透明人間: 拯救(上)

第七節 拯救（上）

亞Paul拿著一張有關達叔的Fax給輝揚、亞正、肥賓看，內容大致說張志達（達叔）尚欠某財務公司港幣六十萬元！連達叔和他兒子張相片都有…
輝揚：「欠債還錢，大拿拿六十萬，達叔肯定有麻煩！咪住先！今日亞Paul你話佢羅左半日假，頭先我又聽到亞May話佢去左澳門！依家咩時間？達叔斷估唔會有興緻夜媽媽帶埋個仔去澳門玩掛？當中一定有問題！今餐飯我差唔多了……我依家試下聯絡達叔先，同埋趕住去澳門！睇下搵唔搵到佢！咁啦！我地兵分幾路！亞Paul,麻煩你聽日返工嗰時順便睇下仲有乜野fax或者其他野！亞正你就幫下亞Paul手！我驚唔知有無人上公司找達叔收數！俾老闆知道就麻煩！至於肥賓，麻煩你依家打達叔屋企電話，號碼係xxxxxxxx,依度係佢屋企鎖匙！打唔到就上佢屋企……睇下明仔係唔係屋企！同埋睇下佢屋企有咩蛛絲馬跡……大家到時電話聯絡啦！」
肥賓突然說：「揚！唔得呀！你一個人去搵達叔太危臉了！都係我陪你去啦！亞正你就上達叔屋企睇下有咩野消息大家再電聯啦！」
輝揚感激說：「多謝你肥賓！有你同我一齊我放心好多！我絕對唔可以俾達叔有事架！」肥賓：「兩兄弟咪再同我客氣！行啦！」
亞正：「無問題！達叔屋企方面就交俾我啦！你地要萬事小心！」亞Paul：「正，我陪你一齊上去啦！有咩消息就盡快通知大家啦！」
商議過後，輝揚借口說自己身體不適和各女同事道別！而肥賓就說陪輝揚回家……
坐在船上的肥賓：「揚！其實澳門雖然係細，之但係要突然間搵一個人上黎又真係好難架喎！我地會唔會係衝動左少少呢？」輝揚：「我都知道！我就黎打到電話無電啦……達叔個電話都係飛左去留言！我真係唔知可以為佢做D乜？你都知達叔係香港無人無物架啦！依家就係知佢好有可能係澳門！我唔可以放棄任何一個機會！」肥賓：「我明白！一世人兩兄弟！我地盡力而為啦！我估達叔最有可能係賭場 ，我地一落船就試下去搵啦！」
奈何人海茫茫！就算輝揚對眼有透視能力又怎樣？一樣找不到達叔的足跡！兩兄弟相視苦笑，難道最終要打退堂鼓？正當他們承認失敗時，肥賓的電話突然響起！是達叔號碼的來電！因為輝揚電話沒電，將自己電話號碼轉接到肥賓電話那裡！這時輝揚緊張地開了擴音功能：「喂！係咪達叔呀？你係邊度呀？我地好掛住你呀！」




這時電話另一邊一把粗豪的男聲：「係咪陳輝揚先生？」輝揚緊張地回應：「係…係呀…請問你係邊位？」男聲：「唔洗緊張！我自我介紹先，我叫馬龍！係信義財務公司負責人！你朋友張志達先生同埋佢寶貝仔仔依家係我度，我唔知氹左佢幾耐先揾到你咋！其實都無乜野，佢之不過係我地公司到連本帶利借左六十萬姐！想麻煩陳生代張志達先生還清條數！咁啦，我份人好隨和……依家我俾兩日時間你！到時麻煩你陳生你一個人到黑沙灣第六街合生工廠大廈六樓同張生兩父子聚一聚！我會用張生依個電話打番俾你架啦！呀！係呀！差D唔記得叫張生同你講兩句添！」
這時一把熟識的又帶點疲累的聲音：「揚仔！對唔住！係達叔無用！無啦啦借左佢地五萬蚊！依家要還成六十萬！如果唔係佢地捉左明仔，我都唔會揾你，連累你，我……」馬龍：「好啦好啦！有乜野兩日後再講！陳生，你記著帶夠錢先嚟！到時我會叫人再聯絡你！拜拜！」
這時輝揚和肥賓決定留左澳門兩天，和亞正及亞Paul交代過後，叫他們向公司請假，一場驚心動魄的大戰即將展開……