人來人往,你為甚麼要回來找我...: 12
「喂，你兩個，」小息的時候蔡晨敏走過來：「幫幫手。」
「幫手做咩先？」
「劇團今年唔夠人。」
「吓，即係你想搵我同陳子良入劇團？」
「係，出年一月考完試之後係屯門大會堂出。」
「幾時開始練？」
「盡快架喇，不過我諗都會等陸運會完左先。」
「仲等陸運會完？」
「咁而家的而且確係未收夠人丫嘛……」蔡晨敏嘆口氣：「再咁落去都唔知搞唔搞得成。」
「放心啦，我同陳子良一定會幫你既，係咪？」
現在的情況好像比較難去拒絕蔡晨敏的請求。
「係呀。」
雖然我不是做戲劇的材料，但是這一次為了周子若……
戲劇團就戲劇團吧。
「真架？好多謝你地啊。」
「喂喂喂，唔拉埋啊草一齊玩？」
「呃，我……」蔡晨敏輕輕托一下眼鏡。
「唔夠膽呢？良，」周子若剔剔下巴：「我地係時候出動喇。」
出動？
周子若走到啊草的座位旁邊：「啊草───」
「做乜野？」他轉過身。
「入劇團呀。」
「咪玩啦。」他擠了擠臉頰。
「劇團今年唔夠人玩呀。」
「都唔洗搵著我黎搞架。」
「你係咪好唔鐘意上台先？」我走上前。
「咁……咁又唔係。」
蔡晨敏好像喜歡啊草，不知道啊草是不是喜歡蔡晨敏呢？
「咁你咪當係幫下啊敏囉。」
他開始動搖了。
「應承啦，入劇團又唔會食左你既。」周子若搖搖他的手臂。
「好喇好喇，」啊草咬咬下唇：「麻鬼煩呀真係。」
「啊草你都肯入黎劇團呀？真係太好喇！」蔡晨敏幾乎興奮得跳起來。
周子若笑著推推我的手臂：「做到野喎。」
成功說服啊草的滿足感怎樣也及不上周子若開口稱讚我……這種甜滋滋的感覺實在叫我渾身發燙。
放學後走到輕鐵車站的時候摸摸褲袋，驀然發現手機落了在課室的抽屜裡……趕緊回去拿吧。
不知道電話是否仍舊在原處呢？冷靜一點。
走到課室門外，仍然有人在裡面，是張卓蓉。我逕自走到自己座位，探頭一看……
手機不見了。
「喂張卓蓉，有無見過……」我望向她：「咦你拎住我部電話做咩？」
「我……我見你個櫃筒有啲野發光咪拎黎睇下囉，」她說：「本身諗住打比你同你講話你漏左野，先發現原來你部電話就係我手上。」
「咁你而家可以比返我啦。」
「未得住。」她仔細地研究著我的電話：「密碼係咩？」
「吓？密碼？密碼咪───」慢著，怎能告訴她我手機的密碼是周子若的電話號碼呢？
「唔講得。」我伸手從她的手中奪回電話。
「咁架……」她鼓起臉蛋。
「咁晏仲唔走做咩？」
「咪就係等你返黎咋嘛。」
「吓？等我返黎？咁如果我真係唔記得既話你咪唔洗走？」
這傻丫頭。
「無架，我諗住等多陣就走架喇。」她看看時鐘：「要去圖書館呀今日。」
「圖書館？咁勤力既你。」
「唔係呀，中文要做閱讀報告丫嘛。」
「呀係喎，」我怔了怔：「我都無左件事添。」
「你都未借書？」
「係呀，差啲就欠大鼻陳一份功課喇。」
「哈哈，」她失神的笑一笑：「好衰呀你，叫人做大鼻陳。」
「咁佢個鼻係大丫嘛，就好似啲人叫你矮妹咁。」
她抿著嘴。
「我既意思呢……其實係話呢啲花名有時唔一定係貶義既，所以唔洗咁介懷。」
「真係既？」
「好多時都係叫慣左啫。」
她呼口氣：「咁好啦，係唔係去借書架？快啲行啦。」
她帶著我走到輕鐵站。
「搭輕鐵？我地唔係去蝴蝶邨果個圖書館咩？」
「蝴蝶邨果個今日唔開呀。」
「咁你都知……」
「欸，算得係啲咩。」她微笑著。
到了市中心，走在天橋上，使我不禁回想起那天尋找周子若的情景。
「你左轉做咩？圖書館係右邊啊。」
「哦。」
抬頭一望，眼前這座磚紅色夾著黑色的建築物，就是屯門公共圖書館。
「喂，果度係兒童圖書館黎架。」
張卓蓉拉住我的手：「成人圖書館要上多層。」
我用手背捂著自己的前額……
「你諗住借咩書？」她問。
「呃……小說囉。」
「你都鐘意睇小說架？」
「咁點都好過啲咩科學書百科全書既。」
「你鐘意睇邊個既書？」
倒是沒有一個作者是特別喜歡的。
「無呀。」
「跟我黎。」
她帶著我走到一個書架面前。
「睇佢。」
君比？
沒想到這個傻女孩會讀這些。
「佢好多都寫得好好架。」她從書架上取下另一本。
「你全部都睇過晒？」
「咁又未至於……呢本未睇過。」
和張卓蓉一起走到服務櫃檯的時候才發現自己沒有帶圖書證。
「唔緊要，用我呢張借住先咪得囉。」她掏出她的圖書證。
「真係唔該晒。」
「唔洗咁客氣喎。」
我倆從圖書館走出來。
「係呢，可唔可以比你電話我？」
「吓……可以。」
我將自己的手機號碼告訴了她。
「咁我咪可以提你還書囉。」她搖搖她的手機。
她是看扁我一定會忘記還書嗎？