《我愛上咗同我一夜情嘅女人》: 第一章

「落蠱！？」

「嗯哼，個店主標榜自己搵嘅師傅係苗族老巫婆，吹到天花龍鳳咁，不過都係冇乜用。」

說罷，Kama苦笑住將杯中所剩不多嘅白蘭地一飲而盡。

睇到佢憂傷嘅表情，呢幅因著另一個男人悲痛嘅神色，我覺得自己仲慘過食屎。





佢略帶哽咽，繼續道：「如果可以，我想時間停留喺前日下晝。」

二月二十二號，佢哋執完最後一劑，然後分咗手。

「著返衫坐喺床頭一齊食煙嗰陣，我問佢畢業會唔會返香港生活，佢話未來嘅嘢未來先算喎。其實，仲有揮霍時間嘅資本係我唯一嘅救命稻草，如果佢話我知呢場等待有期限，哪怕係要我耗十年我都會話我肯。但佢嘅態度，清清楚楚咁同我講就算我等到絕經，等到入土，都只會係竹籃打水一場空。」

「係，等待愛情從來遙遙無期，但人不嬲都係犯賤㗎。明知收穫同付出唔會成到正比，點解仲要盲目堅持？」

呢番說話係問佢，同樣都係問我自己。





佢皺起眉頭，認真回答：「我諗，莫過於等待看似容易過放棄，因為至少過程中我可以盼望奇蹟降臨。雖等待嘅成本係高，但我能夠永遠處於無限趨向結果嘅狀態。」

或者…林惠講得啱。

身體比靈魂率先產生碰撞嘅男女，最終必然冇辦法修成正果。

不過就算係咁，都擋不住總有信奉我命由我不由天嘅人妄想打破定律。

據我所知，某啲女人陷入愛情嗰陣近乎癡狂，恨不得鑽研曬古往今來東方西方嘅玄學法術。





抽塔羅牌，星座配對於佢哋而言已經太過小兒科。

要配對星盤，睇吓兩個人嘅「馬克思盤」同「推運盤」——「馬克思盤」用嚟分析恰當嘅相處模式以及心上人對自己嘅諗法；「推運盤」直程預知埋二人未來關係走向；

要查星宿關係，測算兩個人嘅本命同值日關係到底係榮親、安壞、友衰、業胎、危成定命之星，仲有近中遠距離之分，同樣用作了解彼此適宜嘅相處方法。

佛牌、蠟燭、調頻、讀心、干預、紫微斗數、前世今生、白魔法儀式、黑魔法儀式，反正用盡渾身解數，誓死要得到自己所「愛」嘅人。

曾經嘅我視呢啲女人係病急亂投醫，就算我有情感問題，亦從來都不屑沾染呢啲嘢。

直到遇到Kama我先發覺，愛情從來都係一物降一物嘅遊戲，被降服者自然而然會為降服者變得瘋魔。

不可抗力下，我都成為咗佢哋嘅一份子，變得無比癡狂地依賴西洋魔法，搵林惠做咗各式各樣嘅愛情儀式，完全稱得上係濫用，同「某啲女人」根本毫無區別。

而佢，亦不惜用巫蠱留住自己所愛嘅人，承擔無法預計嘅業力報應，比我歇斯底里千倍萬倍，已經係走火入魔嘅地步。





可能Kama個名早就預示咗一切。佢係我命中注定要承受嘅‘Karma’，係逃避唔到嘅必修課題。

如果林惠知道咗佢嘅所作所為，大機率會話自己有心無力，唔會再幫我。

所以我選擇唔比佢知。

睇咗眼時間，我發現已經將近夜晚十一點，於是起身去埋咗張單，再將Kama送返屋企。

到咗屋企樓下，佢眼尾微微泛紅，望住我問：「霖哥哥，你聽日可唔可以嚟接我放學？」

如果唔知道游祐誠嘅存在，呢種梨花帶雨嘅模樣真係會令我以為佢對我有別樣嘅情感。可惜屹立喺我面前嘅事實係佢淨係當我係傾訴對象，或者再赤裸啲，係佢用嚟攝時間嘅水泡。

「冇問題。」





愛情世界嘅最大悲劇應該唔係被蒙在鼓裡，係心如明鏡卻掩耳盜鈴，簡稱自己攞嚟衰。