米米蓮妖怪作品 -《旅行‧如此‧難以忘‧記 》(百集長篇): 第011集 ~ 欣︰你理咗「嬸嬸」佢先丫。

第011集 ~ 欣︰你理咗「嬸嬸」佢先丫。

「有冇咁猛呀？」

「唉…你哋真係…我講俾你哋聽啦，你哋自己要有心理準備呀，唔好話我嚇親你哋就好，哎…都係唔好住，教你哋D嘢先，跟我做。」

我同二家姐都覺得莫名其妙，不過我都撞一撞二家姐隻手叫佢跟住做。

「咁樣，咁樣，咁樣……」





我同家姐都好認真跟住「先生」佢做，「先生」佢教咗我哋「護身手印」同「隱身手印」。

「手指記得要夠直，同埋記得要點實個額頭，唔錯得架。隱身咒係咩時候用呢，第一，喺隻嘢未見到你嘅時候用，第二，喺你護好身後，有機會就要隱身，有幾遠走幾遠，因為護身咒都唔係無敵架。仲有記得千祈唔好兩隻手指隊晒出嚟點額頭，兩個咒係唔同架， 兩隻手指點住額頭係乜都唔係，冇用架，記得呀。」

「先生」擔咗摺櫈出嚟坐定定喺我哋面前，好認真咁講。

「你哋而家唔使答口住，我而家講嘅，就係有關裡面，我放咗喺舖裡面，我前排捉咗嗰隻「猛嘢」嘅事。係噃，我都係用同賣俾你哋嗰個一模一樣嘅「捉鬼塔」捉佢架咋，你哋使唔使入去睇吓效果？」

「唔使喇，唔該。」我另另頭，家姐耍住手講。





「叫你唔好答口，你又答口？」「先生」指住家姐。

我見到家姐又想發脾氣鬧「先生」，我即刻噤住佢。

「你哋知唔知外國有X檔案呀？」我同家姐淨係及及頭表示知道。

「好多人以為X檔案淨係戲嚟，其實係真有其事架，香港都有類似嘅秘密部門，都係D專家組成嘅，我講緊嘅係捉鬼﹑捉妖，甚至係可以同外星人談判嘅專家。」

我同家姐都眼定定咁望住「先生」，好用心咁聽佢講。





「點解我講呢D呢？其實係想你哋知道香港一直都有鬼怪，係我哋嘅組織處理咗咋。政府其實係知道呢D事，有D唔尋常嘅事發生咗之後，警方係會聯絡 我哋去處理，好彩，暫時未有一次處理唔到，處理完成之後，係唔會公開架，所以呢隻嘢殺咗嘅人都係冇公開過，咁我而家就講返裡面隻「猛嘢」。」

我同家姐都好緊張，家姐緊張到好大力咁揸住咗我對手佢都唔知。

「隻「猛嘢」大約三星期前，攞咗五條人命，呢D嘢正常冇公報啦，我哋擺平咗就算。嗰一家人幾年前去過一次泰國旅行，唔知點解佢哋自把自為唔跟團 就走咗去唔知邊度拜咗隻咁嘅「嘢」，我講緊就係隻「猛嘢」，逢係鬼鬼怪怪嘅嘢，越多人供奉佢，佢嘅能力就會越強，所以你哋記得千祈唔好亂咁拜神。講返呢邊 先，佢哋一家人拜過佢之後，返到嚟香港風生水起，以為自己行好運，之後成日一放假就去泰國拜佢，越拜佢哋就越有錢，供奉嘅嘢亦都越嚟越多，終於佢哋三星期 前帶埋隻嘢咗嚟香港，佢哋嘅屋企，順帶一提，你哋知唔知鬼係點樣攞人命架？」

我同家姐都另另頭。

「「喳」嘅鬼，要靠嚇，嚇到你道氣弱喇，佢就可以上你身去自殺呀咁，佢哋係冇能力直接殺你架，所以見到鬼，第一時間係唔好驚。勁嘅鬼，即係裡面 嗰隻，隻「猛嘢」都俾呢家人供奉咗幾年喇，你話隻嘢有咩可能唔勁丫，D鬼能力越大，個樣都唔同晒架，而家喺裡面隻嘢係點嘅樣呢，一個頭，三塊面，唔係三邊 面噃，三塊面都唔係人樣嘅，佢個樣係點你哋自己諗吓啦，有六隻唔知係咪叫手嘅手，冇腳，得條好粗嘅蛇尾，全身都係…嗰D叫咩呢…唔記得咗…呢…碼頭邊好多嗰D呢？」

我同家姐依然係冇講任何嘢，淨係另頭。

「丫，藤壺呀，佢成身都係藤壺。」

「好似咁熟嘅，細妹呀，藤壺係咩嚟架？」家姐佢細細聲問我。





我已經覺得好噁心喇，但係都細細聲答咗家姐。

「火山型，中間有個窿，個窿度會伸D嘢出嚟食微生物嗰D嘢，碼頭邊D石級好多架。」

家姐諗咗一陣，之後好驚咁猛咁耍手叫「先生」佢唔好講。

「夠喇夠喇，唔好講個佢個樣喇，講第二D啦。」

「咁好啦，睇到你個樣驚成咁。咁之後隻嘢點攞嗰一家人嘅命呢？佢明明唔做嘢，靠嚇都嚇得死人，但係佢偏偏一個一個咁殺。首先，佢要個阿爸同個阿媽互斬，斬到噴晒血，D肉爛晒散晒，當時仲要喺三個仔女面前，咁斬法當然咩都冇淨啦，之後仲上咗個大女身，嗰隻嘢好惡毒……」

講到呢度，「先生」講嘢嘅時候都有D飲泣聲。

「佢要個大女有知覺，淨係控制咗佢D手腳，要個大女，用阿爸阿媽之前互斬嗰把刀先殺死個細佬，再鑑 生肢解個得四歲大嘅細妹，我上到去嘅時候，仲睇住隻嘢佢控制住個大女喺度食緊佢細妹D肉…」





「先生」講到呢度，眼都紅晒，眼淚都湧咗出嚟，雖然似係未講完，但係已經停咗落嚟。

我雖然好驚，但係都好同情「先生」佢，正想去安慰佢，突然，騎樓上面傳嚟「嗚」「嘩」兩聲，呢兩聲好尖好大聲，仲要有回音，成個舖位都震晒，我同二家姐都嚇呆咗。

幾秒之後見到「嬸嬸」佢慢慢行緊落嚟，個樣變晒，成面紫色，變得好陰森恐怖。

(待續)

下集預告︰

「…隻「惡鬼」唔係被困住咩？…」