那些年，我錯過了的愛情: 前言

「喂！死佬！」有把女聲係我耳邊響起。「咁鬼夜叫我出嚟做乜呀。聽日考試呀屌你。」
「對唔住大佬囉。我叫得你出嚟仲可以有啲咩姐。唉...」我坐咗係海邊，攞住罐啤酒一飲而盡。「仲有罐呀，飲唔飲呀，唔飲我飲架啦...」
「我飲我飲我飲... 唔想抬你返去！」如是者，咁就逼到佢陪我飲酒。點解我要逼佢飲？其實都無原因，自己飲好悶。「今次又邊個呀... 呀怡、呀晴、呀瑩定係新嘅女女啊。」
「你估唔到架啦，咁易俾你估到我就唔叫葉志豪。」
「車！你都唔係叫葉志豪。即係我估中咗啦。」佢搣住我塊面問我：「你飲咗幾多罐呀，又開始亂講野。」
「一罐咋嘛。得求先個罐...」
「你唔好撥啦，聽到晒啦。咁響，壟嘅都聽到啦。」「我數下先.. 1，2，3，4，喂你得唔得架...」
「點解佢拒絕我呀。我又唔係差，自問都有返咁上下斤兩，點解會失敗架。無可能架。」依家嘅我基本上醉到七七八八，開始亂咁講嘢，差在未嘔姐。咁嗰日晚呢，啲內容都無乜參考性，就不外乎「我都有錢啦，點解拒絕我。」「咁樣俾人拒絕，好瘀呀。」嗰啲毫無意義嘅內容。唯獨係依個女仔--婷姐，先會聽我發酒癲。
介紹下啦，婷姐其實係我以前屋村鄰居個女嚟嘅，佢大我5歲，係我細個嘅時候成日同我去玩，佢大概幾年前搬走咗，好似話係同男朋友一齊住。不過不過不過，佢男朋友呢，我哋係有一齊玩過，佢都放心俾呀婷姐搵我嘅。回歸正傳，咁呢佢搬走前我哋交換咗個電話，咁我哋都有時會傾下計，交流下啲日常。