我做金融呢行，遇過好多古靈精怪既客: CASE IV 殯儀入行測試

前文都有講到，其實我有個大學同學係做殯儀生意，佢叫阿國。
 
話說最近一次既gathering（非殘廁），大家約左出黎，係大排檔隊啤酒，我就同佢講，我最近係discuss寫緊以前既事，其中有一單俾電台抄左黎講，我吊晒鬼。
 
咁跟住講講下，佢問我，你有無講我以前同你講果單野？
 
唔係呢一句說話，我都唔記得左以前發生係佢身上既一件事。
 
咁係幾年前，仲讀緊大學時，佢都有間唔中幫下佢屋企人手，因為殯儀本身係佢家族生意，所以好多野都係佢屋企人教佢，唔洗俾錢上課程。
 




但呢行唔係個個都做得黎，其中要經過一個測試，有d人天生既八字或者體質未必適合做呢行。
 
個測試係，將你同條屍放埋一晚，睇下第二朝你有無唔舒服？
 
撇除鬼怪呢d因素，好多人都會因為係極度恐懼既情況下成晚，導致身體機能失衡，第二朝可能會發燒，又痾又嘔。
 
好多人講就天下無敵，話乜都唔驚，入到去，好多時一個鐘都頂唔順就出番黎。
 
咁阿國都係因為呢個原因，於是要入去測試一晚。（就算係家族式生意都要測試架）
 




講少少阿國既背景先，佢本身係無神論者黎，又細到大都有接觸開，唔驚鬼，但始終人對黑暗係有種恐懼感。佢就話預計自己應該無乜野，第二朝一定可以無穿無爛咁出番黎。
 
好喇，咁果晚食完晚飯，hea左陣，大約十一點左右就入去喇，阿國帶左張被，iphone同滿晒電既尿袋入去，諗住玩下電話時間就好快過，玩到眼訓咪訓囉。佢老豆會係停屍間出面守成晚，有咩事就大叫佢。
 
阿國深呼吸一啖，就入左去喇。
 
停屍間正中間放左一張床，上面已經訓住一條屍，有塊白布蓋係面。聽佢老豆講，個死者同阿國年齡差唔多，係車禍死既，岩岩幫佢化好妝，但仲有d手尾未做好，所以未放得入去住。
 
呢個時侯其實一d都唔驚，因為開晒燈，又知老豆係出面，於是佢就求奇搵張鄧仔坐，係到玩電話。
 




大約一點左右，開始眼訓，諗住趴係張枱上面訓，但訓左陣都訓唔著，一黎盞燈好殘眼，二黎個氣氛怪怪地，咁大個仔都未試過同條屍一齊訓。
 
再隔左陣，佢真係忍唔住膽粗粗去左熄燈，因為盞燈阻住佢訓。於是啪一聲熄左盞燈。
 
訓下訓下，佢覺得愈來愈凍，拎住張被愈來愈實。唔知幾多點，終於佢忍唔住凍醒左，起身去較細d個冷氣。
 
佢起身走去個冷氣制到，係牆上面，因為好黑，所以開住個電話mon行，都算有少少光，矇矇矓矓突然間見到有個人影閃過，吊，嚇左跳，原來係塊全身鏡黎，岩岩係自己行過既身影。
 
較細左個冷氣，行番埋位訓，望一望前面塊鏡同鏡入面個黑影，心諗做乜無啦啦多塊鏡係到，可能係老豆係我訓左既時候搬d雜物入黎。算啦，唔深究，繼續訓。
 
唔知點解，慢慢，又愈來愈凍，又要起身較個冷氣，行到埋去個冷氣制到，又係五度？！明明岩岩較番上廿度架。因為停屍間既特殊需要，d冷氣可以較到好凍。
 
行番埋位時，又經過塊鏡，都係有個黑影係到，無咩特別。
 
阿國心諗訓唔著咪起身玩電話囉，玩angry bird，成日形住後面好似有個人望住佢玩咁，但佢另轉頭，當然乜都見唔到啦。




 
玩玩下，無啦啦聽到嘟嘟嘟嘟聲，係個冷氣制d聲，阿國放低部電話係枱，行埋去睇下，吊，個冷氣又自己去番五度，於是阿國又較番去廿度。
 
跟住阿國番到埋位，望住個電話，Ｏ晒咀，果關卡左佢成半個鐘，無啦啦咁就過左關，仲有三粒星，咩料？
 
阿國呢個時侯，已經知道有鬼，但講真，佢又真係唔驚，又唔係害佢，仲幫佢過關，有咩好驚？做得呢行都預左啦，所以佢都無出去叫佢老豆，因為佢知道，一出去搵佢老豆既話，佢老豆就唔會再俾佢入番呢行做。
 
唔知隻鬼，繼續打機，上下高登，好快咁，就到左朝早七點。佢老豆開門行左入黎。
 
老豆：琴晚無咩特別可？
 
阿國：OK啦，正正常常，不過個冷氣好鬼凍。
 
老豆：係丫，所以先叫你帶張被入去，個冷氣一到夜晚就較唔到熱架喇。出去食個早餐啦。
 




阿國同佢老豆出去左隔離間茶記食早餐。食到成咀通粉既阿國，無啦啦問左個問題。
 
阿國：老豆，做咩琴晚無啦啦搬塊鏡入黎？
 
老豆：無丫，你入去無耐我就訓左，不嬲停屍間都唔會有鏡架。
 
阿國突然間，諗番起部冷氣，隻angry bird，同埋個黑影，倒抽一口「梁」氣。