【愛情】如地下情一樣嘅癮，係我對你嘅定義: 111
「你啲頭髮⋯」黎昕淇嘅手放喺陸修然嘅頭上，摸住佢柔軟嘅頭髮，「你好似狗狗⋯你係犬系？」
莫名其妙咁，黎昕淇有啲中意呢種狀態，佢嘅會長係有啲霸氣但又有啲可愛嘅反差
「要你嘅手機。」黎昕淇以半命令嘅語氣道
「嗯。」陸修然直接將手機遞比黎昕淇
黎昕淇隨手咁用相機對住自己嘅書包影咗張相，但書包放到好大，連掛喺上面白色嘅公仔都只係露咗一隻手
黎昕淇順手就用陸修然嘅IG將呢張相po咗出去story，大家睇起嚟大概只係一張意義不明嘅概，畢竟兩人嘅書包都係黑色、款式都差唔多，好難辨別出屬於邊個
「就算係咁樣偷偷影一張唔明顯嘅相po出去都唔緊要⋯」呢個想法喺黎昕淇嘅腦海冒出
「你用我手機po咗啲咩？」陸修然坐起身撥一撥有啲凌亂嘅頭髮
「冇咩特別。」黎昕淇唔在意咁聳肩，將手機放喺書枱上面，「比番你。」
黎昕淇就好似有意想陸修然㩒開嚟睇一樣，冇鎖屏就將手機放到枱上，陸修然自然想知道黎昕淇po咗啲咩出去，望住上載完成嘅story，陸修然只係回頭望咗一眼放喺門邊嘅書包
「你就咁迫不及待想大家知道我地一齊？」陸修然淡然咁問道，但嘴角似乎有啲難壓抑
「又唔會有人認到影緊咩。」黎昕淇冇正面回答，「冇咩所謂⋯」
「哦⋯」陸修然似懂非懂咁頷首，「都係。」
最近笑嘅次數比之前多，雖然感覺同黎昕淇冇咩太大關係，但若然話完全冇關係又唔係真係咁，畢竟黎昕淇嘅快樂都係佢嘅快樂成分之一
「雖然影得好隱晦，但人地有心要搵而搵到嘅話，就同我冇咩關係啦⋯」陸修然又一次打開story認真打量，眼裏忽然有一絲擔憂閃過，「陣間有人問你係唔係咁點？」
「答唔係呀。」「咁你po出嚟嘅意思係⋯？」
陸修然有啲不解，既然會否認，咁做咩要比線索其他人⋯？
「唉～會長你咁受大家注目，我都冇辦法啦～」黎昕淇輕嘆一口氣，側身瞓低喺床上朝陸修然伸手，「我已經答咗大家想知嘅嘢，只係有啲隱晦。」
黎昕淇嘅內心始終都係期待有人發現，唔想親口承認但又想有人察覺，心情就係變得咁矛盾⋯
⋯
「今朝早見到你啦～」宋楚妍伸手拎放喺水杯浸嘅鐵叉，「你今日又係同會長一齊番嚟呀？」
宋楚妍刻意咁強調係「又」一齊番，江清懿默默咁望住黎昕淇點點頭
「撞到咪一齊番。」黎昕淇應對自如，平靜咁回答，「你見到我唔上嚟叫我嘅？」
「我仲行過嚟？想做巨型發光體呀？」宋楚妍笑道，「不過見你同會長一齊番學，我就安心啦。」
「你安心啲咩呢？」江清懿不禁笑出聲，「番學校條路好危險咩？」
「危險又唔危險嘅，不過知道一定有咩進展進行緊，覺得好安心～」宋楚妍滿臉自豪咁講
江清懿聽到後一直喺度笑，笑到黎昕淇個心噗噗跳，好明顯喺危險程度上而言，知情者比起番學嘅路會更危險嘛⋯
「可能陣間黎昕同你講其實佢真係同會長拍緊拖呢～」江清懿講咗一句，將黎昕淇嘅心跳速率同緊張直接向上拉到頂點
「唔會囉！」宋楚妍肯定咁將江清懿嘅假設否定，「黎昕一定會第一個話我知囉！我唔係最早知唔通你係最早知？」
「哦～都係喎～」江清懿先係意味深長咁望黎昕淇一眼，然後附和宋楚妍表示認同，「都啱嘅～」
「你冇我咁重要㗎啦～」宋楚妍自豪咁仰起臉
「不過未來嘅嘢好難講㗎嘛～可能係我唔小心知道咗呢～咁樣都係早過你知～」江清懿笑笑口咁解釋，佢愈講黎昕淇就愈緊張
「宜家又未發生！發生咗再講啦！」宋楚妍講唔過江清懿，輕哼一聲又低頭繼續食飯
宋楚妍冇發現平時都會喺呢個話題上否認嘅黎昕淇，最近一直都冇再刻意否認佢講嘅嘢，無力嘅否認嘅背後係完整嘅真相
江清懿喺枱底用手機send咗個message比坐喺佢對面嘅黎昕淇，放喺枱上嘅手機一震，將黎昕淇嘅目光隨即吸引過去
「你嘅朋友完全冇懷疑你喎～講到咁出面都唔信點搞？」
「我都冇辦法⋯」黎昕淇拎起手機回覆，「上次講佢都唔信，唔知要點樣突然直接開口」
「就係好直接咁同佢講你地一齊，唔洗要咩引言都得啦」「會唔會太突然？？？」
「唔突然，大家都咁熟啦」「我之前一直都冇認我係中意會長，突然咁講佢實覺得我講大話」
「唔理啦，直接講咗先啦，你猶疑咩啫，拍個拖都要咁神秘」
黎昕淇拎住手機，抬眼比咗江清懿一個無奈嘅眼神，小幅度咁搖搖頭
番到學校之後坐喺位嘅黎昕淇嘅視線顯然地一直跟住宋楚妍，腦袋一直思考緊要點樣開口先可以令成件事自然啲，唔會令話題嚟得太突然
「哎⋯！」黎昕淇嘅大腦超過負荷，直接投降一樣伏低喺枱上
「做咩呀咁沮喪？」宋楚妍走向黎昕淇，坐低喺黎昕淇前面嘅位置
「諗緊嘢⋯」黎昕淇嘅額頭貼住枱面
「諗緊咩？」宋楚妍自然咁就追問落去，但黎昕淇又唔知點樣講先好
黎昕淇將自己嘅手機放喺枱上，輕輕㩒咗喺手機邊上嘅鎖屏鍵一下，螢幕直接喺宋楚妍嘅視線範圍內亮起
「咦，你換咗wallpaper呀？」宋楚妍瞄咗一眼後問道
「嗯⋯係呀⋯」黎昕淇欲言又止，以為向來好奇嘅宋楚妍會找起佢嘅手機睇，但佢冇
「我去一轉會室。」「好呀～」
宋楚妍早就習慣咗黎昕淇嘅習慣，黎昕淇起身行出課室，直接行到會室，推門入去就見到佢嘅會長舒服咁靠住櫈背仰起頭小睡
黎昕淇輕輕力將門閂上，放輕腳步走到陸修然身後，雙手放喺身後交搭着，微微彎低腰俯身盯住陸修然嘅睡顏
IG Link: https://www.instagram.com/nd_cotttoncandy/?hl=zh-tw