米米蓮妖怪作品 -《旅行‧如此‧難以忘‧記 》(百集長篇): 第037集 ~ 輝︰好勁架？呢邊都有個「神人」噃！

第037集 ~ 輝︰好勁架？呢邊都有個「神人」噃！

「鬼頭」而家隔住玻璃望住我…

凌黑嘅夜晚，周圍都好靜，只有點點橙黃色嘅街燈映照住，眼前係一個令人毛骨悚然嘅頭，長毛灰髮，風中散髮咁…

紫色嘅頭比一個5號波仲要大，肉同肉之間嘅紋理喺房裡面嘅燈光照射之下清晰可見，深紅色嘅雙眼比我拳頭仲要大…

鼻型巨大，又尖又勾，個口就好似個盤咁，尖牙利齒佈滿血絲…





我之所以講得咁清楚，係因為佢雖然恐怖，但係我早就已經有心理準備，而家我反而驚嘅係佢會傷害到我…

眼見佢似乎唔可以撞爛玻璃入嚟，諗住總算可以鬆返一口氣，點知就見到雖然佢面向我，但係一對眼碌咗去望佢嘅左手邊…

我跟著望過去，發現窗口完全打開咗，仲要係冇窗花嘅…

佢慢慢碌返對眼過嚟望住我笑，之後慢慢另個頭望向窗口位，慢慢飄入嚟個房入面…

我除咗呼吸，成個人完全不知所措，唔知點算好，只有眼見住佢慢慢飄入嚟。





而家…佢已經入咗嚟，喺正我面前…

我感覺到自己嘅生命好危險，因為我知道「鬼頭」佢已經跟踪咗我一段唔短嘅時間，佢唔會好似達叔咁對我…

佢明顯係想嚟殺我，我嚇到腳都軟埋，跌咗落地…

落地呢一刻，我先發現原來自己忘記咗做任何保護自己嘅動作，唔通我真係要死？

「蓬~！」





咩事呀？「光管陳」！？唔係！眼前嘅係一個…

白色短髮比我仲要高大嘅男人，佢左手伸直一手抓住咗個「鬼頭」，我隱約聽到佢嗌咩咩咩…「何氏吸魂手」咁。

但係…使唔使咁型呀！？佢將個「鬼頭」一吓噤咗落地下，大叫咗一聲︰—

「爆裂神拳！」

呢一聲一出，呢一拳一打落去，成個「鬼頭」爆開咗，我除咗擘大個口得個窿，一時之間我真係唔知做乜好。

爆開嘅「鬼頭」好快消失咗，我望一望阿明，佢都呆咗，淨係見到佢個嘅口形講緊︰—

「阿…公…」

咩話！？阿公！？白頭男人係阿明阿公！？





「呼！做鬼之後，練咗咁耐，總算冇白費，哈哈哈！」

「老人家，你係阿明阿公？唔通就係道「黑色符」…」

公公佢先行埋阿明度。

「起身先啦，唔使驚啦，有阿公我喺度，冇有怕嘅！」

「係呀，你梗係明仔嘅朋友仔喇，我好似記得你，你細個我見過你架，阿明阿姨佢用道「黑色符」召返嚟嘅鬼就係我，哈哈哈！」佢轉過頭同我講。

呢個我真係好唔明，阿明唔係話佢阿姨好憎佢害死阿公咩？但係我見公公佢咁樂天咁款，唔似有咩怨氣噃，仲好似好和藹可親，好錫阿明咁。

阿明呢一刻真係喊咗出嚟，我都好少見到佢喊。





「我仲以為阿姨佢嬲我害死你，佢用道「黑色符」嚟害我…」佢喊住都要講。

「傻仔嚟嘅，你阿姨佢最錫係你，點會害你丫，你都知我係道士嚟架啦，你阿媽就學唔到我D嘢，你阿姨就學晒，所以知道你出門，咪叫我遲D投胎都嚟保護埋你呢次旅行先囉。何況…又真係你攪死我嘅，你記唔記得你八歲嗰年呀，食完條蕉，掟咗條蕉皮落地，跣到我砸爆咗個後尾枕，我咪就係咁死架囉，你想唔想睇吓我個後尾枕丫？」

佢哋重聚，我真係好開心，我都眼泛淚光。

「唔使！爆頭都恐怖嘅，我…對唔住呀阿公…」

「傻仔，你唔小心啫，生有時死有命，公公點可以怪你呢？」

「咁…係咪我阻咗你投胎呀？」

「冇事，冇事，我喺下面識人，疏通咗架喇，排咗個快期，一個月後就可以投胎。」

「真架？但係…你可唔可以應承我一樣嘢呀？」





「咩呀？」

「呢，你嗰兩招呀，「爆裂神拳」雖然唔係好襯你，但係個名都仲算合格，但係「何氏吸魂手」真係「娘」到爆呀，可唔可以改改佢呢你估？」

「佢原本用我個名命名架，叫「大波吸魂手」，咁你覺得會唔會好D丫？」

「Sorry，當我冇講過啦。」

之後有人敲門，原來係「喪狗」同「大袋」，公公應該喺佢地入嚟之前消失咗。

「阿公，唔使匿喇，佢哋都係我朋友，一陣我都諗住帶埋你去保護我哋，俾佢哋認識吓你先啦，我諗你都見過「光管陳」啦，一陣會見佢，枉我仲以為係「裸男畫」保護我添。」

公公出現返，「喪狗」同「大袋」都好冷靜，慢慢聽埋我哋講公公嘅來歷…





「哦哦哦，咁我哋去得搵「光管陳」未呀？唔知佢帶我哋去邊呢？」「大袋」講。

「梗係捉鬼啦，唔通去叫雞咩？」阿狗答。

「話唔定真係架，哈哈。」我講笑咁講。

(待續)

下集預告︰

我見到阿輝跟住「喪狗」佢望一望「肥妹」後面，佢哋都表現出一副驚青同嘔心嘅樣…