喺門口嘅我同 Yvonne 點頭示意。

我指住攞住試卷嘅老師，同 Yvonne 講：「如果你嗰份卷真係有四成嘅話，咁你真係要請返我食飯。」

Yvonne 好誇張咁打咗個突。「乜考試呢啲嘢唔係老師獎勵學生嘅咩？做咩家下要嗰學生請返老師轉頭？」





「喂大佬，你去燈塔報個 course 都要幾舊水啦，你請返餐飯比我同嘉瑜咪當交學費囉，好著數㗎啦。」

「哦！仲要我請埋你個女朋友呀？我真係冇咁多財力去請人食飯呀康師父。」

「我唔理呀，派卷嗰日記得帶夠錢啦。」講完我即刻掉頭走。

「喂康洛文！」